ဟီၣ်ခိၣ်ဒီဘ့ၣ်ထံၣ်ဘၣ်ဝဲ တၢ်လီၤပျံၤလီၤဖုးတမံၤန့ၣ် ကဘီယူၤရံး (helicopter) လၢအယူၤဟးကွၢ်ကီတၢ်တခိၣ် ပိၢ်ဖးဝဲဒီးအက့အခီတဖၣ် လီၤတဲာ်ဆူ ထံကျိပူၤန့ၣ်လီၤ. အနီၣ်ဝံၢ်တရံး, ဒီးအမဲၢ်န့ၣ် ကၢ်ဖျိးကွံာ် ဒီးပှၤနီၣ်တၢ်ဖိ, ဒီးဟံၣ်ဖိဃီဖိ ယဲၢ်ဂၤ, အိၣ်ကတာ်ထီအသးလၢ ကဘီယူၤအမိၢ်ပှၢ်အပူၤန့ၣ်ဒီး, လီၤတဲာ်ဆူ ထံကျိပူၤန့ၣ်လီၤ. အဝဲၢ်ပိာ်မုၣ်အဝဲၢ်ပှၢ်ပိာ်ခွါ, အဖိဒိၣ်မုၣ်, ဒီးအဖိဒိၣ်ခွါခံဂၤ သံဝံၤ, ဖဲမုၢ်နံၤတဖၣ်လဲၤပူၤကွံာ်ဝဲ, ဒီးပိာ်မုၣ်လၢအသံတဂၤ အပုၢ်ပိာ်ခွါန့ၣ် တဲဖျါထီၣ်ဝဲလၢ “အဝဲသ့ၣ်လဲၤပူၤကွံာ်ဟီၣ်ခိၣ်တကတီၢ်ဃီ” န့ၣ်လီၤ.
လၢတၢ်တဖျးမဲာ်ဖိအပူၤန့ၣ် တၢ်အိၣ်မူ ဆီတလဲအသးသ့ဝဲ, ဒီးခီဖျိတၢ်လီၤမၢ် တဖၣ်လၢပပာ်ဖျါဆှဲ တန့ၢ်တသ့တဖၣ်အဃိ, ပဘၣ်ပျံၤ, ဘၣ်ယိၣ်ဘၣ်ဘီတၢ်န့ၣ်လီၤ. စီၤယိၤဘး စ့ၢ်ကီး, ဘၣ်ကွၢ်ဆၢၣ်မဲာ် တၢ်လီၤမၢ်, ဒီးတၢ်သးအုးဖးဒိၣ်လၢ ပတဲဖျါထီၣ် အဂ့ၢ်တသ့ဘၣ်န့ၣ်လီၤ. မုၢ်နံၤလၢအလီၤသးအုးတနံၤန့ၣ် ပှၤဟဲစိာ်တၢ်ကစီၣ်တဖၣ် စံးဘၣ် စီၤယိၤဘးလၢ ဒုၣ်ဒါမၤသံ အခ့အပှၤတဖၣ်, ဒီးတၢ်ဂုာ်ဟံးန့ၢ်ဆူၣ် အဆၣ်ဖိကီၢ်ဖိတဖၣ် (မ့) သံဝဲဒၣ် (ယိၤ ၁:၁၃-၁၇) န့ၣ်လီၤ. ဝံၤန့ၣ်ဒီး, စီၤယိၤဘး ဒိးန့ၢ်ဝဲ တၢ်ကစီၣ်အနးကတၢၢ်န့ၣ် မ့ၢ်ဝဲဒၣ် ဟံၣ်လၢ အဖိခွါ နွံဂၤ, ဒီးအဖိမုၣ် သၢဂၤ, အိၣ်ဆိးဝဲတပူၤဃီတဖျၢၣ်န့ၣ် မ့ၢ်လၢကလံၤမုၢ်အူတၢ်ဆူၣ်ဆူၣ်, ဒီးမၤလီၤပှီၢ်ကွံာ်ဝဲအဃိ, သံဝဲဒၣ် ခဲလၢာ် (:၁၈-၁၉) န့ၣ်လီၤ. “တုၤနုၤတစု စီၤယိၤဘးဂဲၤဆၢထၢၣ်, ဒီးဖှီအဆ့, ဒီးလူၤအခိၣ်, ဒီး ထိၣ်လီၤပှီၤအသးလၢဟီၣ်ခိၣ်, ဒီးဘူၣ်ထီၣ်ဘါထီၣ်တၢ်” (:၂၀) န့ၣ်လီၤ. လၢတၢ်သူၣ်ကိၢ်သးဂီၤဒိၣ်ဒိၣ်ကလဲာ်အပူၤန့ၣ် စီၤယိၤဘး စံးဝဲဒၣ်လၢ “ယွၤဟ့ၣ်လီၤတၢ်, ဒီးယွၤဟံးထီၣ်ကွံာ်တၢ်, မ်ယွၤအမံၤဘၣ်တၢ်ဆိၣ်ဂ့ၤအီၤတက့ၢ်” (:၂၁) န့ၣ်လီၤ.
ဘၣ်မနုၤအဃိ, အဝဲတူၢ်ဘၣ်ခီၣ်ဘၣ်တၢ်လဲၣ်န့ၣ် စီၤယိၤဘး တသ့ၣ်ညါဝဲ ဘၣ်ဆၣ်, ဖဲအတၢ်အိၣ်အသး အနးကတၢၢ်အကတီၢ်ဒၣ်လဲာ်, ဘူၣ်ထီၣ်ဘါထီၣ် ယွၤန့ၣ်လီၤ. ကစၢ်ယွၤ တအိၣ်ဘှ့ၣ်အိၣ်ဘှီၣ်ဝဲဒၣ်လၢၤဘၣ်. ကစၢ်ယွၤ ဒုးနဲၣ်ဖျါထီၣ်ဝဲ အတၢ်ကူၣ်သ့, ဒီးအစိအကမီၤဒိၣ်ဒိၣ်မုၢ်မုၢ်လၢအီၤအဃိ, စီၤယိၤဘး နာ်သန့ၤက့ၤကစၢ်ယွၤ အတၢ်တိာ်ကျဲၤ, လၢအစိဒိၣ်ကမီၤဒိၣ်အပူၤ (အဆၢဒိၣ် ၃၈-၄၂) န့ၣ်လီၤ.
ဘၣ်မနုၤအဃိ, ပတူၢ်ဘၣ်ခီၣ်ဘၣ် တၢ်နးတၢ်ဖှီၣ်လဲၣ်န့ၣ် တမ့ၢ်လၢပကနၢ်ပၢၢ်ဝဲဒၣ်နီတဘျီဘၣ်. ဘၣ်ဆၣ်, ပစိာ်ဆှၢထီၣ် ပတၢ်နးတၢ်ဖှီၣ်တဖၣ်ဆူ ကစၢ်ယွၤ လၢကမၤမုာ်ထီၣ်က့ၤပှၤတဂၤအအိၣ်သ့ဝဲဒၣ်န့ၣ်လီၤ.