ဟါရၢၣ် မူဒံၢ် (Harold Moody) မ့ၢ်ဝဲဒၣ် ကသံၣ်သရၣ်တဂၤ, ဒီးအနီၢ်ကစၢ်ဒၣ်ဝဲန့ၣ် အပှၤတဝၢဖိတဖၣ် မ့ၢ်တတူၢ်လိာ်အီၤဘၣ်ဆၣ်, ပှၤဆါတနီၤ မ့ၢ်ဟ့ၣ်အီၤအဘူးအလဲ မ့ၢ်တန့ၢ်ဒၣ်လဲာ်, တပျဲပျၢ်ကွံာ် ပှၤဆါနီတဂၤ, နီတဘျီဘၣ်န့ၣ်လီၤ. လၢကသံၣ်ကသီ အတၢ်မၤလိအပူၤန့ၣ် ဟါရၢၣ် မူဒံၢ် မ့ၢ်ပှၤဖျိးစိတဂၤဘၣ်ဆၣ်, မ့ၢ်လၢအဖံးဘ့ၣ် အလွဲၢ်အဃိ, တၢ်ဆါဟံၣ်လၢ ဝ့ၢ်လိဒိၣ် (London) တဖၣ်န့ၣ် တဒိးလဲအီၤ နီတဖျၢၣ် ဘၣ်န့ၣ်လီၤ. လၢတၢ်န့ၣ်အဃိ, ဖဲ ၁၉၁၃ နံၣ်န့ၣ် အိးထီၣ်ဝဲဒၣ် တၢ်ကူစါယါဘျါ အတၢ်မၤလၢအဟံၣ်, ကွၢ်ထွဲကူစါ ပှၤဖှီၣ်ဖိယာ်ဖိတဖၣ်တလီၢ်လီၢ်, ဒီးတဟံးန့ၢ်ဝဲကျိၣ်စ့ဘၣ်န့ၣ်လီၤ. ဒီးကထၢၣ် ဟါရၢၣ် မူဒံၢ် ဟ့ၣ်လီၤအသးလၢ တၢ်မၤဂ့ၤမၤစၢၤ ပှၤလၢအဘၣ်တၢ်လဲၤကပာ်သ့ၣ်တဖၣ်အဃိ, ပှၤကိးအီၤလၢ မၣ်တ့ၣ် လူၣ်သၢၣ်ခ့ လၢ ကီၢ် ဘရံၣ်တ့ၣ် (Britain’s Martin Luther King) န့ၣ်လီၤ.
ပတၢ်အိၣ်မူန့ၣ် တမ့ၢ်လၢပှၤကဘၣ်ဆၢတဲာ်အီၤ, ခီဖျိလၢပှၤဂၤအတၢ်လဲၤကပာ်ပှၤဘၣ်အဂ့ၢ်န့ၣ် ဒီးကထၢၣ် မူဒံၢ် ဒုးနဲၣ်ပာ်ဖျါဝဲဒၣ်န့ၣ်လီၤ. တၢ်မ့ၢ်တၢ်တီတမံၤအံၤ, ယွၤအကလုၢ်ကထါ ပာ်ဖျါစ့ၢ်ကီးဝဲလၢ စီၤယံးဖသၤအဂ့ၢ်အပူၤန့ၣ်လီၤ. စီၤယံးဖသၤ န့ၣ်မ့ၢ် ပှၤသုးဖိ အဒူအဃိၤတဂၤဘၣ်ဆၣ်, အမိၢ်ယၢ်အဖိခွါတဖၣ်န့ၣ် စူးကွံာ်ညိကွံာ်အီၤ, ဒီးနီၣ်ဟးထီၣ်အီၤဆူ တၢ်လီၢ်အိၣ်ယံၤဒီးအဝ့ၢ်န့ၣ်လီၤ. အဝဲသ့ၣ် စံးဘၣ်အီၤလၢ “နတဘၣ်န့ၢ်သါဘၣ် တၢ်လၢပပၢ်အဟံၣ်ပူၤဘၣ်. အဂ့ၢ်ဒ်အံၤ, နမ့ၢ် ပိာ်မုၣ်အဂၤတဂၤ အဖိခွါ” (စံၣ် ၁၁:၂) န့ၣ်လီၤ. လၢတၢ်န့ၣ်အဃိ, “စီၤယံးဖသၤ ဃ့ၢ်တၢ်လၢအဒီပုၢ်ဝဲၢ်အအိၣ်, ဒီးအိၣ်ဝဲဆိးဝဲလၢ ကီၢ်တိာ်အပူၤ” (:၃) န့ၣ်လီၤ.
အဒူၣ်ဖိထၢဖိတဖၣ်န့ၣ် တတူၢ်လိာ်အီၤဘၣ်ဆၣ်, ကစၢ်ယွၤ တစူးကွံာ်ညိကွံာ်အီၤဘၣ်. ဖဲဒုၣ်ဒါတဖၣ် ဟဲဒုးတၢ်ဒီးပှၤအံၣ်စရ့လးဖိတဖၣ်အကတီၢ်, ပှၤဂီၢ်မုၢ်တဖၣ် ဘၣ်ဟဲဃ့တၢ်မၤစၢၤလၢ စီၤယံးဖသၤအအိၣ် (:၄-၆) န့ၣ်လီၤ. ဒီးပှၤဂီၢ်မုၢ်တဖၣ်
စံးဘၣ် စီၤယံးဖသၤ, “ဟဲက့ၤဒီးကဲထီၣ်ပခိၣ်, ဒ်သိးပကဒုးတၢ်ဒီးပှၤဧၣ်မိၣ်ဖိတက့ၢ်” (:၆) န့ၣ်လီၤ. ကစၢ်ယွၤ စူးကါဝဲ, ဒီးမၤစၢၤဝဲ စီၤယံးဖသၤ, ဒ်သိးကမၤနၢၤ ဒုၣ်ဒါတဖၣ် (:၉,၃၂-၃၃), ဒီးလၢခံန့ၣ် ကဘၣ်ပၢဆှၢဝဲ ပှၤအံၣ်စရ့လးဖိတဖၣ် (စံၣ် ၁၂:၇) န့ၣ်လီၤ.
ဖဲပှၤဂၤစူးကွံာ်ညိကွံာ်ပှၤအကတီၢ်, မ်ပကနာ်သန့ၤ, ဒီးဒိကနၣ်ကစၢ်ယွၤထီဘိန့ၣ်တက့ၢ်. တၢ်လၢအကါဒိၣ်ဝဲဒၣ်န့ၣ် မ့ၢ်ကစၢ်ယွၤ ထံၣ်ပှၤဒ်လဲၣ်, ဒီးမ့ၢ်ကစၢ်ယွၤ အဲၣ်ဒိးဝဲဒၣ်လၢ ပကမၤတၢ်မနုၤတမံၤလဲၣ်န့ၣ်လီၤ.
