ဆိကမိၣ်ထီၣ်နဲလၢ ပှၤအမဲာ်ချံတထံၣ်တၢ်တဖၣ် အတၢ်ဃ့ၢ်သဖှိလၢာ်ဂံၢ်လၢာ်ဘါအချ့ကတၢၢ် (sprinting) န့ၣ်တက့ၢ်.
တၢ်မၤအသးအံၤ, ပကထံၣ်ဘၣ် ဖဲပှၤမဲာ်ချံတထံၣ်တၢ်တဖၣ် အတၢ်ဃ့ၢ်သဖှိပြၢ အကတီၢ်, ခီဖျိလၢအဘၣ်ဟံးန့ၢ် ပှၤဂၤအတၢ်မၤစၢၤ (Paralympic) န့ၣ်လီၤ. ပှၤလၢ အမၤစၢၤ ပှၤဃ့ၢ်တၢ်ဖိလၢအမဲာ်ချံတထံၣ်တၢ်တဖၣ်န့ၣ် ဘၣ်ဃ့ၢ်သကိးခီၣ်ကါတပူၤဃီ, ဒ်ပှၤနဲၣ်ကျဲတဖၣ်အသိး, ဒီးပှၤခံဂၤန့ၣ် ဘၣ်တၢ်စၢဃာ်ဝဲလၢ ပျံၤဖိတဘိန့ၣ်လီၤ. ဒ့ဘ့း ဘရီ(န) (David Brown) မ့ၢ်ဝဲဒၣ် အမဲရကၤ အပှၤဃ့ၢ်သတြီၤတၢ်ဖိ လၢအနုာ်လီၤဃ့ၢ်သတြီၤ မံထၢၣ်တကယၤ, လၢတဆံတၢ စဲးကီၣ်အတီၢ်ပူၤ, ဒီးမၤနၢၢၤဝဲဒၣ် ခိၣ်ဖးထူကဘျၣ်န့ၣ်လီၤ. အါစုအါဘျီ, ပှၤလၢအဟံးစုနဲၣ်ဆှၢ ဃ့ၢ်သကိးအတၢ်ဃ့ၢ်သတြီၤန့ၣ် မ့ၢ်ဝဲဒၣ် ကၠရိ(မ) အၣ်ဘရံၣ် (Jerome Avery) န့ၣ်လီၤ. Brown ပာ်ဖျါထီၣ်ဝဲဒၣ် အတံၤသကိးခံဂၤ အတၢ်ဘၣ်ထွဲအဂ့ၢ်န့ၣ်လၢ “ပလီၤဂာ်ဒ်ပှၤတဂၤဃီအသိး” န့ၣ်လီၤ. Avery တူၢ်လိာ်ဝဲ အတၢ်ကတိၤ, ဒီးစံးဝဲဒၣ်လၢ “ပဃ့ၢ်တၢ်န့ၣ် ပှၤဂၤကထံၣ်ဝဲဒၣ် ဒ်ပှၤဃ့ၢ်တၢ်ထဲတဂၤဧိၤအသိး” န့ၣ်လီၤ.
တၢ်ဂ့ၢ်ဖိအံၤ မ့ၢ်တၢ်ဟ့ၣ်ဒိဂ့ၤတဲာ်ဘၣ်အဃံအလၤတမံၤ, ဘၣ်ဃးဒီးသးမုၢ်စီဆှံ အတၢ်နဲၣ်ဆှၢပှၤန့ၣ်လီၤ. ဖဲပဃ့ၢ်တၢ်လၢာ်ဂံၢ်လၢာ်ဘါအကတီၢ်, သးစီဆှံ လဲၤသကိးတၢ်ဒီး ပခီၣ်ခါကိးကါဒဲး, နဲၣ်လိၤကယဲၢ်ပတၢ်ဟူးတၢ်ဂဲၤခဲလၢာ်, ဒီးနဲၣ်ဆှၢဝဲဒၣ် ပသးသမူအတၢ်လဲၤတဖၣ်န့ၣ်လီၤ.
ပတၢ်ဂဲၤလိာ်မၤနၢၤ တၢ်ဒဲးဘး, ခီဖျိလၢသးမုၢ်စီဆှံအတၢ်ပာ်ဖှိၣ်မၤသကိးတၢ်လၢပသူၣ်ကံၢ်သးလဲအပူၤဒ်လဲၣ်အဂ့ၢ်န့ၣ် စီၤပီလူး ကွဲးပာ်ဖျါဝဲဒၣ် ဖဲလံာ်ကလၤတံ ၅ အပူၤ, “လဲၤတၢ်လၢ သးအပူၤတက့ၢ်. ဒီးသုညၣ်အသးကွံတၢ်န့ၣ်, သုတမၤလၢထီၣ်ပှဲၤထီၣ်တဂ့ၤ” န့ၣ်လီၤ. ဆူအမဲာ်ညါ အဆၢဖိတနီၤအပူၤန့ၣ် ကွဲးပာ်ဖျါကဒီးဝဲဒၣ်လၢ “ပမ့ၢ်မူလၢ သးန့ၣ်အပူၤဒီး, မ်ပလဲၤတၢ်လၢ သးန့ၢ်အပူၤတက့ၢ်” (:၂၅) န့ၣ်လီၤ. စီၤပီလူး စံးဘၣ်ပှၤလၢ ပကလဲၤခီဖျိမၤနၢၤ “တၢ်မၤဘၣ်ဃးဒီးပဖံးပညၣ်တဖၣ်” (:၁၉), ဒ်သိးဒီးပကဖီထီၣ်သၣ်ထီၣ် သးအတၤသၣ်တဖၣ် (:၂၂-၂၃) န့ၣ်လီၤ.
မ်ပကကါထီၣ်ပခီၣ်ခါတပူၤဃီဒီးသးမုၢ်စီဆှံ အတၢ်နဲၣ်ဆှၢပှၤ, ဒီးအလီၢ်မ့ၢ်အိၣ်န့ၣ်ဒီး, ပကဘၣ်ဃ့ၢ်ဝဲဒၣ်န့ၣ်လီၤ.