ဖဲမုၢ်ဟါလီၤခီ ခွံ နၣ်ရံၣ်ဃာ်ဃာ်န့ၣ် ယမိၢ်ကိးယၤ လၢကွဲၤဒီနၢ်, ဒီးစံးဘၣ်ယၤလၢ, “နပၢ်တဂၤ လဲၤပူၤကွံာ် ဟီၣ်ခိၣ်လံ” န့ၣ်လီၤ. လၢတၢ်အါနံၤအါသီအတီၢ်ပူၤန့ၣ် ယမုၢ်လၢ်နၢ်ဟူတ့ၢ်ယဲလံ တၢ်ကစီၣ်အံၤ, ဒီးယသးမုာ်ထီၣ်ဝဲဒၣ်လၢ ယပၢ်တဂၤ တတူၢ်ဘၣ်ခီၣ်ဘၣ် အတၢ်ဆူးတၢ်ဆါလၢၤဘၣ်အဃိန့ၣ်လီၤ. ဘၣ်ဆၣ်, တၢ်ကစီၣ်န့ၣ် မၤဘၣ်ဒိဘၣ်ထံး ယသးအဖၢမုၢ်န့ၣ်လီၤ. နွံလၢ အပိာ်ထွဲထီၣ်အခံတဖၣ်န့ၣ် တၢ်သူၣ်အုးသးအုးဒိၣ်ဒိၣ်ကလဲာ်အပူၤ, ယဟီၣ်ဘ့ၣ်ပှၢ် လၢယပၢ်အဂီၢ်န့ၣ်လီၤ.
ပကတူၢ်လိာ် ပပၢ်တဂၤ လဲၤပူၤကွံာ်ဟီၣ်ခိၣ်န့ၣ် ကမ့ၢ်ဝဲ တၢ်နးတၢ်ဖှီၣ်တမံၤ, လၢပဝဲ ခဲလၢာ်အဂီၢ်န့ၣ်လီၤ. လီၤဆီဒၣ်တၢ်, ယဒူၣ်ဖိထၢဖိတဖၣ်အကျါ, လၢအတမ့ၢ် ပှၤစူၢ်က့ၤနာ်က့ၤတၢ်ဖိတဖၣ်အဂီၢ်, ကကီခဲဝဲဒၣ်န့ၣ်လီၤ. အဝဲသ့ၣ်နၢ်ပၢၢ်ဝဲဒၣ်လၢ ယပၢ်လီၤမၢ်ကွံာ်ဝဲဒၣ် လီၤစိၤလီၤထီလံန့ၣ်လီၤ. လၢတၢ်န့ၣ်အဃိ, ယသ့ၣ်ညါနၢ်ပၢၢ်ဝဲဒၣ်လၢ တၢ်စူၢ်က့ၤနာ်က့ၤ ကစၢ်ယ့ၣ်ရှူးန့ၣ် မၤစၢၤပှၤ ဒ်သိးပကလဲၤခီဖျိ ပတၢ်သူၣ်အုးသးအုးတဖၣ်န့ၣ်လီၤ.
တၢ်ဂ့ၢ်အံၤ, စီၤပီလူး ပာ်ဖျါထီၣ်ဝဲဒၣ်လၢ “အဂ့ၢ်ဒ်အံၤ, ပမ့ၢ်စူၢ်က့ၤနာ်က့ၤလၢ ယ့ၣ်ရှူးသံဝဲ, ဒီးဂဲၤဆၢထၢၣ်က့ၤဝဲဒီး, ပှၤလၢအမံလၢ ယ့ၣ်ရှူးအပူၤတဖၣ်န့ၣ် ယွၤကဒုးဟဲက့ၤထီၣ်အီၤ လၢအသိး, ဒ်န့ၣ်အသိးစ့ၢ်ကီး” (၁ သ့း ၄:၁၄) န့ၣ်လီၤ. တၢ်ကမၤအသးလၢ မုၢ်တနံၤ, ဖဲကစၢ်ခရံာ် ကဟဲလီၤလၢမူခိၣ်, ကထုးဖှိၣ်ပာ်ဖှိၣ်ပှၤ, ဒီး “ကထုးထီၣ်န့ၢ်ပှၤတပူၤဃီဒီး အဝဲသ့ၣ်, ဆူတၢ်အၢၣ်အပူၤ,….. ဒီးပကအိၣ်ဒီးကစၢ်အစိၤစိၤအဃၣ်ဃၣ်” (:၁၆-၁၇) န့ၣ်လီၤ. စီၤပီလူး စံးဘၣ်ပှၤလၢ “ဒ်သိးသုသးသုတအုး, ဒ်ပှၤဂၤလၢအတၢ်မုၢ်လၢ်တအိၣ်ဘၣ်အသိးန့ၣ်တဂ့ၤ” (:၁၃) န့ၣ်လီၤ. ဖဲယသ့ၣ်ညါဝဲဒၣ် ယကထံၣ်ဘၣ်က့ၤ ယပၢ်လၢမူခိၣ်အဂ့ၢ်န့ၣ် ဟဲစိာ်န့ၢ်ဝဲဒၣ် တၢ်မၤမုာ်ထီၣ်က့ၤယသး, လၢယမဲာ်ထံမဲာ်နိအပူၤန့ၣ်လီၤ.
တၢ်လီၤမၢ်လၢ အပူၤဒီးတၢ်သူၣ်အုးသးအုးအဂ့ၢ်န့ၣ် ကစၢ်ယွၤ အကလုၢ်ကထါ တပာ်ဖျါဝဲဒၣ်နီတဘျီဘၣ်. အတံၤသကိးလၢ အသံတ့ၢ်ဝဲတဂၤ, ကဟဲက့ၤမူထီၣ်ဝဲဒၣ် အဂ့ၢ်န့ၣ် ကစၢ်ယ့ၣ်ရှူး သ့ၣ်ညါဝဲဘၣ်ဆၣ်, အမဲာ်ထံလီၤဝဲ (ယိၤ ၁၁:၃၄-၄၄) န့ၣ်လီၤ. ဘၣ်တဘျီဘျီ, ပှၤလၢပအဲၣ်ဘၣ်အီၤတဂၤ, တချုးသံန့ၣ် မ့ၢ်အနာ်ဝဲဒၣ် တၢ်မနုၤလဲၣ်န့ၣ် ပတသ့ၣ်ညါဘၣ်. ဘၣ်ဆၣ်, ပတၢ်သူၣ်အုးသးအုးန့ၣ် အိၣ်ဒံးဝဲဒီးတၢ်မုၢ်လၢ်အဖၢမုၢ် န့ၣ်လီၤ. မ့ၢ်လၢ ပကစၢ်ယ့ၣ်ရှူးခရံာ်အဃိ, ပှၤလၢပအဲၣ်ဘၣ်အီၤတဖၣ်န့ၣ် ပကထံၣ်ဘၣ် ကဒီးတဘျီဒံး, ဒီးကယဲၢ်တၢ်ခဲလၢာ်န့ၣ် ပနာ်န့ၢ်ဟ့ၣ်လီၤအးလီၤ သ့ဝဲဒၣ်ဆူ ကစၢ်ယ့ၣ်ရှူး အတၢ်ကဟုကယာ်အစုပူၤန့ၣ်လီၤ.