ဒရူ ရီးဘ့(န)စၢၣ်(န) (Drew Robinson) န့ၣ် ဒ်အမ့ၢ် San Francisco Giants Baseball အပှၤလိာ်ကွဲတၢ်ဖိတဂၤအသိး, သ့ၣ်ညါဝဲဒၣ် သးအတၢ်အိၣ်သးအထီၣ် အလီၤန့ၣ်လီၤ. လၢတၢ်လိာ်ကွဲအကတီၢ်, ဖဲအဝဲဘၣ်ဒိဘၣ်ထံးတဘျီလၢ်လၢ်, ဘၣ်လဲၤလိာ်ကွဲဝဲဒၣ် လၢပှၤလိာ်ကွဲတၢ်ဖိလၢ အပတီၢ်ဖုၣ်တဖၣ်အကျါအဃိ, အနီၢ်သးတၢ်ဆီၣ်သနံး ဟဲနုာ်လီၤဝဲဒၣ်န့ၣ်လီၤ. မ့ၢ်ပှၤကနုာ်လီၤလိာ်ကွဲလၢယလီၢ်ဧါ. ယတၢ်ဘၣ်ဒိဘၣ်ထံး ဘၣ်ကဘျါက့ၤဂ့ၤထီၣ်က့ၤန့ၣ်ဧါ. လၢအဟံၣ်န့ၣ် ပှၤလၢအလိာ်ကွဲသကိးတၢ်ဒီးအီၤတဖၣ် မ့ၢ်လိာ်ကွဲဝဲန့ၣ် အဝဲခိးကွၢ်ဝဲလၢ ကွဲၤထံၣ်ဟူအပူၤ, ဒီးစံးဝဲဒၣ်လၢ “ယတူၢ်ဘၣ်ယဲဒ် ယဘၣ်အိၣ်လီၤဖး, ဘၣ်အိၣ်သယုၢ်သညိဒၣ်ထဲတဂၤဧိၤအသိးန့ၣ်လီၤ.” ဖဲဟီၣ်ခိၣ်ဒီဘ့ၣ် ကိဘ့း တၢ်ဆါသံသတြိာ်အကတီၢ်, အဝဲဂုာ်ကျဲးစၢးမၤသံလီၤအသးဝံၤန့ၣ်ဒီး, ထံၣ်လိာ် စံးကတိၤလိာ်သးဒီး Giants ပှၤလိာ်ကွဲတၢ်ဖိတဖၣ် အကသံၣ်သရၣ်လၢသးတကပၤ, ဘၣ်ဃးဒီးအတၢ်ဂ့ၢ်ကီ, ဒီးဒိးန့ၢ်ဝဲ တၢ်မၤစၢၤအါမးအဃိ, ဟ့ၣ်သဆၣ်ထီၣ် ပှၤလိာ်ကွဲဖိ အဂုၤအဂၤတဖၣ် ဒ်သိးကဟဲစံးကတိၤသကိး နီၢ်သးအတၢ်ဂ့ၢ်ကီတဖၣ်န့ၣ်လီၤ. ခဲကနံၣ်အံၤ, ဘၣ်ကွၢ်ထွဲဟ့ၣ်ကူၣ်ဟ့ၣ်ဖး Giants အပှၤလိာ်ကွဲတၢ်ဖိတဖၣ် နီၢ်သးအတၢ်အိၣ်ဆူၣ်အိၣ်ချ့လၢၢ်ဆၢလၢာ်ကတီၢ်, ဒီးဟ့ၣ်သဆၣ်ထီၣ် ပှၤလိာ်ကွဲတၢ်ဖိ လၢအနီၢ်ခိအဂံၢ်ဘါဆူၣ်တဖၣ် ဒ်သိးကမၤဂ့ၤအါထီၣ် နီၢ်သးအတၢ်အိၣ်ဆူၣ်အိၣ်ချ့စ့ၢ်ကီးန့ၣ်လီၤ. ဖဲ Robinson ပူၤဖျဲးထီၣ်က့ၤဝဲလၢ အတၢ်အိၣ်သးအနးကတၢၢ်ဝံၤန့ၣ်ဒီး, နာ်ဝဲဒၣ်လၢ အတၢ်တိာ် ကဘၣ်မ့ၢ်ဝဲဒၣ် တၢ်ဟ့ၣ်ဂံၢ်ဟ့ၣ်ဘါပှၤဂုၤပှၤဂၤန့ၣ်လီၤ.

နီၢ်သးအတၢ်အိၣ်သးအဂ့ၤအဘၣ်န့ၣ် လံာ်စီဆှံ ထံၣ်ဝဲဒၣ် ဒ်တၢ်မုၢ်လၢ်ကွၢ်စိလၢ အအိၣ်ဒီးတၢ်ကူၣ်သ့ဘၣ်ဆၣ်, မ့ၢ်စ့ၢ်ကီး တၢ်အဲၣ်ကစၢ်ယွၤ အတၢ်ဟ့ၣ်တမံၤန့ၣ်လီၤ. ဝံယရှါယၤ သးဝံၣ်စံးထီၣ်ပတြၢၤ ကစၢ်ယွၤလၢ “ပှၤအသးလၢ အသန့ၤအသးလၢနၤန့ၣ် နကပၢၤအီၤလၢ တၢ်ဃူတၢ်ဖိးအလၢအပှဲၤ” (၂၆:၃) န့ၣ်လီၤ. ဖဲတၢ်ကီတၢ်ခဲဒိၣ်ဒိၣ်မုၢ်မုၢ် အကတီၢ်, ယွၤအတၢ်အၢၣ်လီၤလၢကမၤမုာ်ထီၣ်က့ၤတၢ်န့ၣ်လီၤ. တၢ်ဒဲးဘး, ဒီးတၢ်ပူထီၣ် ပူလီၤတၢ်တဖၣ်အဃိ, လၢပှၤဂီၢ်မုၢ်တဖၣ်အသးပူၤန့ၣ် ကစၢ်ယွၤတအိၣ်လၢၤဘၣ်. အိၣ်တ့ၢ်ဝဲထဲ တၢ်သးဒ့ဒီတဖၣ်, ဒီးသးအတၢ်သဘံၣ်ဘုၣ်န့ၣ်လီၤ. လၢတၢ်န့ၣ်အဃိ, ဝံယရှါယၤ ဟ့ၣ်သဆၣ်ထီၣ်ဝဲဒၣ် “သန့ၤသုသးလၢယွၤလီၤစိၤလီၤထီတက့ၢ်. အဂ့ၢ်ဒ်အံၤ, လၢကစၢ်ယွၤအပူၤန့ၣ် လၢၢ်အထူအယိာ် အိၣ်ဝဲတဖျၢၣ်” (:၄) န့ၣ်လီၤ.

လၢပသးသမူ အတၢ်လဲၤကျဲန့ၣ် ဖဲပသူၣ်ကိၢ်သးဂီၤအကတီၢ်, ပနာ်သန့ၤ ကစၢ်ယွၤ သ့ဝဲစ့ၢ်ကီးန့ၣ်လီၤ. ပကပညိၣ်ပာ်ဖှိၣ် ပသးအတၢ်ဆိကမိၣ်တဖၣ်, ဒီးပကနာ်သန့ၤ ကစၢ်ယ့ၣ်ရှူး, လၢအမ့ၢ် ကိးမုၢ်နံၤ, ပသးအတၢ်ဃူတၢ်ဖိးအကစၢ်န့ၣ်တက့ၢ်.