ဖဲလါအ့ဖြ့ၣ်, မုၢ်ဃ့ၢ်လီၤအမုၢ်တနံၤန့ၣ်, ၦၤကညီလၢအကကွဲၢ်တဖၣ် ပာ်ဖှိၣ်ထီၣ်အသးလၢ တၢ်ပာ်ပနီၣ်တၢ်လီၢ်တၢ်ကျဲတဖၣ် လၢကီၢ်မဲးစံၣ်ကိၣ်, ဒီးကီၢ်အမဲရကၤ တၢ်လီၢ်ကဝီၤဒီတကျိၤ, ဒ်သိးကအိၣ်ခိးကွၢ်ကီ တၢ်ယူၢ်မုၢ်ဒီတဖျၢၣ် လၢပှၤတညီနုၢ်ထံၣ်ဘၣ်အီၤန့ၣ်လီၤ. ကၠိတဖၣ် ပျဲပျၢ်လီၤဝဲ ကၠိဖိသ့ၣ်တဖၣ်, ဝ့ၢ်ဆံးဖိတဖၣ် အိၣ်ကတဲာ်ကတီၤအသး, ဒ်သိးကတူၢ်လိာ်မုာ် ၦၤသမှံၤတဖၣ်, ဒီးဟံၣ်ခိၣ်ဟံၣ်ဃၢၤတဖၣ် ပာ်လီၤ ခးဆ့ၣ်နီၤတဖၣ် လၢဟံၣ်ချၢ, ဒီးသိးထီၣ် တၢ်တဒီတဒၢမဲာ်ဒိးတဖၣ် ဒ်သိးကကွၢ်ဝဲဒၣ် တၢ်လီၤလိၢ်လီၤလးအံၤန့ၣ်လီၤ. ဒ်ကွဲၤထံၣ်ဟူ အၦၤမၤတၢ်ဖိတဖၣ် ဒိပာ်ဖှိၣ်ဟံးန့ၢ် “တၢ်ယူၢ်မုၢ်ဒီတဖျၢၣ်” အတၢ်ဂ့ၢ်တၢ်ကျိၤ, ကမျၢၢ်တဖၣ် အိၣ်ဘှ့ၣ်အိၣ်ဘှီၣ်ဝဲဒၣ် ဒီးထဲတၢ်ကတိၤတထံၣ်ဧိၤလၢ အသီၣ်ဝဲဒၣ် တဘျီဝံၤတဘျီန့ၣ်မ့ၢ်ဝဲဒၣ် “အိ, ယကစၢ်ယွၤဧၢ” န့ၣ်လီၤ.

တၢ်မၤအသးအံၤ, ကဲထီၣ် တၢ်ကမၢကမၣ်လၢယဂီၢ်န့ၣ်လီၤ. ဖဲတၢ်ဆၢကတီၢ်ဒ်သိးအံၤန့ၣ်ဘၣ်မနုၤအဃိ, ၦၤကွၢ်ကီတၢ်တဖၣ် ဃုထၢစံးကတိၤဝဲဒၣ် တၢ်ကတိၤတထံၣ်အံၤလဲၣ်န့ၣ် ယတသ့ၣ်ညါယဲ လီၤတံၢ်လီၤဆဲးဘၣ်. ယဆိကမိၣ်တယာ်ဝဲဒၣ်လၢ ဒ်ၦၤကညီလၢအသံသ့တဖၣ်န့ၣ် ဖဲအဘၣ်လဲၤခီဖျိကွၢ်ဆၢၣ်မဲာ် တၢ်လီၤလိၢ်လီၤလး, လၢအလီၤကမၢကမၣ်န့ၣ်ဒီး, ဖျါလၢအဝဲသ့ၣ် လိၣ်ဘၣ်ဝဲ ၦၤတဂၤဂၤ, လၢကပာ်ပနီၣ်ဝဲ, ကစံးဘျုးစံးဖှိၣ်ဝဲ, ဒီးကဘူၣ်ထီၣ်ဘါထီၣ်ဝဲအဂီၢ်န့ၣ်လီၤ. ဖဲပကွၢ်ထီၣ်ဆူ မူကပိာ်လိၤန့ၣ်ဒီး, ပကမၢကမၣ်ဝဲဒၣ် ဒ် စီၤဒၤဝံး ကွဲးပာ်ဖျါဝဲဒၣ် “မူခိၣ်လီၣ်ဖျါထီၣ်ယွၤအလၤကပီၤႇ ဒီးတၢ်လၢအမၤဝဲလၢအစုန့ၣ် မူကပိာ်လိၤဒုးနဲၣ်ဝဲ” (စံး ၁၉:၁) အသိးန့ၣ်လီၤ.

စီၤလူၤကၣ်, လၢအကွဲးလံာ်တၢ်သးခုကစီၣ်န့ၣ် ပာ်ဖျါထီၣ် ကစၢ်ယ့ၣ်ၡူး တချုးသံဝဲဒၣ် အဆၢကတီၢ်လၢခံကတၢၢ်, လၢထူၣ်စုညါလိၤအဂ့ၢ်, “ဒီးဘၣ်ဃုနၣ်ရံၣ်ဃၣ်ဃၣ်, ဒီးတၢ်ခံးမးလၢကီၢ်ဒီဘ့ၣ်ညါတုၤလီၤလၢခွံနၣ်ရံၣ်လီၤ. ဒီးမုၢ်ခံးလီၤဝဲ” (၂၃:၄၄-၄၅) န့ၣ်လီၤ. စီၤမးသဲ နီၤဟ့ၣ်ခီလီၤ တၢ်ပာ်ဖျါအံၤလၢ “ဒီးတုၤၦၤသုးဖိတကယၤအခိၣ်တဂၤ, ဒီးၦၤအိၣ်ဒီးအီၤ
တဖၣ် လၢအပၢၤယ့ၣ်ၡူးန့ၣ် ထံၣ်လၢဟီၣ်ခိၣ်ဟူးဝးဝဲ, ဒီးတၢ်မၤအသးတဖၣ်န့ၣ်ဒီး, သူၣ်ပျံၤသးဖုးဝဲဒိၣ်မးႇ ဒီးစံးဝဲဒၣ်, အအံၤတဂၤ,မ့ၢ်မးယွၤအဖိခွါနီၢ်နီၢ်” (မးသဲ ၂၇:၅၄) န့ၣ်လီၤ. အဝဲသ့ၣ် ကအၢၣ်လီၤတူၢ်လိာ်ဝဲလၢ ကစၢ်ယွၤ မ့ၢ်ပှၤလၢအကြၢးတၢ်ဘူၣ်ထီၣ်ဘါထီၣ်အီၤအဂီၢ်န့ၣ် အဝဲသ့ၣ်အိၣ်ဝဲတသ့ဘၣ်န့ၣ်လီၤ.

ယကစၢ်ယွၤဧၢ, လၢတၢ်ဆီၣ်လီၤသး, ဒီလၢတၢ်ကမၢကမၣ်ဖးဒိၣ်အပူၤန့ၣ် ယကဘူၣ်ထီၣ်ဘါထီၣ်နၤလီၤ.