ဖဲနံၣ်ကယၤတဆံသၢအတီၢ်ပူၤ, လၢကီၢ်ဖြၣ်စ့ၣ်န့ၣ်, လၢပျၢၤပူစံၣ်ဃဲၤတယုၢ်အပူၤန့ၣ် ပှၤဒူပှၤဃိၤ တူၢ်ဒိၣ်ခွါတဂၤ အဖိခွါအီၣ်နုာ်ဖိန့ၣ် ပာ်တ့ၢ်ဝဲဒၣ်လၢဟံၣ်, လၢအထွံၣ်မီၤစဲ (greyhound), ကၠ့နံၣ်ဖီး (Guinefort) အတၢ်အိၣ်ခိးကွၢ်ထွဲအဖီလာ်န့ၣ်လီၤ. ဖဲပှၤဒူ ပှၤဃိၤ ဟဲက့ၤတုၤဆူဟံၣ်န့ၣ်ဒီး, ထံၣ်ဝဲဒၣ် ဟံၣ်ပူၤန့ၣ် တၢ်အိၣ်သဘံၣ်ဘုၣ်အသးန့ၣ်လီၤ. ဖိသၣ်အလီၢ်မံ အိၣ်လီၤကဒါခိၣ်ခံ, ဒီးအဖိခွါန့ၣ် တထံၣ်ဝဲဘၣ်. အထွံၣ်ဖးဒိၣ်အကိာ်ပူၤန့ၣ် ဘၣ်အၢဘၣ်သီဒီးတၢ်သွံၣ်န့ၣ်လီၤ. အဝဲဆိကမိၣ်ဝဲလၢ အထွံၣ်တဒုအံၤ မၤဘၣ်ဒိဆါ အဖိခွါလံအဃိ, မၤသံကွံာ်ဝဲအထွံၣ်န့ၣ်လီၤ. လၢခံန့ၣ်, အဝဲထံၣ် ဂုာ်ဖးဒိၣ်အသံတဘိ, အနီၢ်ကစၢ်အလိၤန့ၣ် အိၣ်ပှဲၤဒီးထွံၣ်အ့ၣ်ဃာ်အလီၢ်တဖၣ်, ဒီးအဖိခွါဖိန့ၣ် အိၣ်ဝဲဒၣ်လၢ အလီၢ်မံအဖီလာ်, ပူၤဖျဲးဒီးတၢ်ဘၣ်ဒိဘၣ်ထံးန့ၣ်လီၤ. ကၠ့နံၣ်ဖီး မၤပူၤဖျဲးဝဲဒၣ် ဖိသၣ်အသးသမူန့ၣ်လီၤ. ထွံၣ်တဒုအံၤ အတၢ်ဒူတၢ်ဃိၤ, ဒီးအတၢ်ဘူၣ်တၢ်တီၢ်န့ၣ်မ့ၢ်လၢတၢ်တစံၣ်ညီၣ်တီန့ၢ်အီၤအဃိ, မၤဘၣ်ဒိဘၣ်ထံး ပှၤကညီတဖၣ်အသးတုၤဒၣ်လဲာ်, အဝဲသ့ၣ် မၤကမၣ် တၢ်ယူးယီၣ်ပးကဲ ကၠ့နံၣ်ဖီး ဒ်ပှၤစီဆှံတဂၤအသိးန့ၣ်လီၤ.
လံာ်စီဆှံ ကွဲးနီၣ်ပာ်ဖျါဝဲ တၢ်မၤအသးဒ်သိးအံၤတမံၤ, ဖဲဆၣ်ဖိကီၢ်ဖိတဒုန့ၣ်တၢ်တစံၣ်ညီၣ်တီဘၣ်အီၤ, ခီဖျိလၢအဒီဒၣ် အကစၢ်အဃိန့ၣ်လီၤ. ဝံ စီၤဘံးလၣ်န့ၣ် ဘၣ်တၢ်ဒိးလဲအီၤလၢ ပှၤမိၤအးဖိအစီၤပၤ, ဒ်သိးအကဆိၣ်အၢ ယွၤအပှၤဂီၢ်မုၢ်တဖၣ် (၄ မိၤ ၂၂:၄-၆) န့ၣ်လီၤ. စီၤဘံးလၣ် အတၢ်လဲၤကျဲန့ၣ်, “ယွၤအကလူးတဂၤ, … အိၣ်ဒီးအနးဘီၣ်ထီၣ်အသးလၢအစုပူၤ” န့ၣ် တြီဃာ်အကျဲန့ၣ်လီၤ. စီၤဘံးလၣ်အကသ့ၣ်ယီၤန့ၣ် ထံၣ်ဝဲဒၣ်လၢ တၢ်ဘၣ်ယိၣ်အလီၢ်အိၣ်ဝဲဒီး, ပဒ့ၣ်ဟးဆှဲးဝဲဒၣ် ယွၤအကလူးခံဘျီ, ဒီးမ့ၢ်လၢအမၤတၢ်အံၤအဃိ, အကစၢ် တီၢ်အီၤ (:၂၃,၂၅) န့ၣ်လီၤ. ဖဲကသ့ၣ်ယီၤ ပဒ့ၣ်ဟးဆှဲးဝဲ ကလူးတန့ၢ်လၢၤဘၣ်န့ၣ်ဒီး, တလဲၤဝဲဆူညါလၢၤဘၣ်အဃိ, ဘၣ်တၢ်တီၢ်ကဒီးအီၤ (:၂၆,၂၇) န့ၣ်လီၤ.
အကတၢၢ်န့ၣ် ကစၢ်ယွၤ ဒုးအဲးထီၣ် ကသ့ၣ်ယီၤအထးခိၣ်, ဒီးပျဲအခီၣ်ဆၢ ဒီတဒၢက့ၤအသး (:၂၉,၃၀), ဒီးကစၢ်ယွၤ ဒုးထံၣ်ဝဲ စီၤဘံးလၣ်လၢ ကလူးတဂၤ, ဒီးစီၤဘံးလၣ် ဒိကနၣ်ဝဲ ယွၤအတၢ်နဲၣ်ကျဲ (:၃၁,၃၂) န့ၣ်လီၤ.
ဆၣ်ဖိကီၢ်ဖိတဒု ကတိၤဆၢက့ၤပှၤတၢ်န့ၣ် တမ့ၢ်လၢပကနၢ်ဟူဘၣ်အီၤဘၣ်. ဘၣ်ဆၣ်, ကျိၤကျဲလၢ ပတဆိကမိၣ်အပူၤန့ၣ် ကစၢ်ယွၤ ဒုးထံၣ်ပှၤသ့ဝဲဒၣ်န့ၣ်လီၤ. ဖဲကစၢ်ယွၤ ဒုးထံၣ်ပှၤအကတီၢ်န့ၣ်ဒီး, ဒ်သိးပကဒိကနၣ်အီၤအဂီၢ်န့ၣ် မ်ပကအိၣ်ကတဲာ်ကတီၤပသးန့ၣ်တက့ၢ်.