ယကွၢ်ထွဲ ဒံးကၠံးထၢၣ် (digital) ပိးလီတသ့ဝဲဒၣ် ဂ့ၤဂ့ၤဘၣ်ဘၣ်အဂ့ၢ်န့ၣ် ယလီတဲစိ ဒုးသ့ၣ်နီၣ်ထီၣ်ယၤတလီၢ်လီၢ်န့ၣ်လီၤ. တၢ်ကစီၣ်စံးဝဲ “လံာ်တြံာ်လၢ အတကဲဘျုးတဖၣ် ဟံးန့ၢ်မၤပှဲၤ တၢ်ပာ်ဖှိၣ်အလီၢ်လံ. လံာ်တြံာ်လၢ အတကဲဘျုးတဖၣ် (Junk Files) ၆၇၅ MB န့ၣ် မၤစီတၢၤကွံာ်အီၤတက့ၢ်” န့ၣ်လီၤ. ယတအဲၣ်ဒိးလၢ တၢ်ကစီၣ်ဒ်သိးအံၤတဖၣ် ဟဲနုာ်လီၤလၢ ယလီတဲစိအပူၤဘၣ်ဆၣ်, ယမ့ၢ် မၤစီကွံာ် လံာ်တြံာ်တဖၣ်န့ၣ်ဒီး, တၢ်ဂ့ၢ်အကါဒိၣ်တဖၣ် အဂီၢ်, ယကမၤန့ၢ်အါထီၣ် တၢ်ပာ်ဖှိၣ်အလီၢ်န့ၣ်လီၤ. တၢ်အဒိတမံၤန့ၣ် ဖဲယဖိမုၣ် နုာ်လီၤ တၢ်ပြၢပီၢ်ထံအကတီၢ်, ဒ်သိးယကဒိန့ၢ် တၢ်ဂီၤမူလၢ ယဖိမုၣ် အတၢ်မၤနၢၤတၢ်ပြၢ
အဂီၢ်န့ၣ် လၢတၢ်တဆိကမိၣ်အပူၤန့ၣ် လံာ်တြံာ်လၢ အတကဲဘျုးတဖၣ် ကမၤကီမၤခဲယၤအလီၢ်န့ၣ် မ့ၢ်လၢယသ့ၣ်ညါလီၤတံၢ်ယဲလၢ ဒံးကၠံးထၢၣ် တၢ်လီၢ်လီၤဟိ, အိၣ်ဝဲဒၣ် လၢလၢလီၢ်လီၢ်အဃိန့ၣ်လီၤ.
တၢ်ကတြူာ်စီကွံာ် လံာ်တြံာ်လၢ အတကဲဘျုးတဖၣ်, လၢယလီတဲစိအပူၤန့ၣ် မ့ၢ်တၢ်မၤလၢအညီတမံၤန့ၣ်လီၤ. ဘၣ်ဆၣ်, “လံာ်တြံာ်လၢအတကဲဘျုးတဖၣ်” လၢပသးကံၢ်ပူၤတဖၣ်န့ၣ် မ့ၢ်ပကမၤစီကွံာ်အီၤဒ်လဲၣ်. ဒ်ပလီတဲစိတဖၣ်အသိး, ပသူၣ်ဂ့ၢ်သးကျိၤ အသုတဒိၣ်ထီၣ်, အသုတဂုၤထီၣ်ပသီထီၣ်အဂီၢ်န့ၣ် တၢ်ဂ့ၢ်လၢအလုၢ်အပှ့ၤတအိၣ်တဖၣ် ကးတံာ်ဃာ်ပသူၣ်ပသးသ့ဝဲဒၣ်န့ၣ်လီၤ. ပှၤကွဲးလံာ်ဧ့ၤဘြံၤသ့ၣ်ညါ နၢ်ပၢၢ် တၢ်မ့ၢ်တၢ်တီတမံၤအံၤ, ဒီးဟ့ၣ်ဂံၢ်ဟ့ၣ်ဘါပှၤလၢ တၢ်တမံၤလၢ်လၢ်, လၢအကမၤဘၣ်ဒိဘၣ်ထံး ပတၢ်လဲၤဒီးကစၢ်ယွၤန့ၣ် ပကအိၣ်ဒီးပလီၢ်သူၣ်ပလီၢ်သးထံထံဆးဆးအဂ့ၢ်န့ၣ် ကွဲးပာ်ဖျါဝဲလၢ “မ်ပဝဲဒၣ်စ့ၢ်ကီး ပာ်လီၤကွံာ် ကယဲၢ်တၢ်အဃၢတမံၤလၢ်လၢ်, ဒီးတၢ်ဒဲးဘးလၢ ပမၤအီၤညီ, ဒီးတၢ်ဃ့ၢ်သတြီၤအိၣ်လၢ ယမဲာ်ညါန့ၣ်, မ်ပဃ့ၢ်လၢတၢ်သးစူးတက့ၢ်” (ဧ့ၤ ၁၂:၁) န့ၣ် မ့ၢ်တၢ်ကတိၤလၢအတၤပှၤန့ၣ်လီၤ.
တၢ်ထုးဃၢမၤဃၢၤနၤန့ၣ် ကမ့ၢ်တၢ်မနုၤလဲၣ်. ထုလၢအမၤလီၤဃံၤနၤန့ၣ် ကမ့ၢ်တၢ်မနုၤလဲၣ်. လံာ်ဧ့ၤဘြံၤ ဟ့ၣ်ဂံၢ်ဟ့ၣ်ဘါပှၤ, ဒီးပာ်ဖျါဝဲဒၣ်, “ပှၤလၢအဒုးကဲထီၣ်ဒီးမၤလၢထီၣ်ပှဲၤထီၣ် ပတၢ်နာ်, ယ့ၣ်ရှူးတဂၤန့ၣ်, မ်ပကွၢ်ဃီၤတၢ်ဆူအအိၣ်တက့ၢ်” (:၂) န့ၣ်လီၤ. ထဲဒၣ်ကစၢ်ယ့ၣ်ရှူးတဂၤန့ၣ် မၤစၢၤပှၤသ့ဝဲဒၣ် ဒ်သိးပကဃုထံၣ်န့ၢ်, ဒီးထုးစီမၤစီကွံာ် “လံာ်တြံာ်လၢ အတကဲဘျုးတဖၣ်” လၢအမၤကီမၤခဲမၤတံာ်တာ် ပတၢ်အိၣ်မူအလၢအပှဲၤ, လၢကစၢ်ယ့ၣ်ရှူးအပူၤန့ၣ်လီၤ