ဘရဲ(န)ဒဲ(န) (Branden) အပၢ်န့ၣ် ဖဲအသးအိၣ်ဝဲဒၣ် ယဲၤဆံ ဘျဲၣ်အကတီၢ်န့ၣ် ကဘၣ်သံဝဲဒၣ်လၢ ခဲစၢၢ်တၢ်ဆါန့ၣ်လီၤ. အသးအိၣ်မၤစၢၤဝဲဒၣ် အမိၢ်အပၢ်အဃိ, တဲဘၣ်အမိၢ်အပၢ်လၢ ကဟဲအိၣ်ဆိးဒီးအီၤ, ဒ်သိးကမၤစၢၤဘၣ်အဝဲသ့ၣ်န့ၣ်လီၤ. အပၢ်န့ၣ် အဲၣ်ဒိးအိၣ်ဆိးဝဲဒၣ် တၢ်လီၢ်လၢအကိၢ်အလၢၤတတီၤဘၣ်ဆၣ်, ကလဲၤက့ၤတၢ်အဂီၢ်န့ၣ် တညီဘၣ်အဃိ, ဘရဲ(န)ဒဲ(န) ဘၣ်ကူၣ်ထီၣ်ဖးလီၤတၢ်န့ၣ်လီၤ. လၢအဟံၣ်လီၢ်ခံန့ၣ် တ့ဝဲဒၣ် ကမါဖိ, ဒီးတ့ၢ်နုာ်ဝဲညၣ်တဖၣ်, ဒီးရဲၣ်ကျဲၤဆီလီၤဝဲ ထံလီၤဆူတခါ, အိၣ်ဟဲလီၤလၢလၢၢ်တဖၣ်အဖီခိၣ်န့ၣ်လီၤ. မၢပှၤဟဲစိာ် ပီၣ်လဲၣ်နံၤအမဲးတဖၣ်လၢ သိလ့ၣ်ထရး (truck) ဖးဒိၣ်သၢခိၣ်, ဒီးသူၣ်ဝဲဒၣ် တကွံမုၢ်တဖၣ်, ဒီးကယၢကယဲဝဲဒၣ်လၢ တၢ်ကပီၤမဲာ်အူတဖၣ်,ဃုာ်ဒီးမ့ၣ်အူဒွဲ အဃံအလၤတဖၣ်, ဒီးဘှီထီၣ်ဝဲ တၢ်ခိၣ်ဒုးလၢတၢ်အိၣ်ကဒုအဂီၢ်န့ၣ်လီၤ. အပၢ် မုာ်လၤသးခုဘၣ်ဝဲဒၣ် ဖဲ ဟံၣ်လီၤခံ ပၤရဒံးစူးအကီးဖိအံၤ, ဒီးမၤလၢာ်ဝဲ အမုၢ်နံၤလၢခံကတၢၢ်တဖၣ်န့ၣ်လီၤ.

ဘရဲ(န)ဒဲ(န) အတၢ်မၤတဖၣ်အံၤ ပာ်ဖျါထီၣ်ဝဲ မိၢ်ပၢ်ဒီးဖိတဖၣ်အဘၢၣ်စၢၤ, အတၢ်အိၣ်ဃူအိၣ်ဖိး, အဲၣ်လိာ်ကွံလိာ်သးအဂ့ၢ်, ဖျါဝဲဒၣ် ဖဲ လံာ် ၂ မိၤရှ့ ၂ဝ အပူၤန့ၣ်လီၤ. ခီဖျိလၢ စီၤမိၤရှ့ န့ၣ် ကစၢ်ယွၤ မၤလိာ်ဝဲဒၣ် ပှၤအံၣ်စရ့လးဖိတဖၣ် “ဒ်သိးနမုၢ်နံၤ တဖၣ်ကထီထီၣ်လၢကီၢ်ပူၤ လၢယွၤနကစၢ်ဟ့ၣ်လီၤနၤဒီးႇ ယူးယီၣ်နမိၢ်နပၢ်တက့ၢ်.” (၂မိၤ ၂ဝ:၁၂) န့ၣ်လီၤ. တၢ်မၤလိာ်အံၤ အဂံၢ်ခီၣ်ထံး, မ့ၢ်ဝဲဒၣ် တၢ်မၤလိာ်လၢ ပကအဲၣ်, ဒီးယူးယီၣ် ပပၢ်အိၣ်လၢမူခိၣ်တဂၤ (:၃-၈), ဒီးဒုးဘၣ်ထွဲဝဲဒၣ် တၢ်မၤလိာ် ယဲၢ်ထံၣ်, လၢအပိာ်ထွဲထီၣ်အခံတဖၣ်- မၤသံတၢ်တဂ့ၤႇ အဲၣ်ဘၢမါအဲၣ်ဘၢဝၤတဂ့ၤႇ ဟုၣ်တၢ်တဂ့ၤႇ လီတၢ်တဂ့ၤႇ သးကွံၦၤဂၤအတၢ်တဂ့ၤ (:၁၂-၁၇), တၢ်မၤလိာ်တဖၣ်အံၤ နဲၣ်လိပှၤလၢ ပကအဲၣ်, ဒီးယူးယီၣ် ၦၤကညီကဒဲကဒဲန့ၣ်လီၤ.

လၢၦၤတနီၤနီၤအဂီၢ်, တၢ်ယူးယီၣ်မၤလၤကပီၤ မိၢ်ပၢ်န့ၣ် ကမ့ၢ်တၢ်မၤအဘီၣ်အညီန့ၣ်လီၤ. မ့မ့ၢ်ၦၤတနီၤနီၤအဂီၢ်န့ၣ် တၢ်ဂ့ၢ်ကီဒိၣ်နီၢ်မးတမံၤန့ၣ်လီၤ. တၢ်သူၣ်တမုာ်သးတမုာ်, ဒီးတၢ်နာ်န့ၢ်တသ့တဖၣ်န့ၣ် ကနးဝဲဒိၣ်မးန့ၣ်လီၤ. အပူၤကွံာ်, တၢ်ဘၣ်ဒိဆါတဖၣ်န့ၣ် တအဲၣ်ဒိး မၤဘၣ်လိာ်က့ၤတၢ်ဘၣ်န့ၣ်လီၤ. ပဟ့ၣ်လီၤအးလီၤတၢ်သ့ၣ်တဖၣ်ဆူ ပပၢ်ကစၢ်ယွၤ, လၢအသ့ၣ်ညါနၢ်ပၢၢ် ပတၢ်နးတၢ်ဖှီၣ်တဂၤအအိၣ်သ့ဝဲန့ၣ်လီၤ. ဒ်သိးပကအိၣ်မူအိၣ်ဂဲၤ လၢအတၢ်အဲၣ်အပူၤအဂီၢ်, မၤစၢၤပှၤသ့ဝဲဒၣ်န့ၣ်လီၤ.