လဲးစံၣ်စကီး(Lacey Scott)အိၣ်ဝဲလၢ အလီၢ်ကဝီၤကျးတဖၣ်လၢ အဆါ ဆၣ်ဖိကီၢ်ဖိလၢၦၤဘုၣ်လၢဟံၣ်, ထံၣ်ဘၣ်ဝဲ ညၣ်ဖိတဘ့ၣ်လၢ အသးတဖှံလၢအအိၣ်လၢ ထံဒၢအကနူၤန့ၣ်လီၤ. ညၣ်ဖိအံၤ အသဒံၣ်အလွဲၢ်ဆီတလဲသးဆူ တၢ်အလွဲၢ်အသူဒီး အဖံးဘၣ်ဒိဆါလၢ အဖျါထီၣ်လၢ အက့ၢ်အဂီၤအလိၤလီၤ. လဲးစံၣ် မၤပူၤဖျဲးညၣ်ဖိလၢ အသးအိၣ်အနံၣ်တဆံ, ယုၢ်န့ၢ်ဝဲအမံၤလၢ “လၢ်အၢ”( Monstro) လၢညၣ်တီသွ့ လၢတၢ်တဲမုၥ်နၤ “ပံၣ်နိၣ်ခၠံၣ်ယိၣ်” (Pinocchio)အပူၤ ဒီးတ့ၢ်နုၥ်အီၤဆူ “တၢ်ဆါဟံၣ်”( hospital) အထံဒၢတဖျၢၣ်အပူၤ, ဒီးဆီတလဲန့ၢ်အီၤ ထံအသီကိးနံၤဒဲးန့ၣ်လီၤ. ကယီကယီ, လၢ်အၢဖိ ဟဲဂ့ၤထီၣ်, စးထီၣ်လိၥ်ကွဲၦီၢ်ထံဒီးအမိၢ်ၦၢ် ဟဲဒိၣ်ထီၣ်လီၤ. အဝဲအသဒံၣ်လၢအသူဆီတလဲသးဆူ ထူဘီအလွဲၢ်လီၤ. ခီဖျိလဲးစံၣ် အတၢ်ဟ့ၣ်လီၤသးအဃိ, “လၢ်အၢ”ဖိကဲထီၣ် ကဒီးညၣ်ဖိလၢ အလီၤအဲၣ်တဘ့ၣ်လီၤ.

ဖဲလံၥ်လူၤကၣ်အဆၢဒိၣ် ၁၀ အပူၤ, ကစၢ်ယ့ၣ်ၡူးတဲဖျါထီၣ် တၢ်ဂ့ၢ်တမံၤလၢ ၦၤလဲၤတၢ်တဂၤလၢ အဘၣ်တၢ်ဒိအီၤတီၢ်အီၤ ဟံးန့ၢ်တၢ်လၢအအိၣ်ဒီးအီၤ လၢတမျၥ် ဒီးပၥ်တ့ၢ်ကွံၥ်အီၤ ဘူးကသံဘၣ်အသးလီၤ. ၦၤလုၢ်တၢ်အဒိၣ်မ့ၢ်ဂ့ၤယ ၦၤလ့ၤဝံဖိမ့ၢ်ဂ့ၤ လဲၤသဒၣ်ကွံၥ်အီၤ ဒီးတပၥ်သ့ၣ်ညါအသးလၢ ၦၤအံၤ အတၢ်တူၢ်ဘၣ်တၢ်နးနးကျံၤကျံၤ န့ၣ်ဘၣ်. မ့မ့ၢ် ၡၤမရံဖိတဂၤ, လၢအမ့ၢ် ကလုၥ်လၢအဘၣ်တၢ်ထံၣ်အံၣ်ထံၣ်ဆံး လၢၦၤယူဒၤဖိ, ကဟုကယၥ်ၦၤအံၤ, တုၤဒၣ်လဲၥ်လၢ ခီၣ်လၢၥ်တၢ်လၢၥ် ဘူၣ်လၢၥ်စ့ၤလၢ ၦၤအလိၣ်ဘၣ်ဝဲ (လူၤ ၁၀:၃၃-၃၅)န့ၣ်လီၤ. ကိးသတြီထီၣ် ၦၤၡၤမရံဖိ ဒ်အမ့ၢ်ၦၤလၢအကဲထီၣ် နီၢ်နီၢ်, “ၦၤလၢပဃၢၤ”, ကစၢ်ယ့ၣ်ၡူးဟ့ၣ်ဂံၢ်ဟ့ၣ်ဘါ အၦၤဒိကနၣ်တၢ်ဖိ တဖၣ်ဆူ ကမၤတၢ်ဒ်န့ၣ်အသိးန့ၣ်လီၤ.

ဒ်တၢ်လၢလဲးစံၣ်မၤဘၣ်ဝဲဆူ ညၣ်ထူဖိတဘ့ၣ်အံၤအသိး, ပဝဲစ့ၢ်ကီး ပမၤ တၢ်သ့ဝဲ ခီဖျိဆူၦၤလိၣ်ဘၣ် တၢ်မၤစၢၤလၢအအိၣ် လၢပခိၣ်ပဃၢၤတဖၣ်န့ၣ်လီၤ. ၦၤလၢအဟံၣ်အဃီတအိၣ်, တၢ်ဖံးတၢ်မၤတအိၣ်, ၦၤဂံၢ်စၢ်လၢနီၢ်ခိက့ၢ်ဂီၤ, ဒီးၦၤလၢအဘၣ်အိၣ်သယုၤသညိလၢ အမ့ၢ် “ၦၤလၢပဃၢၤ” တဖၣ် အိၣ်ဝဲလၢပသးသမူ တၢ်လဲၤကျဲအပူၤန့ၣ်လီၤ. မ်ပကပျဲပမဲၥ်အတၢ်ထံၣ် လၢၦၤဂၤအတၢ်သူၣ်အုးသးအုး ဒီးမိၤၦၤဆူ တၢ်ကမၤဆၢက့ၤတၢ်အဂ့ၤ ခီဖျိတၢ်ကဟုကယၥ် ၦၤလၢပခိၣ်ပဃၢၤန့ၣ်တက့ၢ်. တၢ်ကတိၤဆၢဂ့ၤဆၢဝါ လၢတၢ်အဲၣ်တၢ်ကွံ, တၢ်နီၤဟ့ၣ် တၢ်အီၣ်တၢ်အီ, ကျိၣ်စ့တၢ်မၤစၢၤတဆံးတက့ၤ, မ့ၢ် ကစၢ်ယွၤစူးကါၦၤ ဒ်သိးပကလုၢ်ထီၣ် အဝဲအတၢ်အဲၣ်လၢၦၤဂုၤၦၤဂၤ, တၢ်အဲၣ်တၢ်ကွံတမံၤလၢ အဒုး ကဲထီၣ် တၢ်ကိးမံၤလၢ အသီန့ၣ်ဒ်လဲၣ်.