တၢ်ဒုးနဲၣ်တၢ်ဂီၤမူအဖုၣ်ဖိတဖၣ် လၢ ၅ မံးနံး အတီၢ်ပူၤ ဘၣ်ဃးဒီးမူခိၣ်ဖီလီၤအဆၢကတီၢ် တၢ်မၤအသးအဂ့ၢ်ဖိတဖၣ်န့ၣ် ကဲထီၣ်တၢ်ထုးန့ၢ်သးလၢ ပှၤကွၢ်တၢ်ဖိတဖၣ်အဂီၢ်န့ၣ်လီၤ. တၢ်ဂီၤမူအဖုၣ်ဖိတဖၣ်အံၤ ဘၣ်တၢ်ဒိန့ၢ်အီၤ လၢဟံၣ်ဖိဃီဖိတဂၤဂၤ လိာ်ကွဲတၢ်လိာ်ကွဲ လၢဘၣ်ဃးဒီးစကံ(ski) ဖဲအဝဲသ့ၣ် ဒိးလိာ်ကွဲဝဲလၢ ဟံၣ်အခိၣ်ဒူဒီး ဘၣ်ဒိဘၣ်ထံးန့ၣ် ကဲထီၣ်တၢ်နံၤတၢ်အ့ဒီး ပှၤလၢအကွၢ်တၢ်တဖၣ် ဟ့ၣ်ဂံၢ်ဟ့ၣ်ဘါဝဲဒၣ်န့ၣ်လီၤ. တၢ်နံၤဘၣ်ဖၣ်လဲ အဒိၣ်ကတၢၢ် လၢပှၤကွၢ်တၢ်ဖိတဖၣ်အဂီၢ်န့ၣ် ဖျါဝဲဒၣ်ဖဲ ပှၤလိာ်ကွဲတၢ်ဖိတဖၣ် လိာ်ကွဲတၢ်လိာ်ကွဲတဖၣ်လၢ ကျဲအကျိၤအကွာ် လၢအတမ့ၢ်တၢ်ဘျၢအသိးအခါ န့ၣ်လီၤ.
တၢ်ဂီၤမူဒ်သိးအံၤတဖၣ် လၢကဲထီၣ်တၢ်လီၤနံၤတဖၣ်န့ၣ် တမ့ၢ်တၢ်အတဂ့ၤဘၣ်ဆၣ် ပာ်ဖျါထီၣ်ဝဲ ပတၢ်ပာ်သူၣ်ပာ်သးဖဲ ပှၤဂၤဘၣ်ကီဘၣ်ခဲ ဒီးဘၣ်ဒိဘၣ်ထံးအဆၢကတီၢ်န့ၣ်လီၤ. တၢ်ဂ့ၢ်ဒ်သိးအံၤန့ၣ် ဝံဧိၤဘါဒယၤ ပာ်ဖျါဝဲ ထံကီၢ်ခံဘ့ၣ် လၢအထီဒါလိာ်အသး ဒ်အမ့ၢ်ကီၢ်အံၣ်စရ့လးဒီး ကီၢ်အဒိၣ်(Edom) အဂ့ၢ်န့ၣ်လီၤ. ဖဲကစၢ်ယွၤထံၣ်ဝဲလၢအံၣ်စရ့လးကဘၣ်တၢ်စံၣ်ညီၣ်လၢ အတၢ်ဒဲးဘးအခါ ပှၤအဒိၣ်ဖိတဖၣ် သးခုမုာ်သးဝဲဒၣ်န့ၣ်လီၤ. ဧိၤဘါဒယၤ ၁:၁၃-၁၄ ပာ်ဖျါဝဲ ပှၤအဒိၣ်ဖိတဖၣ် ဟံးန့ၢ်ဆူၣ် ပှၤဝ့ၢ်ဖိတဖၣ် ပှၤသုအဃ့ၢ်ပူၤဖျဲးတန့ၢ်အဂီၢ် တြီဃာ်ဝဲ ဒီးဟ့ၣ်ဂံၢ်ဟ့ၣ်ဘါဝဲ အံၣ်စရ့လးအဒုၣ်ဒါတဖၣ်န့ၣ်လီၤ. တၢ်ဟ့ၣ်ပလီၢ် ဟဲခီဖျိဝံဧိၤဘါဒယၤ ဖဲ အဆၢဖိ ၁၂ ဒီး ၁၅ န့ၣ် ပကထံၣ်ဘၣ် “လၢနဒီပုၢ်ဝဲၢ်အမုၢ်တနံၤ, မုၢ်တနံၤလၢတၢ်ပာ်အီၤလၢ ပှၤတခီဘီမုၢ်ဖိန့ၣ် နတဂ့ၤကွၢ်ကီဘၣ် … အဂ့ၢ်ဒ်အံၤ, ယွၤအမုၢ်တနံၤအိၣ်ဘူးဒီးပှၤကလုာ်ခဲလၢာ်လီၤ”န့ၣ်လီၤ.
ဖဲပထံၣ်ဘၣ်ပှၤအဂုၤအဂၤတဖၣ် ဘၣ်ကွၢ်ဆၢၣ်မဲာ် တၢ်တၤတၢ် ဒီးတၢ်နးတၢ်ဖှီၣ်အဆၢကတီၢ်န့ၣ် ဖျါဝဲဒၣ်ဒ်သိး အတၢ်ဒဲးဘးအဃိ တူၢ်ဘၣ်ဝဲသနာ်က့ ပဂ့ၤဃုထၢ တၢ်သူၣ်ကညီၤသးကညီၤ အဝဲသ့ၣ်လၢ ပတၢ်ပာ်ထီၣ်ထီပသး အဖီခိၣ်န့ၣ်လီၤ. ပတမ့ၢ်ပှၤလၢ ကဘၣ်စံၣ်ညီၣ်တဲာ်အဝဲသ့ၣ်ဘၣ်. ထဲဒၣ် ကစၢ်ယွၤတဂၤဧိၤ စံၣ်ညီၣ်တဲာ်တၢ်သ့ဝဲဒၣ်န့ၣ်လီၤ. အဆၢဖိ ၂၁ ပာ်ဖျါဝဲ ဟီၣ်ခိၣ်ဘီဧိၤမုၢ်ဧိၤတဖၣ်န့ၣ် မ့ၢ်ဒၣ်ကစၢ်ယွၤအတၢ် ဒီးထဲဒၣ် ကစၢ်ယွၤဟံးဃာ်ဂၢၢ်ကျၢၤ တၢ်တီတၢ်လိၤ အစိကမီၤ ဒီးတၢ်သူၣ်ကညီၤသးကညီၤတၢ်န့ၣ်လီၤ.
