မုၢ်ဃ့ၢ်လီၤတနံၤန့ၣ် ဖဲယမၤလိဃုသ့ၣ်ညါ တၢ်အံးထွဲကွၢ်ထွဲ ကနဲအထၢတဖၣ်ဒ်လဲၣ်အကတီၢ်, ပှၤသးပှၢ်လၢအတၢ်လဲၤခီဖျိအိၣ်ဝဲဒၣ် လၢတၢ်ဘုၣ်ကနဲတဂၤ, စံးဘၣ် တဲဘၣ်ယၤ “ကးဘၢက့ၤ, ယထံၣ်ဘၣ်တၢ်အံၤ ဘျဲလၢယဂီၢ်လံ” န့ၣ်လီၤ. ယဟူးဂဲၤ ဖံးမၤတၢ်န့ၣ် ချ့ဝဲ, ဆူၣ်ဝဲၤအဃိ, ကဲထီၣ်တၢ်ထိၣ်ဟူးထိၣ်ဂဲၤထီၣ်ကနဲတဖၣ်, ဒီးကနဲ ဒီဖုဒီဂီၢ်န့ၣ် ဟဲယူၤဝးတရံး လၢယခိၣ်န့ၣ်လီၤ. ယဂုာ်ကျဲးစၢးကဟုကယာ်အဝဲသ့ၣ်ဒၣ်လဲာ်, တၢ်လၢယမၤတဖၣ်န့ၣ် ကဲထီၣ် တၢ်လၢအမၤသးထီၣ်အဝဲသ့ၣ်န့ၣ်လီၤ. ယတံၤသကိးတဂၤအံၤ, ဟူးဂဲၤဝဲ ကပုာ်လုာ်ကဖီလီဖိ, ဖျါဝဲဒ်အသုတမၤတံာ်တာ် ကနဲတဖၣ်အသိး, ဒီးဒုးသ့ၣ်ညါယၤလၢ ပတၢ်ဟူးတၢ်ဂဲၤတဖၣ် ကဘၣ်မ့ၢ်ဝဲ “ကပုာ်လုာ် ကဖီလီဖိ,” န့ၣ် မ့ၢ်တၢ်မၤအကါဒိၣ်တမံၤအဂ့ၢ်န့ၣ်လီၤ. နံၣ်တဖၣ်လဲၤပူၤကွံာ်ဝံၤ, ခ့ခါ အကတီၢ်, ဖဲယလဲၤကွၢ်ထွဲ ကနဲအထၢတဖၣ် တဘျီလၢ်လၢ်န့ၣ် ယတၢ်ဟူးတၢ်ဂဲၤတဖၣ်, ဘျ့ကဆှီဂ့ၤဒိၣ်ထီၣ်ဝဲ, ဒီးယမါဒၣ်လဲာ်, စံးဘၣ်ယၤလၢ ယလီၤဂာ် ဒ်ပှၤဂဲၤကလံၣ်တၢ်ဖိတဂၤအသိးန့ၣ်လီၤ.

ဘၣ်တဘျီဘျီ, ပစံးကတိၤသကိးတၢ်အကတီၢ်, ပအိၣ်ဒီးတၢ်ဂ့ၢ်ကီတဖၣ်န့ၣ် လီၤဂာ်ဝဲဒၣ်လၢ ပဂဲၤကလံၣ်ဒီးကနဲတဖၣ်န့ၣ်လီၤ. ဖဲပှၤဂုၤပှၤဂၤတဖၣ် အသးဟးဂီၤ, ဒီးအသးတူၢ်ဘၣ်တၢ် တမုာ်တလၤအကတီၢ်, တၢ်စံးဆၢတဲဆၢက့ၤတၢ် လၢတၢ်သးထီၣ်အပူၤန့ၣ် ကမ့ၢ်တၢ်မၤအၢမၤနးအါထီၣ် တၢ်အိၣ်သးတဖၣ်န့ၣ်လီၤ. ဒ်စီၤပၤစီၤရှလိၤမိၤ ပာ်ဖျါဝဲအသိး, “စံးဆၢတၢ်မုာ်မုာ်န့ၣ် ဘိးဃၣ်ကွံာ် တၢ်သးထီၣ်လီၤ. မ့မ့ၢ် တၢ်ကတိၤဆါန့ၣ် ထိၣ်ဂဲၤတၢ်သးထီၣ်” (ကတိၤ ၁၅:၁) န့ၣ်လီၤ. ဒ်သိးပကမၤလိန့ၢ် တၢ်စံးကတိၤတၢ်ကပုာ်လုာ်ဖိ, ဒီးမုာ်မုာ်ခုၣ်ခုၣ်ဆူ ပှၤလၢအသးတံာ်တာ်သ့, (မ့) ပှၤသူၣ်အၢသးအၢလၢအတၢ်ဂ့ၢ်တၢ်ကျိၤလီၤဆီ တအိၣ်တဖၣ်အဂီၢ်, ပကဘၣ် ဟ့ၣ်တၢ်ဆၢကတီၢ်န့ၣ်လီၤ. အဂ့ၢ်ဒ်အံၤ, တၢ်ဆီၣ်လီၤသး မ့ၢ်သးအတၢ်သၣ်တမံၤ, ဒီးမၤတၢ်လၢပပူၤအဃိ, (ကွၢ်ဖဲ ကလၤ ၅:၂၂-၂၃), ခီဖျိလၢကစၢ်ယွၤ အတၢ်မၤစၢၤန့ၣ် ပဂုၤထီၣ်ပသီထီၣ် သ့ဝဲဒၣ်န့ၣ်လီၤ.

လၢယမုၢ်နံၤမုၢ်သီတဖၣ်အံၤအပူၤန့ၣ် ဖဲယလဲၤဆူ ကနဲအထၢအကပၤ, (မ့) ဖဲလၢ ယကဘၣ်စံးကတိၤသကိး တၢ်ဂ့ၢ်အကီအခဲအကတီၢ်တဘျီလၢ်လၢ်, ဒ်သိးယကအိၣ်ဒီးတၢ်ကူၣ်သ့, ဒီးတၢ်ဆီၣ်လီၤသးအဂီၢ်န့ၣ် ယမၤလိ, ဃ့ထုကဖၣ်ယဲန့ၣ်လီၤ. ဖဲပအိၣ်ဒီးတၢ်အကတီၢ်ကီခဲတဖၣ်အပူၤန့ၣ် ပမ့ၢ်လဲၤတၢ်ဒီးကစၢ်ယွၤန့ၣ်ဒီး, “တၢ်မၤစၢၤလၢ တၢ်ကီတၢ်ခဲအကတီၢ်” (စံး ၄၀:၁) န့ၣ် အိၣ်ဘူးဒီးပှၤထီဘိန့ၣ်လီၤ.