ဖဲတၢ်မၤလိလိာ်ကွဲ ဖျၢၣ်သွ့အကတီၢ်, အဲ(န)ရ့း (Enrique) အပၢ်မၢအီၤ, ဒီးအတံၤသကိးတဖၣ်လၢ ကဒုးနဲၣ်ဖျါထီၣ် တၢ်စိာ်ဟ့ၣ်ခီ ဖျၢၣ်သွ့လိၤလိၤဘၣ်ဘၣ်ဒ်လဲၣ်န့ၣ်လီၤ. အဲ(န)ရ့း လိာ်ကွဲမၤလိအသး လၢအါနွံအါသီအတီၢ်ပူၤဘၣ်ဆၣ်, ဘၣ်ယိၣ်ဝဲလၢ ကမၤကမၣ်ဘၣ်ဖုးတၢ်န့ၣ်လီၤ. အဝဲဃ့ထုကဖၣ်တၢ်, ဒီးတၢ်ဃ့ၢ်စိာ်ခီဖျၢၣ်သွ့န့ၣ် မၤဝဲဒၣ် ဂ့ၤဂ့ၤဘၣ်ဘၣ်ဝံၤ, ဒီးစံးဝဲဒၣ်လၢ ” ကစၢ်ယွၤဧၢ, တၢ်ဘျုးန့ၣ်လီၤ.” လၢခံ, အပၢ်စံးဘၣ်အီၤလၢ ” ဖိခွါဧၢ, မ့ၢ်လၢနဂုာ်ကျဲးစၢးအဂ့ၤကတၢၢ်အဃိ, ယပာ်ကဖၢလၢယသးန့ၣ်လီၤ. ဘၣ်ဆၣ်, မ့ၢ်လၢနဃ့ထုကဖၣ်, ဒီးစံးဘျုးစံးဖှိၣ် ကစၢ်ယွၤအဃိ, ယပာ်ကဖၢလၢယသးအါန့ၢ်အန့ၣ်တက့ၢ်” န့ၣ်လီၤ. အဲ(န)ရ့း စံးဆၢဝဲလၢ “ဒ်နမၤတ့ၢ်ဝဲအသိး, ယမၤပိာ်ထွဲဝဲဒၣ်” န့ၣ်လီၤ.

လၢတၢ်စံၣ်စိၤတဲစိၤဒီတကတီၢ်န့ၣ် ကစၢ်ယွၤ ဖံးတၢ်မၤတၢ်, ခီဖျိလၢစၢၤသွဲၣ်သီတစိၤဘၣ်တစိၤ အတၢ်ရ့လိာ်ဘၣ်ထွဲလိာ်သး, လၢအမုာ်အဂ့ၤန့ၣ်လီၤ. တၢ်စိာ်ခီဟ့ၣ်လီၤ အတၢ်မၤလိာ်, ဒီးအတၢ်စံၣ်ညီၣ်တဖၣ်ဆူ ပှၤအံၣ်စရ့လးဖိတဖၣ်န့ၣ် ယွၤ စံးဝဲဒၣ်လၢအသုတမၤအါထီၣ် (မ့) အသုတမၤစှၤလီၤနီတမံၤဘၣ် (၅ မိၤ ၄:၁-၂) န့ၣ်လီၤ. ကစၢ်ယွၤ စံးဝဲဒၣ်လၢ “တိၢ်န့ၢ်ဒီးမၤတက့ၢ်. အဂ့ၢ်ဒ်အံၤ, အဝဲန့ၣ် မ့ၢ်သုတၢ်ကူၣ်သ့ကူၣ်ဘၣ်, ဒီးသုသူၣ်ဆးသးဆး လၢပှၤကလုာ်တဖၣ်အမဲာ်ညါ” (:၆) န့ၣ်လီၤ. ဘၣ်ဆၣ်, ကစၢ်ယွၤ အသးအိၣ်ဝဲလၢ ပှၤကလုာ်အဂုၤအဂၤတဖၣ် ကထံၣ်ဝဲ အပှၤတကလုာ်ဒ်လဲၣ်အဂီၢ်န့ၣ် စံးဝဲဒၣ်လၢ “ဒီးဘိးဘၣ်သ့ၣ်ညါ နဖိခွါ, ဒီးနဖိခွါအဖိခွါတဖၣ်တက့ၢ်” (:၉) န့ၣ်လီၤ. ဘၣ်မနုၤအဃိလဲၣ်. ဒ်သိးအပှၤဂီၢ်မုၢ်တဖၣ် “ကမၤလိတၢ်ပျံၤယွၤ,” ဒီးဒ်သိး “ကသိၣ်လိအဖိအလံၤ” (:၁၀) အဂီၢ်န့ၣ်လီၤ.

ဒ်သိးပကစိာ်ခီဟ့ၣ်နီၤလီၤ တၢ်စူၢ်တၢ်နာ်လၢ အိၣ်ပှဲၤဒီးသးစီဆှံ-အစိအကမီၤဆူ ပှၤသးစၢ်တဖၣ်အအိၣ်န့ၣ် တလိၣ်လၢ ပကဘၣ်ကဲထီၣ် မိၢ်ပၢ် (မ့) ပှၤမၤဖိသၣ်တၢ်သးခုကစီၣ်အတၢ်မၤန့ၣ်ဘၣ်. ပမ့ၢ်ဃ့ထုကဖၣ်န့ၢ်တၢ် လၢပှၤသးစၢ်တဖၣ်အဂီၢ်, (မ့) ပှၤသူၣ်ဘီၣ်သးစၢ် အဟံၣ်ဒူၣ်ဃီထၢတဖၣ်အဂီၢ်, ကတဲာ်ကတီၤန့ၢ် လံာ်လဲၢ်ဂံၢ်ခီၣ်ထံးတဖၣ်လၢအကဒုးဒိၣ်ထီၣ် အဝဲသ့ၣ်နီၢ်သးအဂံၢ်ဘါ, (မ့) ဟ့ၣ်ဂံၢ်ဟ့ၣ်ဘါ အဝဲသ့ၣ်န့ၣ်ဒီး, ကစၢ်ယွၤ ကစူးကါ ပတၢ်ရ့လိာ်ဘၣ်ထွဲလိာ်သး, လၢအမုာ်အဂ့ၤတမံၤအံၤ, ဒ်သိးဒီးကဒိၣ်စိဒိၣ်ကမီၤဝဲဒၣ် စၢၤသွဲၣ်သီတစိၤဘၣ်တစိၤ, လၢကဟဲပိာ်ထွဲထီၣ်အခံတဖၣ်န့ၣ်လီၤ.