လၢ New Mexico ကီၢ်စဲၣ်, Santa Fe အဝ့ၢ်န့ၣ် ပှၤကညီလၢအကထိတဖၣ် ပာ်ဖှိၣ်ထီၣ်အသး ကိးနံၣ်ဒဲး, ဒ်သိးကဒွဲၣ်ဃိဝဲဒၣ် စိၣ်စိၣ်ဘရၣ် (Zozobra), အတၢ်ဂီၤ စိးပျၤ, အိၣ်ဆၢထၢၣ် အထီကအိၣ်ဝဲဒၣ် လွံၢ်ဆံ ခီၣ်ယီၢ်န့ၣ်လီၤ. လၢတၢ်ဂီၤအပူၤန့ၣ် ပှၤဂီၢ်မုၢ်တဖၣ် တ့ၢ်နုာ်ဝဲဒၣ် လံာ်က့လၢအပာ်ဖျါထီၣ် အတၢ်ဘၣ်ယိၣ်ဘၣ်ဘီတဖၣ်, အဒ့ၣ်ကမၢ်တဖၣ်, ဒီးအတၢ်ပီၢ်ယၢ်လီၤက့ၤသးတဖၣ်န့ၣ်လီၤ. အဝဲသ့ၣ် မုၢ်လၢ်ဝဲလၢ မ့ၣ်အူလၣ်တဖၣ် ကအီၣ်လၢာ်စီကွံာ် အတၢ်ကိၢ်တၢ်ဂီၤတဖၣ်, အတၢ်ကီတၢ်ခဲတဖၣ်, ဒီး ကမၤဂ့ၤထီၣ်က့ၤ အတၢ်အိၣ်မူအိၣ်ဂဲၤအဂီၢ်, ကိးပသူထီၣ်ဝဲဒၣ်လၢ “ဒွဲၣ်ကဲၤထီၣ်အီၤ လၢမ့ၣ်အူ” န့ၣ်လီၤ. တၢ်ဘူၣ်တၢ်ဘါလုၢ်လၢ်တမံၤအံၤ ဆဲးကပီၤဖျါက့ၤ ပှၤဟီၣ်ခိၣ်ဖိ တဖၣ် ဆၢမုၢ်လၢ် မၤစီကွံာ် အတၢ်ပျံၤဘၣ်ယိၣ်တၢ်, အတၢ်မဲာ်ဆှးတဖၣ်, ဒီးအတၢ်လီၤတူၢ်လီၤကာ်တဖၣ် ဒိၣ်ဒိၣ်ယိာ်ယိာ်ထဲလဲၣ်န့ၣ်လီၤ. တၢ်မၤအံၤ, မ့ၢ်တၢ်လီၤကမၢကမၣ် ဘၣ်ဆၣ်, အတၢ်စိတၢ်ကမီၤ တအိၣ်ဘၣ်. မ့ၣ်အူအီၣ်မၤဟးဂီၤသ့ဝဲဒၣ် လံာ်က့ဖိတဖၣ်, ဒီးဖၣ်ကမူၣ်ဖၣ်ဆါန့ၣ်လီၤ. တၢ်ဒဲးဘး, ဒီးတၢ်မဲာ်ဆှးန့ၣ် မၤစီကွံာ်ဝဲ တန့ၢ်တသ့ဘၣ်န့ၣ်လီၤ.
ပှၤတၢ်မၢဖိ စီၤပီလူး ကွဲးပာ်ဖျါဝဲလၢ “ဒ်သိးပှၤသုတအိၣ်ဝဲတဂၤဂၤလၢ အကစိာ်ကွံာ် သုသးလၢ တၢ်အဲၣ်ဒိးတၢ်သ့ၣ်ညါ, ဒီးတၢ်လီတၢ်ကလီကလီ, ဒ်ပှၤကညီစံးစိၤတဲစိၤတၢ်, ဒ်ဟီၣ်ခိၣ်အမိၢ်ပှၢ်အသိး, ဒီးတမ့ၢ်ဘၣ်ဒ်ခရံာ်အသိးန့ၣ်တဂ့ၤဒီး, ပလီၢ်သုသးတက့ၢ်” (ကလီး ၂:၈), ဒီးဟ့ၣ်ပလီၢ် ပှၤဖးလံာ်ဖိတဖၣ် ဒ်သိးအသုတဆါလီၤအီၣ် ကစၢ်ယ့ၣ်ရှူး လၢတၢ်အလုၢ်အပှ့ၤတအိၣ်တဖၣ်တဂ့ၤန့ၣ်လီၤ. အဂ့ၢ်ဒ်အံၤ, ကစၢ်ခရံာ် “မ့ၢ်ယွၤ, လၢပှၤထံၣ်အီၤ တသ့ဘၣ်တဂၤ အက့ၢ်အဂီၤ” (၁:၁၅), အိၣ်ထီၣ်ထီလၢ တၢ်ဘၣ်တ့ခဲလၢာ် အဖီခိၣ် (၁:၁၆), ယွၤအလၢအပှဲၤ လၢပှၤကညီအနီၢ်ခိနီၢ်ခီ (၂:၉), လၢအမ့ၢ်တၢ်အဒိၣ်
အခိၣ်, ဒီးတၢ်အစိအကမီၤခဲလၢာ်အခိၣ် (၂:၁၀) န့ၣ်လီၤ. “ပဂံၢ်စဲၤလီၤ, ဒီးပဘၣ်တၢ်မၤထီၣ်မၤထီပှၤလၢအပူၤ” (:၇) ခီဖျိလၢအတၢ်သံ, ဒီးအတၢ်ဂဲၤထၢၣ်သမူထီၣ်က့ၤအပူၤ, ဒီးအဝဲဒၣ် မၤမူထီၣ်ပှၤ, ဒီးပျၢ်ကွံာ် ပတၢ်ကမၣ်ခဲလၢာ် (:၁၃) န့ၣ်လီၤ. ပှၤကညီတဖၣ် အလုၢ်လၢ်ဆဲးလၤ မူးပွဲတဖၣ် ထုးန့ၢ် ပှၤဂီၢ်မုၢ်အသး သ့ဝဲဘၣ်ဆၣ်, တၢ်မၤပူၤဖျဲးပှၤလၢ တၢ်ဒဲးဘး အဒ့ၣ်ကမၢ်, ဒီးတၢ်ဒဲးဘး အတၢ်ဟံးဃာ်ပှၤအဂီၢ်န့ၣ် ထဲကစၢ်ယ့ၣ်ရှူး တဂၤဧိၤ, မၤစီကွံာ်ဝဲသ့န့ၣ်လီၤ.
လၢတၢ်ဟ့ၣ်လီၤ ပတၢ်ဝံဃၢတဖၣ်ဆူ တၢ်ဘူၣ်တၢ်ဘါအလုၢ်လၢ်, ဒီးပှၤကညီစံးစိၤတဲစိၤတၢ်အလီၢ်န့ၣ် မ်ပကဟ့ၣ်လီၤဆူ ကစၢ်ခရံာ်န့ၣ်တက့ၢ်. ထဲဒၣ်အဝဲတဂၤဧိၤ, ကမၤပူၤ မၤဖျဲးပှၤလၢ တၢ်စၢဃာ်, ဒီးကမၤပှဲၤပှၤလၢ တၢ်မုၢ်လၢ်န့ၣ်လီၤ.