ဖဲ ဘ့(လ) ခီး(ဒ) (Bill Cordes) ထံၣ်လိာ်က့ၤအသးဒီးအပုၢ်ပိာ်ခွါ ရီဘၢး (Robert) န့ၣ်ဒီး, လၢမဲာ်ထံမဲာ်နိအပူၤန့ၣ် စံးဝဲဒၣ်လၢ “ယသးသမူဒီတစိၤ, ယလူၤကွၢ်ဃုအီၤန့ၣ် ယံာ်တ့ၢ်မးလံ” န့ၣ်လီၤ. မ့ၢ်လၢဟံၣ်ဖိဃီဖိအတၢ်ဂ့ၢ်ကီအဃိ, ဖဲအပုၢ် ရီဘၢး အိၣ်ဒံးဒၣ် လွံၢ်လါဖိအကတီၢ်န့ၣ် အဒီပုၢ်ဝဲၢ်ခံဂၤ လီၤဖး, ဒီးတထံၣ်လိာ်အသးန့ၣ် ကအိၣ်ဝဲလၢ အနံၣ်ဃိးဆံလံန့ၣ်လီၤ. အပုၢ်ဆံးဖိလၢ အတသးပ့ၤနီၣ်ဝဲ, (မ့) လၢအလူၤကွၢ်ဃုဝဲတဂၤ, ဒ်သိးကဃုထံၣ်န့ၢ်က့ၤဝဲအဂီၢ်န့ၣ် ဘ့(လ) အလံၤမုၣ်ဖိ မၤစၢၤအီၤန့ၣ်လီၤ.
လၢလံာ်လူၤကၣ် ၁၅ အပူၤန့ၣ် ကစၢ်ယ့ၣ်ရှူး အတၢ်ကတိၤဟ့ၣ်ဒိ သၢထံၣ်, ပာ်ဖျါဝဲဒၣ် ပှၤသ့ၣ်တဖၣ်လၢ အတဆိကတီၢ်, တၢ်လူၤကွၢ်ဃုထံၣ်န့ၢ်က့ၤ တၢ်လၢအလုၢ်ဒိၣ်ပှ့ၤဒိၣ်, (မ) ပှၤလၢအပာ်လုၢ်ပာ်ပှ့ၤဝဲအဂ့ၢ်န့ၣ်လီၤ. သိလၢအဟါမၢ်တဒု အတၢ်ကတိၤ ဟ့ၣ်ဒိအပူၤန့ၣ်, ကစၢ်ယ့ၣ်ရှူး စံးဘၣ်တဲဘၣ် ပှၤဖၤရံးရှဲ လၢအတၤအီၤတဖၣ်လၢ “ပှၤလၢသုကျါလၢအအိၣ်ဒီးအသိတကယၤ, ဒီးမ့ၢ်ဟါမၢ်တဒုဒီး, တပာ်လီၤတဲာ်ဝဲ ခွံဆံခွံဒု လၢပှၢ်လၢ်ကျါဒီး, တလဲၤဃုဘၣ်လၢအဟါမၢ်တဒုတုၤ, အထံၣ်က့ၤဝဲန့ၣ်, မ့ၢ်မတၤတဂၤလဲၣ်” (:၄) န့ၣ်လီၤ. ကစၢ်ယ့ၣ်ရှူး အဲၣ်ဒိးဒုးသ့ၣ်ညါဝဲဒၣ်လၢ ပှၤဖၤရံၤရှဲတဖၣ်, လၢအမ့ၢ် “သိ ခွံဆံခွံဒု” န့ၣ် ထံၣ်လီၤက့ၤအသး, ဒ်ပှၤအိၣ်တီအိၣ်လိၤဒီးယွၤအသိးန့ၣ်လီၤ. ဘၣ်ဆၣ်, တမ့ၢ်ဘၣ်. ကစၢ်ခရံာ် စံးဘၣ်တဲဘၣ် အဝဲသ့ၣ်လၢ “တၢ်သးခုကအိၣ်လၢ မူခိၣ်, လၢပှၤတၢ်ဒဲးဘးဖိတဂၤ လၢအပီၢ်ယၢ်လီၤက့ၤအသးအဃိ” န့ၣ်လီၤ. အဂ့ၢ်ဒ်အံၤ, ပှၤလၢအစူးကွံာ်ညိကွံာ် တၢ်ဒဲဘးတဖၣ်အဂီၢ်န့ၣ် မ့ၢ်လၢကစၢ်ယွၤ ကပျဲပျၢ်အတၢ်ကမၣ်အဃိ, မူခိၣ်ဖိတဖၣ် ကသးခုဝဲဒၣ် အါန့ၢ် ပှၤလၢအထံၣ်လီၤက့ၤအသးလၢ တၢ်ပီၢ်ယၢ်လီၤက့ၤသး အလီၢ်တအိၣ်ဘၣ်တဖၣ်န့ၣ်လီၤ.
ပပှၤကွၢ်သိဖးဒိၣ်တဂၤအံၤ ကဃုထံၣ်န့ၢ်က့ၤပှၤ,ဃုာ်ဒီး, ပှၤခဲလၢာ်လၢအလီၤမၢ်တဖၣ်အဂီၢ်န့ၣ် တဆိကတီၢ်ဝဲနီတဘျီဘၣ်. ပမ့ၢ်ပီၢ်ယၢ်လီၤက့ၤပသး, ဒီးဒိးန့ၢ် တၢ်အုၣ်က့ၤခီၣ်က့ၤလၢခရံာ်အပူၤန့ၣ်, တၢ်သးခုအိၣ်လၢမူခိၣ်, လၢယွၤအသးကံၢ်ပူၤ, အဂ့ၢ်ဒ်အံၤ, တၢ်လၢ “အဟါမၢ်တ့ၢ်ဒီး, ဘၣ်တၢ်ထံၣ်န့ၢ်က့ၤလံ” (:၃၂) န့ၣ်လီၤ. ပှၤတဂၤလၢအလူၤကွၢ်ဃုပှၤန့ၣ်ဃုထံၣ်န့ၢ်က့ၤပှၤလံအဃိ, ပကဘၣ်သူၣ်ခုသးခုဝဲဒၣ်န့ၣ်လီၤ.