ပှၤဝ့ဖိ (Wales), ပှၤတ့တၢ်ဂီၤ ကၠီ ဖဲး(စ) (John Petts) နၢ်ဟူဝဲဒၣ် တၢ်ကစီၣ်တထံၣ်, ပှၤလၢအသးဆူၣ်အဲၣ်အပှၤကလုာ်တဖၣ် ထိၣ်ဟူးထိၣ်ဂဲၤအသး ဒီးမၤပိၢ်ဖးဝဲ မ့ၣ်ပိၢ်, ဖဲ နီၢ်ဂံၢ် ၁၆ အကျဲ, ဘျၢထံခရံာ်ဖိအတၢ်အိၣ်ဖှိၣ် လၢ Birmingham, Alabama, ဒီးပှၤအၤဖြံၤကၤ-အမဲရကၤ ပိာ်မုၣ်သးစၢ်ဖိ လွံၢ်ဂၤသံဝဲဒၣ် ဖဲ ၁၉၆၃ နံၣ် လါစဲးပထ့ဘၢၣ်န့ၣ်လီၤ. အဝဲအဲၣ်ဒိးမၤစၢၤဝဲဒၣ် တၢ်ဘှီဂ့ၤထီၣ်က့ၤ သရိာ်အပဲတြီလၢ အဟးဂီၤသ့ၣ်ဖးတဖၣ်န့ၣ်လီၤ. တယံာ်ဘၣ်, ပှၤဝ့ဖိတဖၣ် ထၢဖှိၣ်ပာ်ဖှိၣ်ဝဲ စ့ပာ်ကတီၤန့ၣ်လီၤ.
Petts ဆီတလဲက့ၤ ပဲတြီဖိန့ၣ် မ့ၢ်တၢ်လၢအလီၤဆီ, ဒီးဒုးနဲၣ်ဝဲဒၣ် တၢ်ပျၤထီ ကစၢ်ယ့ၣ်ရှူး လၢထူၣ်စုညါအလိၤန့ၣ်လီၤ. ကစၢ်ယ့ၣ်ရှူး အစုထွဲတခီန့ၣ် ဆီၣ်ဖျိးဝဲဒၣ် ပဲတြီ အတကွီၢ်, လၢအဒုးနဲၣ် တၢ်ဆီၣ်ဖျိးကွံာ် တၢ်သးဟ့တဖၣ်, ဒီးသလၣ်အိးထီၣ်ဝဲအစုစ့ၣ်တခီ, လၢအဒုးနဲၣ် တၢ်ပျဲပျၢ်ကွံာ်တၢ်ကမၣ်န့ၣ်လီၤ. လၢပဲတြီဖိအဖီလာ်န့ၣ် တၢ်ကွဲးဃာ် လံာ်မဲာ်ဖျၢၣ် “နမၤယၤဒ်အံၤ” န့ၣ်လီၤ. တၢ်ဆိကမိၣ်အိၣ်ထီၣ်ဝဲလၢ မ့ၢ်ကစၢ်ယ့ၣ်ရှူး အဲၣ်ဒိးစံးကတိၤဝဲ တၢ်ကတိၤအံၤဆူ မတၤတဖၣ်အအိၣ်လဲၣ်န့ၣ်လီၤ. မ့ၢ်ကစၢ်ယ့ၣ်ရှူး အဲၣ်ဒိးစံးကတိၤဝဲဆူ ပှၤတဖုလၢအမၤသံ ပှၤစူၢ်က့ၤနာ်က့ၤတၢ် ပိာ်မုၣ်သးစၢ်ဖိသၢဂၤန့ၣ်ဧါ, (မ့) ပှၤဝ့ဖိတဖၣ် လၢအဟ့ၣ်မၤဘူၣ်ပဲတြီဖိအံၤန့ၣ်ဧါ.
တမ့ၢ်လၢပကဘၣ်ဃုထၢအီၤဘၣ်. တချုးလၢ စီၤစီလူး အတၢ်အိၣ်မူ ဆီတလဲအသးဒံးဘၣ်န့ၣ် စီၤစီလူး မၤသံဝဲဒၣ် ကစၢ်ယ့ၣ်ရှူး အပျဲၢ်အဘီၣ်တဖၣ် (မၤ ၉:၁-၂) န့ၣ်လီၤ. ဘၣ်ဆၣ်, ဖဲ ကစၢ်ခရံာ် လီၣ်ဖျါထီၣ်အသးလၢ စီၤစီလူး, ဒီးစံးဝဲဒၣ်လၢ”စီၤစီလူးဧၢ, စီၤစီလူးဧၢ, ဘၣ်မနုၤလၢနမၤအၢယၤလဲၣ်” (၉:၄) န့ၣ်လီၤ. ကစၢ်ယ့ၣ်ရှူး ဒုးနဲၣ်ဖျါထီၣ်အသး, ဒ်အမ့ၢ်တၢ်တမံၤဃီဒီးအပျဲၢ်အဘီၣ်တဖၣ်အဂ့ၢ်န့ၣ် ပှၤလၢအမၤအၢမၤနး အပျဲၢ်အဘီၣ်တဖၣ်န့ၣ် မ့ၢ်တၢ်မၤအၢမၤနးအီၤ (ကစၢ်ယ့ၣ်ရှူး) ဒီးပှၤလၢအဆိၣ်ဂ့ၤအပျဲၢ်အဘီၣ်တဖၣ်န့ၣ် မ့ၢ်ဝဲဒၣ် ပှၤဆိၣ်ဂ့ၤ ကစၢ်ယ့ၣ်ရှူး အနီၢ်ကစၢ်ဒၣ်ဝဲန့ၣ်လီၤ.
ဒ်စီၤစီလူး ဃုထံၣ်သ့ၣ်ညါဝဲအသိး, ခီဖျိလၢ ကစၢ်ယ့ၣ်ရှူး ကတဲာ်ကတီၤန့ၢ်ဝဲ တၢ်ပျၢ်တၢ်ကမၣ် လၢအဆီတလဲက့ၤတၢ် (၉:၁၇-၂၀), ဒီးဆီၣ်ဖျိးကွံာ် တၢ်သးဟ့တဖၣ်န့ၣ်လီၤ. ကစၢ်ယ့ၣ်ရှူး အစုစ့ၣ်ဒီးအစုထွဲန့ၣ် ဖံးသကိးမၤသကိးတၢ်ထီဘိ, ဒီးအပှၤဂီၢ်မုၢ်လၢအဘၣ်တၢ်မၤအၢမၤနးအီၤတဖၣ် အဖံထံးခိၣ်အလိၤန့ၣ် တပျဲပျၢ်ဝဲဒၣ် အစုတဖၣ်နီတဘျီဘၣ်န့ၣ်လီၤ.