ဝ့(လ) တဂၤ, ဘၣ်တၢ်ဆိကတီၢ်အီၤလၢ အတၢ်ဖံးတၢ်မၤ, လၢတၢ်တဒုးသ့ၣ်ညါဆိအီၤဝံၤအလီၢ်ခံ, အသးဟးဂီၤဒိၣ်မးတုၤဒၣ်လဲာ်, ဘၣ်လဲၤထီၣ် တၢ်ဆါဟံၣ်လၢ သးအတၢ်ဆါတကပၤန့ၣ်လီၤ. စှၤနွံလဲၤပူၤကွံာ်ဝဲ, ဒီးအတၢ်အိၣ်သးန့ၣ် တလီၤဆီဝဲဒၣ်နီတမံၤဘၣ်န့ၣ်လီၤ. ဘၣ်ဖဲမုၢ်တနံၤန့ၣ် ဒ်ညီနုၢ်အသိး, အဝဲဟးထီၣ်ဟးလီၤဝဲအကတီၢ်, ကသံၣ်သရၣ်လၢအယါဘျါအီၤန့ၣ် ထံၣ်အီၤ, ဒီးလၢတၢ်နံၤကမှံအပူၤန့ၣ် စံးဘၣ်အီၤ, “မ့ၢ်မတၤလဲၤဝဲဒၣ်ကတုၤဆိဆူ တၢ်ရိဖှိၣ်ဒၢးလဲၣ်န့ၣ် ယကလဲၤသတြီၤတၢ်ဒီးနၤ” န့ၣ်လီၤ. တကီၢ်ခါန့ၣ် ဝ့(လ) အသးကလၢၢ်ဘၣ်ဝဲလၢ အတၢ်မုၢ်လၢ်ကွၢ်စိအိၣ်ဝဲတမံၤအဃိ, လဲၤဟးဝဲချ့ချ့, ဒီးဃ့ၢ်သတြီၤတၢ်ဒီးအသရၣ်န့ၣ်ဆူ တၢ်ရိဖှိၣ်ဒၢး, ဒီးအဝဲမၤနၢၤတၢ်န့ၣ်လီၤ. လၢခံ, ဝ့(လ) ပာ်ဖျါထီၣ်က့ၤဝဲဒၣ်လၢ “တၢ်မၤအံၤ, မ့ၢ်တၢ်ဟူးတၢ်ဂဲၤအဆံးဖိတမံၤ လၢအထိၣ်ဟူးထိၣ်ဂဲၤထီၣ်ယသး” န့ၣ်လီၤ. တၢ်မုၢ်လၢ်ကွၢ်စိလၢ အထိၣ်ဟူးထိၣ်ဂဲၤအီၤ, ဒီးအတၢ်မၤန့ၢ်မၤနၢၤတၢ်တဖၣ်အံၤ ဒုးအိၣ်ထီၣ်ဝဲ တၢ်မုၢ်လၢ်လၢအဂီၢ်, ဒီးမ့ၢ်တၢ်လီၤကမၢကမၣ်တမံၤ, ဒ်သိးအတၢ်အိၣ်ဆူၣ်အိၣ်ချ့ ကဂ့ၤထီၣ်က့ၤအဂီၢ်, ဒီးမ့ၢ်တၢ်အကါဒိၣ်ဝဲဒၣ်န့ၣ်လီၤ.
တၢ်အိၣ်ဒီးတၢ်မုၢ်လၢ်ကွၢ်စိလီၤတံၢ်လီၤဆဲး အတၢ်စိတၢ်ကမီၤအဂ့ၢ်န့ၣ် ပှၤတၢ်မၢဖိ စီၤပီလူး သ့ၣ်ညါနၢ်ပၢၢ်ဝဲဒၣ်န့ၣ်လီၤ. အဝဲစံးဘၣ်တဲဘၣ် ပှၤစူၢ်က့ၤနာ်က့ၤတၢ်ဖိတဖၣ်လၢ “ယအဲၣ်ဒိးသ့ၣ်ညါခရံာ်” (ဖံ ၃:၁၀) န့ၣ်လီၤ. စီၤပီလူး အဲၣ်ဒိးသ့ၣ်ညါ ကစၢ်ယ့ၣ်ရှူး အတၢ်ဂဲၤဆၢထၢၣ်သမူထီၣ်က့ၤ အတၢ်စိတၢ်ကမီၤ, ဒ်သိးဒီးအဝဲကလီၤဂာ်အါထီၣ်ဒီးကစၢ်ခရံာ်အဂီၢ်, မ့ၢ်လၢတၢ်စိတၢ်ကမီၤအံၤ, ကမၤစၢၤအီၤအဃိန့ၣ်လီၤ. ဒ်သိးကတုၤဃီၤဝဲဒၣ်ဆူ တၢ်တိာ်အံၤအဂီၢ်, စီၤပီလူး ပိာ်ထွဲဝဲ ကျဲကူၣ်နၢၤတမံၤ, “ယပာ်သးပ့ၤနီၣ်ယသးလၢ တၢ်အိၣ်လၢယလီၢ်ခံ, ဒီးယယူာ်ဃီၤယသးဆူ တၢ်အိၣ်လၢယမဲာ်ညါ, ဒီးယဃ့ၢ်သဘျိၣ်ဆူ တၢ်ပနီၣ်အအိၣ်, ဒ်သိးယကန့ၢ်ဘၣ်တၢ်ဘျုးဘၣ်ဃးဒီးယွၤအတၢ်ကိးထီၣ်ထီလၢယ့ၣ်ရှူးခရံာ်အပူၤ” (:၁၃-၁၄) န့ၣ်လီၤ. မ့ၢ်နသးကလၢၢ်ဘၣ်လၢ နအိၣ်ဒီးတၢ်လီၤတူၢ်လီၤကာ်တမံၤမံၤဧါ. “ဖဲဒၣ်ပန့ၢ်ဘၣ်တၢ်လံန့ၣ် ” ပလဲၤတၢ်လၢခရံာ်အပူၤအသိး (:၁၆), ဒ်သိးပကပာ်ဖှိၣ်ပညိၣ်က့ၤ ပတၢ်မုၢ်လၢ်ကွၢ်စိတဖၣ်အဂီၢ်န့ၣ် ကစၢ်ယွၤ ကမၤစၢၤပှၤန့ၣ်လီၤ.
လၢတၢ်န့ၣ်အဃိ, စီၤပီလူး အတၢ်မုၢ်လၢ်ကွၢ်စိန့ၣ် တမ့ၢ် တၢ်ပာ်ဖှိၣ်ပညိၣ်ဝဲဒၣ်လၢဟီၣ်ခိၣ်အတၢ်ထူးတၢ်တီၤန့ၣ်ဘၣ်. “ပတၢ်ဝ့ၢ်ဖိအလီၢ်ဘၣ်ဃးဒီးမူခိၣ်” (:၂၀) န့ၣ် စီၤပီလူး သ့ၣ်ညါဝဲဒၣ်န့ၣ်လီၤ. ခီဖျိလၢတၢ်ထံၣ်အထူအယိာ်တမံၤအံၤ, ပဃုထံၣ်န့ၢ် တၢ်မုၢ်လၢ်အသီ, ဒ်သိးပကဂုၤထီၣ်ပသီထီၣ်လၢကစၢ်ခရံာ်အပူၤန့ၣ်လီၤ.