တချုး ပတၢ်လဲၤဆူ ကီၢ် Switzerland န့ၣ်, လၢယသးအတၢ်ဆိကမိၣ်အပူၤ, န့ဆၢၣ် တၢ်ကွၢ်ကီအလီၢ် (snapshot) န့ၣ် မ့ၢ်ဝဲဒၣ် အဲး (Alps) ကစၢၢ်ဖးထီတဖၣ်လၢမူခိၣ်ဖီ အိၣ်ဘၢလၢအလိၤ, မဲာ်တဲးလဲးတဖၣ် အီၣ်တပံၢ်လၢပျီပူၤ, ဒီးကစၢၢ်ဒီခိၣ် ပှၤထူစံာ်ဖိတဖၣ် အူဝဲဒၣ် တၢ်ဖးအနၢၤဖးထီ (alpine horn) တဖၣ်န့ၣ်လီၤ. ဘၣ်ဆၣ်, ဖဲပလဲၤနီၣ်သိလ့ၣ်ဆူ ဝ့ၢ် Zurich ကလံၤထံးတခီန့ၣ်ဒီး, ဒ်တၢ်လၢပထံၣ်ဘၣ်လၢ ဝ့ၢ်တဖၣ်အသိး, ကျဲမုၢ်ဒိၣ်တဖၣ် ဘံဘူခံၣ်ခူၣ်လိာ်အသးန့ၣ်လီၤ. ဖဲပလဲၤဘူးထီၣ်ဆူ ပကအိၣ်ဆိးတၢ်အလီၢ်အကျဲန့ၣ်ဒီး, ပဘၣ်လဲၤနီၢ်သိလ့ၣ်လၢ ဖၣ်ကမူၣ်အကျဲအံၣ်တဘိ, ထဲဒၣ်သိလ့ၣ်ဖိတခိၣ်ဧိၤ အတၢ်လဲၤ, လၢတၢ်ဘၣ်ယိၣ်အလီၢ်အိၣ်ဝဲဒၣ်န့ၣ်လီၤ. တၢ်လီၢ်လၢပဒိးလဲဃာ်အီၤအလီၢ်န့ၣ် ပဘၣ်တွံၢ်စိာ်ထီၣ် ပတၢ်ဖိတၢ်လံၤတဖၣ်လၢ လၢၢ်ဃီသွါ လၢအလီၤဘံ ဒိၣ်မးတဖၣ်အလိၤန့ၣ်လီၤ. လၢတၢ်လီၤဘှံးလီၤတီၤ, ဒီးလၢတၢ်သးဟးဂီၤအပူၤန့ၣ် ပတုၤဃီၤဆူ ဟံၣ်အချၢတၢ်လီၢ်ပၢၤတီၤ ဖဲပှၤကဆ့ၣ်နီၤအိၣ်ဘှံးအိၣ်သါအလီၢ်န့ၣ်လီၤ. ဖဲန့ၣ်မး, န့ဆၢၣ် တၢ်ကွၢ်ကီအလီၢ်လၢ အလီၤဆီဒိၣ်မးတထံၣ်န့ၣ် ဟဲအိၣ်ဖျါထီၣ်ဝဲဒၣ် လၢပမဲာ်ညါန့ၣ်လီၤ. အဲး (Alps) ကစၢၢ်ဖးထီတဖၣ် အိၣ်ထီၣ်ထီကဟုကညီၢ်လၢ လူၣ်စဲ(န) (Lucerne) အနိၣ်လါအဲးဖးလဲၢ်အဖီခိၣ်, ဒီးဝ့ၢ်ဆံးဖိတဖၣ် အတၢ်ကပီၤ ကပြုၢ်ကပြီၤန့ၣ် လီၤဂာ်ဒီးနါပံာ်လ့ဖိတဖၣ် အတၢ်ကပီၤပံာ်လ့ပံာ်လ့ လၢပဖီလာ်အသိးန့ၣ်လီၤ. ပတၢ်လဲၤခီဖျိ အကီအခဲတဖၣ်န့ၣ် ကြၢးဝဲဘၣ်ဝဲဒၣ်န့ၣ်လီၤ.

ယသ့ၣ်နီၣ်ထီၣ်က့ၤ လံာ်စီဆှံတဆၢ, စံးဝဲဒၣ်လၢ “မၤသးဒ်န့ၣ်ဒီးပတလီၤဘှံးဘၣ်” (၂ ကရံၣ် ၄:၁၆) န့ၣ်လီၤ. ပှၤတၢ်မၢဖိ စီၤပီလူး ကွဲးပာ်ဖျါ အနီၢ်ကစၢ် အတၢ်ဂဲၤလိာ်တဖၣ် အဂ့ၢ်လၢ “တၢ်မၤတံာ်တာ်ပှၤလၢတၢ်ကိးမံၤဒဲးဘၣ်ဆၣ်ဒီး, … ပတၢ်မုၢ်လၢ်တဟါမၢ်ဘၣ်” (:၈) န့ၣ်လီၤ. အတၢ်ထံၣ်လၢ အဂ့ၤတကပၤန့ၣ် စီၤပီလူး ပာ်ဖျါထီၣ်ဝဲလၢ “တၢ်နးတၢ်ဖှီၣ် ဘၣ်ပှၤဘီၣ်သလီၣ်, လၢအအိၣ်တစိၢ်ဖိအံၤ, မၤန့ၢ်ပှၤလၢ တၢ်လၤကပီၤအထူအယိာ်လၢအအါန့ၢ်ဃၢန့ၢ်ဒိၣ်ဒိၣ်ကလဲာ်တက့ၢ်” (:၁၇) န့ၣ်လီၤ. စီၤပီလူး ဟ့ၣ်ကူၣ်ပှၤလၢ ပကကွၢ် “တၢ်လၢအတအိၣ်ဖျါ” (၁၈), ဒီးမုၢ်လၢ်တၢ်လၢအအိၣ်လီၤထူလီၤယိာ်တမံၤန့ၣ်လီၤ.

ပသးသမူအတၢ်လဲၤတဖၣ် ဘၣ်တဘျီဘျီန့ၣ် တလီၤသးစဲ, ဒီးကီဝဲခဲဝဲဒၣ်န့ၣ်လီၤ. ဘၣ်ဆၣ်, လၢကစၢ်ခရံာ်အပူၤန့ၣ် ပဘၣ်တၢ်မၤဂၢၢ်မၤကျၢၤပှၤလၢ ပကထံၣ်ဘၣ် န့ဆၢၣ် တၢ်ကွၢ်ကီအလီၢ်, အဂ့ၤဒိၣ်ကတၢၢ်တဘ့ၣ်န့ၣ်လီၤ. ပတၢ်လဲၤခီဖျိ အကီအခဲတဖၣ်န့ၣ် ကြၢးဝဲဘၣ်ဝဲဒၣ်န့ၣ်လီၤ. ယွၤအတၢ်လၤကပီၤအထူအယိာ်န့ၣ် ဂ့ၤန့ၢ်ဒိၣ်န့ၢ်ဒံး တၢ်လၢ ပဆိကမိၣ်ထီၣ် သ့ဝဲဒၣ်တမံၤလၢ်လၢ်န့ၣ်လီၤ.