ဖဲယသးအိၣ် ခံဆံဃုနံၣ်အကတီၢ်, ယဆ့ၣ်နီၤလၢတၢ်မၤလိ လံာ်စီဆှံဒၢးန့ၣ်ဒီး, ယသးဘၣ်တံာ်တာ်ဝဲဒၣ်န့ၣ်လီၤ. ပှၤမၤလိသကိးတၢ်ဖိတနီၤ ပာ်ဖျါထီၣ်အတၢ်ထံၣ်တဖၣ်န့ၣ် မၤဟးဂီၤယသးန့ၣ်လီၤ. ဖျါလၢအဝဲသ့ၣ် အိၣ်ဒီးတၢ်ဂ့ၢ်ကီတဖၣ်အါမးန့ၣ်လီၤ. ယသံကွၢ်အဝဲသ့ၣ်လၢ “ပမ့မ့ၢ် ပှၤခရံာ်ဖိတဖၣ်န့ၣ်ဒီး, ဘၣ်မနုၤအဃိ, ပသးဟးဂီၤညီဝဲဒၣ်လဲၣ်. တၢ်သ့ၣ်တဖၣ်န့ၣ် ကကတၢၢ်ဝဲဒၣ်ဒ်လဲၣ်န့ၣ် မ့ၢ်ပတသ့ၣ်ညါဘၣ်အဃိဧါ” န့ၣ်လီၤ. တၢ်လၢယအဲၣ်ဒိး စံးဘၣ်တဲဘၣ် အဝဲသ့ၣ်န့ၣ် မ့ၢ်ဝဲဒၣ် တၢ်အၢၣ်လီၤ တၢ်မူအထူအယိာ် လၢကစၢ်ခရံာ်အပူၤ,ဃုာ်ဒီး, လံာ်စီဆှံ အတၢ်ပာ်ဖျါ တၢ်အၢၣ်လီၤအီလီၤတဖၣ်, ဘၣ်ဃးဒီး ကစၢ်ယွၤအတၢ်ကွၢ်ထွဲကဟုကယာ် အပှၤဂီၢ်မုၢ်အဂ့ၢ်န့ၣ်လီၤ. သရၣ်လၢအသိၣ်လိပှၤန့ၣ် နံၤကမှံထီၣ်ဝဲ, ဒီးသိၣ်လိကဒီးဝဲဒၣ်ဆူညါန့ၣ်လီၤ. ဘၣ်ဆၣ်, တၢ်လၢယစံးကတိၤပာ်ဖျါတဖၣ်န့ၣ် အိၣ်စဲထီဃာ်အသးအါနံၣ်အါလါ, လၢယသးကံၢ်ပူၤန့ၣ်လီၤ.

အကတၢၢ်န့ၣ်, ယဘၣ်ကွၢ်ဆၢၣ်မဲာ် သးသမူအတၢ်ဂ့ၢ်ကီတဖၣ်န့ၣ်လီၤ. တၢ်ဖံးတၢ်မၤတအိၣ်, တၢ်အိၣ်သယုၢ်သညိ, တၢ်အိၣ်ဆူၣ်အိၣ်ချ့အတၢ်ဂ့ၢ်ကီ, ဒီးတၢ်ဂ့ၢ်ကီအဂုၤအဂၤတဖၣ် အါမးအဃိ, ယသူၣ်ဟးဂီးသးဟးဂီၤဝဲဒၣ်န့ၣ်လီၤ. ကစၢ်ယွၤ အတၢ်အၢၣ်လီၤတဖၣ် ကမၤမုာ်ထီၣ်က့ၤပှၤန့ၣ် မ့ၢ်ဝဲတီဝဲ, လီၤတံၢ်ဝဲဘၣ်ဆၣ်, တအၢၣ်လီၤအီလီၤပှၤလၢ တၢ်အိၣ်မူ အဘီၣ်အညီဘၣ်. ကစၢ်ယ့ၣ်ရှူး စံးဝဲဒၣ် “သုကဘၣ်တၢ်ဖှီၣ်” (ယိၤ ၁၆:၃၃) န့ၣ်လီၤ. ဒ် စီၤယိၤဘး တူၢ်ဘၣ်ခီၣ်ဘၣ်ဝဲအသိး, ပဘၣ်ကွၢ်ဆၢၣ်မဲာ် သးသမူအတၢ်ဂ့ၢ်ကီ ဒ်သိးအံၤတဖၣ် မၤဘၣ်ဒိဆါပှၤန့ၣ် မ့ၢ်ဝဲဒၣ် ပှၤဟီၣ်ခိၣ်ဖိအန့ဆၢၣ်န့ၣ်လီၤ. စီၤယိၤဘး တဂၤ, ဘၣ်တၢ်မၤကွၢ်အီၤ, ဒီးတူၢ်ဘၣ်ခီၣ်ဘၣ်ဝဲနးနးကလဲာ်, အဖိတဖၣ်, ဒီးအစုလီၢ်ခီၣ်ခိၣ်တဖၣ် လီၤမၢ်, ဒီးအတၢ်အိၣ်ဆူၣ်အိၣ်ချ့န့ၣ် တဂ့ၤလၢၤဘၣ် (ယိၤဘး ၁:၁၃-၂၀, ၂:၇) န့ၣ်လီၤ.

ဒ်သိးကမၤမုာ်ထီၣ်က့ၤအီၤအဂီၢ်, အတံၤသကိးတဖၣ် ဟဲဆူအအိၣ် (ယိၤဘး ၂:၁၁-၁၃) န့ၣ်လီၤ. အခီၣ်ထံးန့ၣ် အဝဲသ့ၣ် “ထံၣ်ဘၣ်ဝဲလၢ အသူၣ်အုးသးအုးဒိၣ်မး” (:၁၃) အဃိ, လၢတၢ်အိၣ်ဘှ့ၣ်အိၣ်ဘှီၣ်အပူၤန့ၣ် ဟ့ၣ်ဂံၢ်ဟ့ၣ်ဘါဝဲအတံၤသကိးန့ၣ်လီၤ. တၢ်သ့ၣ်တဖၣ် မၤအသးဝံၤ, အဝဲသ့ၣ် စးထီၣ် သံကွၢ်တၢ်သံကွၢ်လၢအတကဲဘျုးတဖၣ်, တလီၤဆီဝဲဒၣ် ဒ်ယပာ်ဖျါထီၣ်တၢ်သံကွၢ်, ဖဲပမၤလိလံာ်စီဆှံအကတီၢ်အသိးန့ၣ်လီၤ.

ပမ့ၢ်ထံၣ် ပှၤဘၣ်ကွၢ်ဆၢၣ်မဲာ် တၢ်ဂ့ၢ်ကီတဖၣ်န့ၣ် ဒ်သိးပကစံးဆၢအဝဲသ့ၣ်လၢ တၢ်အဲၣ်, တၢ်သးကညီအဂီၢ်န့ၣ် သးစီဆှံကစၢ် မၤစၢၤပှၤသ့ဝဲဒၣ်န့ၣ်လီၤ. ဒီးဖဲပသူၣ်အုးသးအုးအကတီၢ်, ယွၤအတၢ်အၢၣ်လီၤလၢ ကမၤမုာ်ထီၣ်ပှၤန့ၣ် ပသ့ၣ်နီၣ်က့ၤ သ့ဝဲဒၣ်န့ၣ်လီၤ.