တၢ်ကတိၤလၢ ယနၢ်ဟူအီၤတထံၣ်န့ၣ် စံးဝဲဒၣ် “ပကမၢ ဖိလံၤတဖၣ် ကစူၢ်က့ၤနာ်က့ၤတၢ်အဂီၢ်န့ၣ် တသ့ဘၣ်. တၢ်စူၢ်တၢ်နာ်လၢ ပနာ်အီၤန့ၣ် ဒ်သိးဖိလံၤတဖၣ် ကစူၢ်က့ၤနာ်က့ၤဝဲ အဂီၢ်, ပဟ့ၣ်လီၤ အဝဲသ့ၣ် သ့ဝဲဒၣ်ထဲ တၢ်ဂ့ၢ်ထံးအမ့ၢ်အတီန့ၣ်လီၤ.” တၢ်ကတိၤတထံၣ်အံၤ မ့ၢ်ဝဲဒၣ် တၢ်ကူၣ်ဂ့ၤထီၣ်ထီတမံၤန့ၣ်လီၤ. ဘၣ်ဆၣ်, မ့ၢ်ပကဘၣ်မၤအီၤဒ်လဲၣ်.

လၢတၢ်ဟံးန့ၢ် တၢ်သ့ဖံးမၤမိၢ်ပၢ်, အတၢ်ဟ့ၣ်ကူၣ်အဂီၢ်, ၦၤအါဂၤန့ၣ် တမ့ၢ်ကဃုထၢဝဲဒၣ် ပှၤတၢ်မၢဖိ စီၤပီလူး ဒ်ပှၤအဆိကတၢၢ်တဂၤန့ၣ်ဘၣ်. ကမ့ၢ်သ့ၣ်သ့ၣ်လၢ အဝဲအဖိတအိၣ်အဃိန့ၣ်လီၤ. မိၢ်ပၢ်တဖၣ် ဘၣ်သးနၢ်ဟူဝဲဒၣ် ပှၤလၢအတၢ်လဲၤခီဖျိအိၣ်တ့ၢ်ဝဲ မိၢ်ပၢ်အတၢ်အိၣ်အသး, ပှၤလၢအမၤတ့ၢ်ဝဲ မိၢ်ပၢ်အတၢ်ဖံးတၢ်မၤတဖၣ်, ၦၤလၢအသ့ၣ်ညါ ဖိသၣ်အီနုၢ်ထံလၢ တၢ်မံတၢ်ဂဲၤတအိၣ်အတၢ်ဂ့ၢ်ကီ, ၦၤသးစၢ်ဒိၣ်ထီၣ်သီတဖၣ် အတၢ်ဂ့ၢ်ကီ, ဒီးဖိလၢအတပိာ်ကျဲတဂၤအဂီၢ်, တၢ်ဃ့ဘါထုကဖၣ်န့ၢ်တၢ်သ့ၣ်တဖၣ်န့ၣ်လီၤ. ဘၣ်ဆၣ်, စီၤပီလူး (မ့) စီၤစီလူး တဂၤန့ၣ် အိၣ်ဝဲဒီးတၢ်ဂ့ၢ်တမံၤလၢ ကသိၣ်လိနဲၣ်လိၦၤန့ၣ်လီၤ.

ဒ်သိးကမၤအၢမၤနး ၦၤခရံာ်ဖိတဖၣ်အဂီၢ်န့ၣ် ဖဲ စီၤစီလူး လဲၤဝဲဒၣ် အဆၢကတီၢ်, ကစၢ်ခရံာ် ဟဲနုာ်လီၤဝဲဒၣ်န့ၣ်လီၤ. ၦၤတဂၤအံၤ လီၤဃံၤဝဲလၢဟီၣ်ခိၣ်အဖီခိၣ်, အမဲာ်ချံတထံၣ်တၢ်လၢၤဘၣ် (မၤတၢ် ၉:၁-၉) န့ၣ်လီၤ. တယံာ်ဘၣ်, စီၤအနၤနံ ဟဲတုၤဝဲဆူအအိၣ်, ဒီးဒုးထံၣ်က့ၤအီၤတၢ်, ဒီးဒုးသ့ၣ်ညါဝဲ အမူဒါ, “ပပၢ်သ့ၣ်အကစၢ်ဃုထၢနၤ, ဒ်သိးနကသ့ၣ်ညါအသး, ဒီးနကထံၣ်ဘၣ်ၦၤတီၦၤလိၤတဂၤ, ဒီးနကနၢ်ဟူဘၣ်တၢ်အကလုၢ်သီၣ်လၢ အထးခိၣ်လီၤ. အဂ့ၢ်ဒ်အံၤ, နကကဲထီၣ် အၦၤအုၣ်အသးလၢတၢ်လၢနထံၣ်, ဒီးတၢ်လၢနနၢ်ဟူတဖၣ်, လၢၦၤခဲလၢာ်အမဲာ်ညါ” (၂၂:၁၄-၁၅) န့ၣ်လီၤ. စီၤစီလူး တဂၤ, လၢခံန့ၣ် တၢ်ကိးက့ၤအီၤလၢ စီၤပီလူးန့ၣ် အုၣ်အသးနီၢ်နီၢ်, ဒီးကစၢ်ယွၤဟ့ၣ်လီၤအီၤလၢ သူၣ်ဂ့ၢ်သးကျိၤဖိလံၤစၢၤသွဲၣ်
တဖၣ်န့ၣ်လီၤ. “တၢ်ကွၢ်ထွဲလုၢ်ဒိၣ်ထီၣ်ဖိလံၤကျိၤကျဲ” လၢ စီၤစီလူး စူးကါဝဲန့ၣ် မ့ၢ်တၢ်နီၤဟ့ၣ်ခီတၢ်လၢအထံၣ်ဘၣ်တ့ၢ်ဝဲတဖၣ်, ဒီးကဃ့ထုကဖၣ်န့ၢ်တၢ်အဂီၢ်န့ၣ်လီၤ.

ပကွၢ်ထွဲလုၢ်ဒိၣ်ထီၣ် ပဖိတဖၣ်ဒၣ်ဝဲ, မ့ၢ်ဂ့ၤ, ပတၢ်ဘၣ်ထွဲလိာ်သးဒီးၦၤဂၤ, မ့ၢ်ဂ့ၤန့ၣ် ဒ်သိးအဝဲသ့ၣ် ကစူၢ်က့ၤနာ်က့ၤတၢ်အဂီၢ်, ပမၤတသ့ဘၣ်. လၢအလီၢ်န့ၣ် ပကအုၣ်ပသးလၢ ပတၢ်ကတိၤတဖၣ်, ဒီးပကအိၣ်မူအိၣ်ဂဲၤ ဒ်တၢ်လၢပထံၣ်တ့ၢ်ဝဲ. ဒီးတၢ်လၢပနၢ်ဟူတ့ၢ်ဝဲ အသိးန့ၣ်လီၤ. ဒီးပကဃ့ထုကဖၣ်တၢ်န့ၣ်လီၤ. ပကစၢ်ယွၤ, လၢအဆှၢလီၤ စီၤပီလူး ဆူ ၦၤတခီဘီမုၢ်ဖိတဖၣ်အအိၣ်အံၤ, ဆှၢလီၤစ့ၢ်ကီးပှၤ, ဒ်အတၢ်နဲၣ်ကျဲတမံၤဃီ, ပကဘၣ်မ့ၢ် ပှၤအုၣ်အသး, ဒ်သိးပှၤကစူၢ်က့ၤနာ်က့ၤတၢ်အဂီၢ်န့ၣ်လီၤ. ဝံၤန့ၣ်ဒီး, ဟ့ၣ်လီၤအးလီၤအဝဲသ့ၣ်ဆူ ပပၢ်ကစၢ်ယွၤအအိၣ်, ပှၤလၢအအဲၣ်အဝဲသ့ၣ်န့ၣ်တက့ၢ်.