ထနံထၢၣ်(န) (Tanitan) စံးဝဲဒၣ်လၢ “အပူၤကွံာ်န့ၣ် ယမၤသံပှၤကညီတဖၣ် န့ၣ်လီၤ. ဘၣ်ဆၣ်, စးထီၣ်လၢ ယဃုထၢ စူၢ်က့ၤနာ်က့ၤ ကစၢ်ယ့ၣ်ရှူးခရံာ်လံၤလံၤန့ၣ်, အဝဲတပျဲ ယကမၤသံတၢ်ဒ်သိးအံၤလၢၤဘၣ်” န့ၣ်လီၤ. ထနံထၢၣ်(န) တဂၤ, မ့ၢ်ဝဲဒၣ် ပှၤအလီ(န)ကီး (Ilongot) ကလုာ်ဒူၣ်ဖိတဂၤ, လၢ ကီၢ် Philippines, စံၣ်ယဲရၣ် မါဒရ့ၣ် (Sierra Madre) ကစၢၢ်ကလိတဖၣ်န့ၣ်လီၤ. ပှၤကလုာ်ဒူၣ်အံၤ အိၣ်ဒီးလုၢ်လၢ်လၢ အလူၤဃုဖီၣ် ပှၤကညီ, ဒီးဒီၣ်တဲာ်ဝဲအခိၣ်န့ၣ်လီၤ. ထနံထၢၣ်(န) ထိၣ်သတြီၤဝဲ အတၢ်အိၣ်မူ, တချုးလၢအသ့ၣ်ညါယွၤ, ဒီးအတၢ်အိၣ်မူခ့ခါအကတီၢ်န့ၣ်ဒီး, စံးဝဲဒၣ်လၢ “အပူၤကွံာ်, ယကဘၣ်သံန့ၣ် ယပျံၤယဲဘၣ်ဆၣ်, ယကဘၣ်မၤသံတၢ်န့ၣ် ယတပျံၤယဲဘၣ်. မ့မ့ၢ်ခဲကနံၣ်အံၤ, ယကဘၣ်မၤသံတၢ်န့ၣ် ယပျံၤယဲဘၣ်ဆၣ်, ယကဘၣ်သံယဲအဂီၢ်န့ၣ် ယတပျံၤလၢၤဘၣ်” န့ၣ်လီၤ.

ထနံထၢၣ်(န) အဂ့ၢ်အကျိၤန့ၣ် ယဖးဘၣ်အီၤလၢ ဖလီၣ်ရဲၣ်(န)ထံနိၣ် စဲတိး(စ) (Florentino Santos) အလံာ် “ဆူ ပှၤစံၣ်ယဲရၣ် မါဒရ့ၣ်ကလုာ်ဒူၣ် လၢအလူၤဃုဒီၣ်တဲာ် ပှၤကညီအခိၣ်သ့ၣ်တဖၣ်အအိၣ်” (To the Headhunters of Sierra Madre) တဘ့ၣ်အပူၤန့ၣ်ဒီး, တၢ်လၢယဆိကမိၣ်ထီၣ်ယဲန့ၣ် အတၢ်ပျံၤယွၤ (မ့) အတၢ်ယူးယီၣ်ပးကဲယွၤ လၢအဃုထံၣ်န့ၢ်ဝဲသီသီအံၤ, ဒုးအိၣ်ထီၣ် အတၢ်သးအိၣ် ဒိကနၣ် ကစၢ်ယွၤဒ်လဲၣ်အဂ့ၢ်န့ၣ်လီၤ. တချုးလၢ ပှၤအံၣ်စရ့လးဖိတဖၣ် နုာ်လီၤဆူ ကီၢ်တၢ်စံးပာ်အပူၤအကတီၢ်, ယသ့ၣ်နီၣ်ထီၣ်က့ၤ စီၤမိၤရှ့ အတၢ်ကတိၤတဖၣ်, “မ့တမ့ၢ် ဘၣ်လၢနကပျံၤယွၤ နကစၢ်… ဘၣ်ဒီး, ယွၤနကစၢ်ဃ့တၢ်လၢနၤ လၢမနုၤတမံၤလဲၣ်” (၅ မိၤ ၁၀:၁၂) န့ၣ်လီၤ. တၢ်ယူးယီၣ်ယွၤန့ၣ် ကဘၣ်တၢ်ဒုးနဲၣ်ပာ်ဖျါထီၣ်အီၤ ခီဖျိလၢ တၢ်ဒိကနၣ်ယွၤန့ၣ်လီၤ. ယွၤအပှၤဂီၢ်မုၢ်တဖၣ် ကဘၣ် “ပိာ်အကျဲခဲလၢာ်, ဒီးအဲၣ်အီၤ, …ဒီး …တိၢ်န့ၢ်ယွၤအတၢ်မၤလိာ်, ဒီးအတၢ်သိၣ်တၢ်သီ” (:၁၂-၁၃) န့ၣ်လီၤ.

ဒ်ပမ့ၢ်, ပှၤစူၢ်က့ၤနာ်က့ၤ ကစၢ်ယ့ၣ်ရှူးသ့ၣ်တဖၣ်အသိး, ပတၢ်ယူးယီၣ်ပးကဲကစၢ်ယွၤ အတၢ်စီတၢ်ဆှံန့ၣ် ထိၣ်ဟူးထိၣ်ဂဲၤပှၤလၢ ပကသးဟ့ တၢ်အၢတၢ်သီ, ဒီးပကမၤတၢ်လၢအမၤမုာ်ယွၤအသး (ကတိၤ ၈:၁၃) န့ၣ်လီၤ. မ်ပကဃ့သကိး ကစၢ်ယွၤလၢ ကမၤစၢၤပှၤ, ဒ်သိးပကအိၣ်မူအိၣ်ဂဲၤလုၢ်လၢ်လၢ အယူးယီၣ်ပးကဲယွၤကသ့အဂီၢ်န့ၣ်တက့ၢ်.