“တၢ်အိၣ်တဒၢခူသူၣ် အတၢ်အိၣ်မူ” (A Hidden Life) မ့ၢ်တၢ်ဂီၤမူလၢ အဒုးနဲၣ်ဖျါထီၣ် ပှၤအီစတြံယၤ ပှၤထုစံာ်ဖိ ဖါ(န)(စ) ယၣ်ကၤစတဲထၢၣ် (Franz Jägerstätter) အဂ့ၢ်အမ့ၢ်အတီ, ဖဲတၢ်ဒုးဖးဒိၣ် ခံဘျီတဘျီန့ၣ်လီၤ. အဝဲတူၢ်ဘၣ် နၣ်စံၣ် (Nazi) အတၢ်မၤအၢမၤနးတဖၣ်, ဒီးစူၢ်က့ၤနာ်က့ၤ ကစၢ်ယ့ၣ်ရှူး, ဒ်အကစၢ်, ဒီးကအိၣ်တီအိၣ်လိၤဝဲလၢ (Hitler) န့ၣ် ဖါ(န)(စ) ဂ့ၢ်လိာ်ဝဲအဃိ, ဘၣ်တၢ်ဖီၣ်ဒုးဃာ်အီၤန့ၣ်လီၤ. လၢတၢ်သူၣ်ဒုသးဒုအပူၤန့ၣ် မ့ၢ်လၢ ဖါ(န)(စ) အိၣ်ဂၢၢ်ဆိးကျၢၤဝဲလၢအတၢ်နာ်အံၤအဃိ, တၢ်ဂီၤမူလၢအိၣ်လီၤတဲာ်တဖၣ်န့ၣ် ဒုးနဲၣ်ဖျါထီၣ်ဝဲလၢ ဖါ(န)(စ) ဘၣ်တၢ်မၤအၢမၤနးအီၤအဂ့ၢ်န့ၣ်လီၤ.

ဖါ(န)(စ) ထီဒါဝဲ (Hitler) အဃိ, ပှၤသဝီဖိတဖၣ်န့ၣ် ကွၢ်တလီၤထံၣ်ဆံးအီၤန့ၣ်လီၤ. လၢဃိာ်ပူၤန့ၣ် ပှၤအိၣ်ဒီးအီၤတဒၢးဃီတဖၣ်နံၤဘၣ်ဖၣ်လဲအီၤ, ဒီးတၢ်ဘူၣ်တၢ်ဘါအခိၣ် စီၤသီတဖၣ်ဒၣ်လဲာ်, ထံၣ်အီၤဒ်ပှၤအသးတဆးတဂၤန့ၣ်လီၤ. လၢတၢ်ဂီၤမူအပူၤ, ပှၤတဂၤ စံးဘၣ်အီၤ ” တၢ်လၢနစံးကတိၤတဖၣ်န့ၣ် ကစၢ်ယွၤ တပာ်သူၣ်ပာ်သးဘၣ်. ကွၢ်ဝဲဒၣ်တၢ်အိၣ်လၢနသးကံၢ်ပူၤ,” ဒီးဒ်သိး ဖါ(န)(စ) ကပူၤဖျဲးလၢအသးသမူအဂီၢ်, ကွဲန့ၢ်လွဲန့ၢ်အီၤလၢကစံးပတြၢၤ (Hitler) န့ၣ်လီၤ. ဖါ(န)(စ) အသးကလၢၢ်ဘၣ်ဝဲ ဒ်တၢ်ဆီၣ်သနံးအီၤလၢကစူးကွံာ်ညိကွံာ်အတၢ်ပာ်သူၣ်ပာ်သးအဃိ, ဃ့ထုကဖၣ်ဝဲလၢ “ယလၢၢ်, ဒီးယတိာ်, ဒ်သိးယကပိာ်နခံအဂီၢ်, ဟ့ၣ်လီၤလၢ်ဘၣ်ယၤ တၢ်ဂံၢ်တၢ်ဘါတက့ၢ်” န့ၣ်လီၤ.

ထါစံးထီၣ်ပတြၢၤ ၃၁ န့ၣ် မ့ၢ်ဝဲဒၣ် ပှၤလၢအဘၣ်ကွၢ်ဆၢၣ်မဲာ် တၢ်အၢတၢ်သီအစိကမီၤတဂၤ အတၢ်ထုကဖၣ်န့ၣ်လီၤ. ဖဲ စီၤဒၤဝံး ဘၣ်တၢ်ကူၣ်အၢကူၣ်သီအီၤအကတီၢ်, ဃ့ကညး ကစၢ်ယွၤလၢ “ကဲထီၣ်လၢၢ်အတိာ်လၢယဂီၢ်, တိာ်အဟံၣ်လၢ ယကတုၤလၢ တၢ်အုၣ်က့ၤခီၣ်က့ၤအဂ့ၢ်န့ၣ်တက့ၢ်.” (:၂, ၄, ၁၁) န့ၣ်လီၤ. အတၢ်အိၣ်မူလၢအအိၣ်ပှဲၤဒီးတၢ်သးဆါ, ဒီးတၢ်မၤအၢမၤနးအီၤ, ခီဖျိပှၤအိၣ်လၢအခိၣ်အဃၢၤတဖၣ်, ဒီးဖဲတၢ်ဆီၣ်သနံးတဖၣ်အပူၤန့ၣ် စီၤဒၤဝံး ဃုထၢအိၣ်မူတီတီလိၤလိၤဒီးကစၢ်ယွၤ (:၃,၁၀-၁၃) န့ၣ်လီၤ. စီၤဒၤဝံး အတၢ်ထုကဖၣ် “ယပာ်ယသးလၢနစုပူၤ” (:၅) န့ၣ် ကစၢ်ယ့ၣ်ရှူး စံးကတိၤက့ၤဝဲဒၣ်လၢ ထူၣ်စုညါအလိၤ (လူၤ ၂၃:၄၆) န့ၣ်လီၤ.

တၢ်သူၣ်တီသးလိၤလၢ အလုၢ်ဒိၣ်အပှ့ၤဒိၣ်အဂီၢ်, ကစၢ်ယွၤ တဟ့ၣ်လီၤဝဲခိၣ်ဖးန့ၣ် တအိၣ်ဘၣ်. ဖါ(န)(စ) ယၣ်ကၤစတဲထၢၣ် အိၣ်တီအိၣ်လိၤဝဲ တုၤအကတၢၢ်န့ၣ်လီၤ. ဒ်ကစၢ်ယ့ၣ်ရှူးအသိး, ဘၣ်ဟ့ၣ်လီၤအသးသမူ လၢအတၢ်သးတီအဃိန့ၣ်လီၤ. ဘၣ်ဆၣ်, ဒ်ကစၢ်ယ့ၣ်ရှူး ဂဲၤဆၢၣ်ထၢၣ်သမူထီၣ်က့ၤလၢ တၢ်သွၣ်ခိၣ်အသိး, မုၢ်တနံၤန့ၣ်ဖါ(န)(စ) စ့ၢ်ကီး, ကဂဲၤဆၢထၢၣ်သမူထီၣ်က့ၤဝဲဒၣ်န့ၣ်လီၤ.