ယမံၤပှၢ် ကၠ့(မ) (Jim) မ့ၢ် ပှၤခးကျိလၢ သုးအကဘီယူၤလၢအဘၣ်ဟးတ့ၢ်လီၤမ့ၣ်ပိၢ်, လၢယူရပၤ အထံကီၢ်တဖၣ် ဖဲတၢ်ဒုးခံဘျီတဘျီအကတီၢ်န့ၣ်လီၤ. ဖဲဒုၣ်ဒါ ခးလီၤတဲာ် အကဘီယူၤ, ဒီးဖီၣ်န့ၢ်အီၤ, ဒီးဘၣ်အိၣ်ဝဲ ဒ်ပှၤဃိာ်ဒဲဖိတဂၤ (Prisoner of war) အသိး, တဘျုးလါန့ၣ်လီၤ. ကၠ့(မ) န့ၣ် တညီနုၢ်စံးကတိၤ အတၢ်လဲၤခီဖျိဘၣ်ဆၣ်, ပှၤသ့ၣ်ညါအီၤတဖၣ် စံးဝဲဒၣ်လၢ တချုးအဝဲလဲၤနုာ်လီၤသုးန့ၣ် ကၠ့(မ) မ့ၢ်ပှၤသးစၢ်တဂၤလၢ အသူၣ်ဖှံသးညီ, အိၣ်ဒီးမဲာ်မုာ်နါဆၢန့ၣ်လီၤ. အတၢ်လဲၤခီဖျိလၢတၢ်ဒုးတၢ်ယၤန့ၣ် လဲလိာ်က့ၤအီၤဆူပှၤသူၣ်အၢသးသီ, တမၤဘၣ်ထွဲလိာ်အသးဒီးပှၤဂုၤပှၤဂၤလၢၤဘၣ်န့ၣ်လီၤ.
လၢတၢ်ဂုာ်ကျဲးစၢး ဃုနၢ်ပၢၢ်အတၢ်လဲၤခီဖျိအဂီၢ်, ယဖးကွၢ် “ပှၤသုးဖိတဖၣ်လၢ အဒုးတၢ်လၢကလံၤကျါ” (Masters of the Air) ဘၣ်ထွဲဒီးကဘီယူၤအတၢ်ဒုးတၢ်ယၤ လၢကီၢ်ယူရပၤ အထံကီၢ်တဖၣ်, ဘၣ်တၢ်ကွဲးအီၤလၢ ဒီနၢၣ် မ့လၢၢ် (Donald Miller) န့ၣ်လီၤ. မ့လၢၢ် အလံာ်န့ၣ် မၤစၢၤယၤ, ဒ်သိးယကသ့ၣ်ညါအါထီၣ် ကဘီယူၤအပှၤသုးဖိတဖၣ် ဘၣ်ဟ့ၣ်လီၤဝဲ အနီၢ်ခိ, ဒီးနီၢ်သးအလုၢ်အပှ့ၤတဖၣ်န့ၣ်လီၤ. မ့လၢၢ် အလံာ်န့ၣ် မၤအါထီၣ်ဝဲဒၣ် ယတၢ်သူၣ်ကညီၤသးကညီၤ လၢယမံၤပှၢ်အဖီခိၣ်န့ၣ်လီၤ.
ပှၤကွဲးလံာ်ဧ့ၤဘြံၤ ကွဲးပာ်ဖျါဝဲဒၣ်လၢ “ပအိၣ်ဒီးပှၤလုၢ်တၢ်အခိၣ်ဖးဒိၣ်” (၄:၁၄). ကစၢ်ယ့ၣ်ရှူး, လၢအသ့ၣ်ညါ ပဂုာ်ကျဲးစၢးဂဲၤလိာ်တၢ်တဖၣ်, အါန့ၣ်အန့ၢ်, အနီၢ်ကစၢ်
ဒၣ်ဝဲန့ၣ် ဘၣ်ဂုာ်ဂဲၤလိာ်ဝဲစ့ၢ်ကီးန့ၣ်လီၤ. အဝဲအိၣ်ဒီးပှၤ, ဃုသ့ၣ်ညါဝဲ တၢ်လၢပတူၢ်ဘၣ်ခီၣ်ဘၣ်တၢ်တဖၣ် လၢပတၢ်အိၣ်အသးကိးမံၤဒဲးအပူၤန့ၣ်လီၤ. လံာ်ဧ့ၤဘြံၤ စံးဘၣ်ပှၤလၢ “ပအိၣ်ဒီးပှၤလုၢ်တၢ်အခိၣ်လၢ အသးကညီၤပဂံၢ်စၢ်ဘါစၢ်တသ့ဘၣ်န့ၣ်, တမ့ၢ်ဘၣ်. မ့ၢ်အဘၣ်တၢ်လ့ပစီကိးအမံၤဒဲး, ဒ်ပဝဲအသိးန့ၣ်ဘၣ်ဆၣ်ဒီး, အတၢ်ဒဲးဘးတအိၣ်ဘၣ်” (ဧ့ၤ ၄:၁၅) န့ၣ်လီၤ. ဆိကမိၣ်ထီၣ်နဲလၢ ပတူၢ်ဘၣ်ခီၣ်ဘၣ်တဖၣ်န့ၣ် ကစၢ်ယ့ၣ်ရှူး သ့ၣ်ညါဝဲန့ၣ်လီၤ. ဒ်ပဘၣ်တၢ်လ့ပစီပှၤအသိး, အဝဲစ့ၢ်ကီး ဘၣ်တၢ်လ့ပစီအီၤန့ၣ်လီၤ.
တၢ်ဃုမၤလိန့ၢ် ပကအိၣ်ဒီးသးလၢ အသူၣ်ကညီၤသးကညီၤတၢ် ဒ်ကစၢ်ယ့ၣ်ရှူးအသိးန့ၣ် မ့ၢ်ကျဲဖးဒိၣ်တဘိလၢ ပကဒုးနဲၣ် အတၢ်အဲၣ်တၢ်ကွံဆူ ပှၤလၢအလိၣ်ဘၣ်အီၤတဖၣ်န့ၣ်လီၤ. ခီဖျိလၢအသးမုၢ်စီဆှံန့ၣ် မ်ကစၢ်ယွၤ ကဟ့ၣ်လီၤပှၤ သးလၢအသ့ၣ်ညါရ့လိာ်သးဒီးပှၤဂုၤပှၤဂၤ, လၢတၢ်အဲၣ်တၢ်ကွံ, ဒီးလၢတၢ်သးကညီၤအပူၤန့ၣ်တက့ၢ်.