ဖဲယမ့ၢ်ဖိသၣ်ဆံးအကတီၢ်, မုၢ်အခီၣ်ထံးနံၤ ကိးနွံဒဲး, တၢ်လဲၤဘါဂီၤ, ဒီးဟါတၢ်ဘါအဂီၢ်န့ၣ် ယလဲၤပိာ် ယဟံၣ်ဖိဃီဖိအခံဆူ တၢ်ဘါသရိာ် လၢတၢ်သးခုအပူၤန့ၣ်လီၤ. ပတၢ်အိၣ်ဖှိၣ် သရၣ်န့ၣ် ပာ်ဖျါထီၣ်ဝဲ အတၢ်သးခုဖျိဖျိဖျါဖျါ, ဒီးထီဘိန့ၣ် တူၢ်လိာ်ဝဲဒၣ် ဖိသၣ်တဖၣ်လၢ တၢ်ဘူၣ်တၢ်ဘါအပူၤ, ဒီးဟ့ၣ်ဂံၢ်ဟ့ၣ်ဘါ ယတၢ်ကွဲးဖိတဖၣ်ဒၣ်လဲာ်န့ၣ်လီၤ. မုၢ်အိၣ်ဘှံးနံၤ တၢ်မၤလိသရၣ်, သရၣ်မုၣ်တဖၣ်, ဒီးတၢ်အိၣ်ဖှိၣ်သရၣ်န့ၣ် သူၣ်လီၤန့ၢ်ယၤ တၢ်အဲၣ်ယွၤ ကလုၢ်ကထါဆူ ယသးကံၢ်ပူၤန့ၣ်လီၤ. ဒီးမုၢ်အိၣ်ဘှံးနံၤ ဟါတၢ်ဘါတဖၣ်န့ၣ် သရၣ်တမှံၤ လၢအဟဲစံၣ်တဲၤတဲလီၤတၢ်တဖၣ် (မ့) ပှၤစိာ်တၢ်သးခုကစီၣ်တဖၣ် အတၢ်ကတိၤတဖၣ်န့ၣ် ထိၣ်ဟူးထိၣ်ဂဲၤထီၣ်ယသး လၢယကမၤ တၢ်သးခုကစီၣ်အတၢ်မၤန့ၣ်လီၤ. ပတၢ်အိၣ်ဖှိၣ်အမံၤ, ဒ်ပတၢ်အိၣ်ဖှိၣ်သရၣ် ပညိၣ်ဆိကမိၣ် ဒုးအိၣ်ထီၣ်ဝဲ, “တၢ်အိၣ်ဖှိၣ်လၢ အအဲၣ် တၢ်ရ့လိာ်မုာ်လိာ် လၢ ခိ(လ)ဝါထၢၣ် အကျဲ (Coldwater Road)” န့ၣ် ကြၢးဝဲဘၣ်ဝဲနီၢ်နီၢ် န့ၣ်လီၤ. ကယဲၢ်တၢ်ခဲလၢာ်န့ၣ် လၢဝဲပှဲၤဝဲဒၣ်လၢာ်လၢာ်ဆ့ဆ့ဘၣ်ဆၣ်, ပရ့လိာ်မုာ်လိာ်ပသး ဒ်ဟံၣ်ဖိဃီဖိတဖၣ်န့ၣ်လီၤ. စးထီၣ်လၢမုၢ်တနံၤအံၤန့ၣ်, ယကဃုထံၣ်န့ၢ် တၢ်ဘါသရိာ်အကြၢး အဘၣ်တဖျၢၣ်အဂီၢ်, တၢ်ဂ့ၢ်ကီမ့ၢ်အိၣ်ဝဲဒၣ်လဲာ်, ယလဲၤဘါယွၤ လၢတၢ်ဘါသရိာ်ထီဘိအဃိ, ယန့ၢ်ဂံၢ်န့ၢ်ဘါသူၣ်ဆူၣ်သးဂဲၤယဲ, ဒီးယတၢ်စူၢ်တၢ်နာ် ဒိၣ်ခိၣ်အါထီၣ်ဝဲဒၣ်န့ၣ်လီၤ.
ဒ်ခ့ခါအကတီၢ်, တၢ်အိၣ်အသး, မၤအသးတဖၣ်ဒီးပှၤအသိး, တၢ်အိၣ်ဖှိၣ်ကဲထီၣ်သီ, ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် လိၣ်ဘၣ်ဝဲ တၢ်ဆီၣ်ထွဲမၤစၢၤ, ဒီးတၢ်ဟ့ၣ်ဂံၢ်ဟ့ၣ်ဘါ, ဒီးပှၤစူၢ်က့ၤနာ်က့ၤ တၢ်ဖိကဒဲကဒဲ ပာ်ဖှိၣ်ရ့လိာ်သကိးသး မ့ၢ်တၢ်အကါဒိၣ်တမံၤ (မၤ ၂:၄၆) အဂ့ၢ်န့ၣ် အဝဲသ့ၣ်နၢ်ပၢၢ်ဝဲဒၣ်န့ၣ်လီၤ. အဝဲသ့ၣ်မ့ၢ်ဝဲဒၣ် ဒူၣ်ဖိထၢဖိတဒူၣ်, ဖဲတၢ်အိၣ်မူအိၣ်ဂဲၤ, ဒီးတၢ်မၤယွၤ အတၢ်မၤန့ၣ် ကီဝဲခဲဝဲဒၣ်အကတီၢ်, အဝဲသ့ၣ် ဟ့ၣ်ဂ့ၢ်ဟ့ၣ်ဘါလိာ်သးသကိးသကိးန့ၣ်လီၤ. ပာ်ဖှိၣ်ထီၣ်သး ဒ်သိးကဃ့ထုကဖၣ်တၢ်, ကမၤလိန့ၢ် ယွၤကလုၢ်ကထါ, ကစံးထီၣ်ပတြၢၤယွၤ, ကရ့လိာ်မုာ်လိာ်သကိး, ဒီးအီၣ်အီသကိးတၢ်အဂီၢ် (:၄၂) န့ၣ်လီၤ. အကတၢၢ်အစၢန့ၣ် ကစၢ်ယွၤ မၤဒိၣ်ထီၣ်အါထီၣ် အဝဲသ့ၣ်အနီၢ်ဂံၢ် (:၄၇) န့ၣ်လီၤ.
တၢ်ဃုထံၣ်န့ၢ် ခရံာ်အတၢ်အိၣ်ဖှိၣ် လၢတၢ်ပာ်သူၣ်ပာ်သး လီၤပလိာ်အသးအဂီၢ်န့ၣ် ပကဘၣ်ဟ့ၣ်တၢ်ဆၢကတီၢ်, ဒီးမ့ၢ်တၢ်အကါဒိၣ်တမံၤန့ၣ်လီၤ. ပကလဲၤခီဖျိကွၢ်ဆၢၣ်မဲာ် ပတၢ်အိၣ်မူအိၣ်ဂဲၤလၢ ပနီၢ်ကစၢ်ဒၣ်ဝဲန့ၣ် တၢ်ဂ့ၢ်ကီအိၣ်ဝဲဒၣ်အဃိ, ကစၢ်ယွၤ ကတဲာ်ကတီၤန့ၢ်ပှၤ ဟံၣ်ဖိဃီဖိတဖၣ်, ဒီးပှၤစူၢ်က့ၤနာ်က့ၤတၢ်ဖိ အပှၤတဝၢတဖၣ်န့ၣ်လီၤ. ခရံာ်အတၢ်အိၣ်ဖှိၣ်န့ၣ် မ့ၢ်တၢ်လီၢ်အဂ့ၤကတၢၢ်, လၢတၢ်ကဒုးအိၣ်ထီၣ် ပှၤစူၢ်က့ၤနာ်က့ၤတၢ်ဖိ အပှၤတဝၢအဂီၢ်န့ၣ်လီၤ.