ဘ့လံၣ်(Billy)မ့ၢ် ထွံၣ်ဖိတဒုလၢအသးတီ ဒီးအဲၣ်အကစၢ်, ဘၣ်တၢ်သ့ၣ်ညါအီၤအါအါဂီၢ်ဂီၢ် လၢအ့ၣ်ထၣ်နဲး(internet) ဖဲ ၂၀၂၀ နံၣ်န့ၣ်လီၤ. အကစၢ်ရၢးစၢၣ်(Russel) အခီၣ်ဒ့ကၢ်အဃိ ဘၣ်သုဝဲနီၣ်ထိးဘိ ဒီးဘၣ်လဲၤတၢ်က့ၤတၢ်န့ၣ်လီၤ. တယံာ်ဘၣ် ထွံၣ်ဖိန့ၣ် ဖဲလဲၤတၢ်ဒီးအကစၢ်အဆၢကတီၢ် တၢ်မၤအသးဒ်အခီၣ်န့ၣ် ဆါဝဲဒၣ်န့ၣ်လီၤ. ရၢးစၢၣ် လဲၤဒုးနဲၣ်အထွံၣ်ဖိ ဘ့လံၣ် လၢ ကသံၣ်သရၣ်လၢအကွၢ်ဆၣ်ဖိကီၢ်ဖိ ဒီးတၢ်ဃုထံၣ်န့ၣ် တၢ်ဘၣ်ဒိဘၣ်ထံးလၢအလိၤ တအိၣ်ဝဲဒၣ်ဘၣ်. မ့ၢ်အိၣ်ဒၣ်ဝဲ အတၢ်ဒီးအကစၢ်န့ၣ် ဟးဝဲဃ့ၢ်ဝဲန့ၣ် တဘၣ်တၢ်နီတမံၤန့ၣ်ဘၣ်. ဖျါဝဲ ဒ်ထွံၣ်ဖိမ့ၢ်လဲၤတၢ်ဒီး အကစၢ်န့ၣ် ပၥ်မၤအသး ဒ်အခီၣ်ဆါဝဲဒၣ်န့ၣ်လီၤ. တၢ်မၤအသးဒ်သိးအံၤ ပစံးအီၤသ့လၢပပၥ်ဖျါထီၣ်တၢ်တမံၤဃီ ဒ်ၦၤလၢတၢ်ဘၣ်ဒိဆါအီၤတဂၤန့ၣ်လီၤ.

တၢ်လဲၤသကိး, မၤသကိး, ရ့လိၥ်သကိးတၢ်ဒီးၦၤအါဂၤန့ၣ် မ့ၢ်တၢ်သိၣ်လိသီလိတၢ်ဆူ ရိမ့ၤတၢ်အိၣ်ဖှိၣ်ဖိတဖၣ်အအိၣ်န့ၣ်လီၤ. စီၤပီလူးပၥ်ဖျါဝဲ တၢ်မၤလိၥ်အလီၢ်ခံ ၅ ထံၣ်လၢ တၢ်မၤလိၥ်အထံၣ်တဆံအပူၤ “အဲၣ်ၦၤလၢနဃၢၤ ဒ်နအဲၣ်လီၤနသး ဒၣ်နဲ အသိးန့ၣ်တက့ၢ်” န့ၣ်လီၤ. အဆၢဖိ ၈ အပူၤစ့ၢ်ကီး “သုတအိၣ်ဒီးသုကမၢ်လၢၦၤ နီတမံၤတဂ့ၤ. အိၣ်ထဲတမံၤလၢသုဘၣ်အဲၣ်လိၥ်ကွံလိၥ်သုသးတက့ၢ်” ပၥ်ဖျါဝဲလၢတၢ်လဲၤသကိးတၢ်ဒီး ၦၤအါဂၤန့ၣ် မ့ၢ်တၢ်အကါဒိၣ်န့ၣ် ပကထံၣ်ဘၣ်လီၤ.

ၦၤကွဲးလံၥ် ကၠဲနံၣ်အဲဘၣ်(စ)(Jenny Albers)ဟ့ၣ်ကူၣ်ဝဲဒၣ် “ဖဲၦၤတဂၤဂၤ စုကၢ်ခီၣ်ကၢ်တဘၣ် မၤဘှီဂ့ၤထီၣ်အစုကၢ်အခီၣ်ကၢ်န့ၣ်တဂ့ၤ. နမၤတသ့ဘၣ်. ဖဲၦၤတဂၤဂၤ သးဘၣ်ဒိဆါ အဆၢကတီၢ် နဟံးန့ၢ်ထုးထီၣ်ကွံၥ် အတၢ်ဘၣ်ဒိဆါအံၤတန့ၢ်ဘၣ်. တၢ်လၢနမၤသ့ပၥ်ဖျါထီၣ်တၢ်အဲၣ် ဒီးလဲၤတၢ်ဒီးအဝဲသ့ၣ် ဖဲအဝဲသ့ၣ်နီၢ်ခိနီၢ်သးတၢ် ဘၣ်ဒိဆါအီၤတမံၤမံၤအပူၤန့ၣ်တက့ၢ်. ဘၣ်တဘျီဘျီ မ့ၢ်တၢ်လၢ အဝဲသ့ၣ်လိၣ်ဘၣ်ဝဲနီၢ်နီၢ်န့ၣ် ၦၤသ့ၣ်တဖၣ် တမ့ၢ်ထဲဒၣ်တဂၤဧိၤန့ၣ်ဘၣ်.

မ့ၢ်လၢကစၢ်ယ့ၣ်ၡူး, ပတၢ်အုၣ်က့ၤခီၣ်က့ၤကစၢ်လဲၤတၢ်ဒီးၦၤ ဖဲပဘၣ်ဒိဘၣ်ထံးဒီး တၢ်ဘၣ်ဒိဆါၦၤအဆၢကတီၢ်ဒီးတကတီၢ်ညါန့ၣ်လီၤ. တၢ်အံၤပသ့ၣ်ညါလၢတၢ်အခီပညီလၢ ပကဘၣ်လဲၤတၢ်ဒီးၦၤအဂၤတဖၣ်န့ၣ်လီၤ.