ယတံၤသကိး ဟိၣ်စ့ (Josè) တဂၤ, ဘၣ်အိၣ်ဝဲဒၣ်လၢ တၢ်ကွၢ်ထွဲပှၤဆူးပှၤဆါအလီၢ် အကျဲလၢ တၢ်အိၣ်မူလၢခံအကတၢၢ်အဆၢကတီၢ်တဖၣ်အဂီၢ်န့ၣ်လီၤ. အပူၤကွံာ်တဘျီ, ဖဲယလဲၤဟးဆူအအိၣ်န့ၣ် အဝဲ အိၣ်သပှ့ၤအမဲာ်, ဒီးအတၢ်ကတိၤအါဘၣ်ဆၣ်, တနွံလဲၤပူၤကွံာ်ဝံၤန့ၣ်ဒီး, အဂံၢ်အဘါဆံးလီၤစှၤလီၤ, ဒီးတစံးကတိၤတၢ်လၢၤဘၣ်န့ၣ်လီၤ. ယလဲၤအိၣ်သကိးအဝဲသ့ၣ်န့ၣ် ယဆၢမုၢ်လၢ်လၢ တၢ်အခီပညီကအိၣ်ဝဲတမံၤမံၤ, လၢအဝဲသ့ၣ်အဂီၢ်အဃိ, ယဆ့ၣ်နီၤဃုာ်ဒီးအီၤ,ဃုာ်ဒီးအဟံၣ်ဖိဃီဖိတဖၣ်န့ၣ်လီၤ. ဖဲယလဲၤအိၣ်သကိးအီၤ, လၢခံအကတၢၢ်တဘျီန့ၣ်ဒီး, ၦၤအိၣ်တ့ၢ် လၢဒၢးပူၤန့ၣ် မ့ၢ်ဝဲဒၣ်ထဲဟိၣ်စ့ဒီးယၤန့ၣ်လီၤ. အကတၢၢ်န့ၣ် ယဆၢထၢၣ်ဟးထီၣ်ကယီကယီဆူ တြဲၤအကတီၢ်, ယအိၣ်ကတီၢ်, ဒီးဃၣ်တရံံးယသး, ဒီးယစံးဘၣ်အီၤလၢ “ယအဲၣ်နၤ,” လၢခံအကတၢၢ်တဘျီန့ၣ်လီၤ. ယတဆၢမုၢ်လၢ်လၢ အဝဲကတဲဆၢက့ၤယၤတၢ်ဘၣ်. ဖဲန့ၣ်, ယထံၣ်လၢ ဟိၣ်စ့ မၤဝးအထးခိၣ်ဖံးဖိ, ဒီးစံးကတိၤစ့ၢ်ကီးဝဲလၢ “ယအဲၣ်နၤ” န့ၣ်လီၤ.

ၦၤတဂၤဒီးတဂၤ, ဘၣ်လီၤမုၢ်လီၤဖးအကတီၢ်, အတၢ်စံးကတိၤဆၢဂ့ၤဆၢဝါတဖၣ်န့ၣ် အိၣ်စဲထီဃာ်ပသး, လီၤစိၤလီၤထီသ့ဝဲန့ၣ်လီၤ. ဖဲ ကစၢ်ယ့ၣ်ရှူး လုၢ်ထီၣ်အသးသမူ, ဒီးဂဲၤဆၢထၢၣ်သမူထီၣ်က့ၤဝံၤ, ဒ်သိးကက့ၤထီၣ်ဆူ အပၢ်အိၣ်လၢမူခိၣ်အဂီၢ်, အိၣ်ကတဲာ်ကတီၤသးအကတီၢ်, မၤလီၤတံၢ် အပျဲၤအဘီၣ်တဖၣ်, ဒီးစံးဝဲဒၣ်, “တၢ်ဟ့ၣ်လီၤလံယၤလၢကယဲၢ်တၢ်စိတၢ်ကမီၤလၢမူခိၣ်, ဒီးလၢဟီၣ်ခိၣ်ချၢ” (မး ၂၈:၁၈) န့ၣ်လီၤ. ဒီးပာ်လီၤတဲာ်တ့ၢ်အတၢ်မၤလိာ် လၢတၢ်ကဘၣ်မၤအီၤလီၤထူလီၤယိာ်, (မ့) မူဒါတၢ်ဖံးတၢ်မၤဖးဒိၣ်တမံၤ, “မၤသးဒ်န့ၣ်ဒီး, လဲၤဒုးကဲထီၣ်ၦၤအကလုာ်တဖၣ်ခဲလၢာ်လၢယပျဲၢ်ယဘီၣ်တက့ၢ်. ဒီးဘျၢအီၤလၢပၢ်, ဒီးဖိခွါ, ဒီးသးစီဆှံအမံၤအပူၤတက့ၢ်. ဒီးသိၣ်လိသီလိအီၤႇ ဒ်သိးအကတိၢ်န့ၢ် ကယဲၢ်တၢ်လၢ ယမၤလိာ်တ့ၢ်သုခဲလၢာ်တက့ၢ်,” ဒီးကစၢ်ခရံာ် အၢၣ်လီၤတ့ၢ်ဝဲ အပျဲၢ်အဘီၣ်တဖၣ်လၢ “ယအိၣ်ဒီးသု ကိးမုၢ်နံၤမုၢ်နၤဒဲး တုၤတၢ်အစိၤကတၢၢ်” (:၁၉-၂ဝ) န့ၣ်လီၤ.

တၢ်အိၣ်လီၤဖး, ကစၢ်ယ့ၣ်ၡူး အတၢ်ကတိၤတဖၣ်န့ၣ် မ့ၢ်ဝဲဒၣ် လၢခ့ခါပဝဲနၤယၤ အဂီၢ်စ့ၢ်ကီးန့ၣ်လီၤ. ဒ်သိးပှၤဂုၤပှၤဂၤ ကလဲၤခီဖျိကလၢၢ်ဘၣ် ယွၤ အတၢ်အဲၣ်, ဒီးအတၢ်ပျၢ်တၢ်ဒဲးဘး, ဒီးကအိၣ်မူအိၣ်ဂဲၤဝဲလၢ ကစၢ်ခရံာ်အဂီၢ်, ဒီးကမုၢ်လၤသးခုဝဲ တၢ်မူအထူအယိာ်ဃုာ်ဒီးခရံာ်, လၢမူခိၣ်ဘီမုၢ်အဂီၢ်, ပကဟံးဃာ်ဂၢၢ်ကျၢၤ အတၢ်မၤလိာ်, ဒီးမ်ပကတၢ်စံၣ်တဲၤတဲလီၤ ခရံာ်အတၢ်သးခုကစီၣ်န့ၣ်တက့ၢ်. ကစၢ်အတၢ်သးခုကစီၣ်န့ၣ် ဂ့ၤဒိၣ်မးအဃိ, ပတဟ့ၣ်ခီဟ့ၣ်နီၤ ၦၤကိးကလုာ်ဒဲးဘၣ်န့ၣ် ပအိၣ်တသ့ဘၣ်န့ၣ်လီၤ.