ပှၤမိာ်ကိဖိ တၢ်ဒုးတၢ်ယၤအကစၢ် ကၠ့(န)ကၠ့းခၣ်(န) (Mongolian warlord Genghis Khan [၁၁၆၂-၁၂၂၇]) န့ၣ် တချုးလၢအမံၤဟူထီၣ်သါလီၤအကတီၢ်, လၢအဒူၣ်ဖိထၢဖိအကျါ, ဒ်သိးကဒိးန့ၢ်ဝဲ ခိၣ်နၢ်အလီၢ်အလၤအဂီၢ်န့ၣ် မၤသံဝဲဒၣ် အဒီပုၢ်ဝဲၢ်-သွံၣ်တဝာ် (half brother) န့ၣ်လီၤ. ဖဲအဝဲဟံးန့ၢ်မၤဂၢၢ်မၤကျၢၤ အတၢ်စိတၢ်ကမီၤဝံၤ, တ့သူၣ်ထီၣ်ဝဲ ဘီမုၢ်ဖးဒိၣ်န့ၣ် လဲၢ်န့ၢ်ဒံး အလဲးစဲ(န)ဒါ (Alexander the Greats) အဘီမုၢ်, စးထီၣ်လၢ အ့ရှၢၣ်-ပစံးဖ့း (Asia Pacific) ပီၣ်လဲၣ်ကၢၢ်နံၤ, ဒီးဆူ ကီၢ်ယူရပၤ မုၢ်ထီၣ်တကပၤန့ၣ်လီၤ. ခီဖျိလၢတၢ်ဒုးတၢ်ယၤ အကျိၤကျဲအၢအၢသီသီတဖၣ်, လၢတၢ်သးကညီၤတအိၣ်အပူၤ, ကၠ့(န)ကၠ့းခၣ်(န)ဒီးအသုးမုၢ်ဖးဒိၣ် (Golden Horde) တဖၣ်, ဖဲအလဲၤတုၤဝဲ တၢ်လီၢ်တပူၤလၢ်လၢ်န့ၣ် ပာ်လီၤတဲာ်တ့ၢ်ဝဲဒၣ် တၢ်သံတၢ်ပှၢ်, ဒီးတၢ်ဟးဂူာ်ဟးဂီၤဒိၣ်ဒိၣ်မုၢ်မုၢ်န့ၣ်လီၤ. အသုးမုၢ်တဖုအံၤ မၤသံမၤဟးဂီၤတၢ်နးနးကျံးကျံးန့ၣ် တၢ်ကထိၣ်သတြီၤအီၤအဂီၢ်, လၢတၢ်စံၣ်စိၤတဲစိၤန့ၣ် တအိၣ်လၢၤဘၣ်န့ၣ်လီၤ.

ခ့ခါအဆၢကတီၢ်န့ၣ် ပဘၣ်ကွၢ်ဆၢၣ်မဲာ် ဒုၣ်ဒါအၢသီန့ၢ်ဒံး သုးမုၢ်သံၣ်ဘိတဖၣ်, ဒုၣ်ဒါလၢ အဲၣ်ဒိးမၤနၢၤ, မၤဟးဂီၤ ပနီၢ်သးတဖၣ်န့ၣ်လီၤ. ပှၤတၢ်မၢဖိ စီၤပ့းတရူး ဟ့ၣ်ပလီၢ်ပှၤလၢ “ကီၤသုသးတက့ၢ်. ဆိးသီတက့ၢ်. အဂ့ၢ်ဒ်အံၤ, ဒ်ခ့ယုၢ်ကညီၤရူၢ်ရူၢ်အသိးန့ၣ်, သုဒုၣ်သုဒါမုၣ်ကီၤလံၢ် ဟးဝ့ၤဝီၤ ဃုပှၤလၢ အကယူၢ်လီၤဝဲ” (၁ ပ့း၅:၈) အဂီၢ်န့ၣ်လီၤ. ပဒုၣ်ပဒါမုၣ်ကီၤလံၢ်န့ၣ် ဒ်ပှၤသုးဖိလၢအဒုးတၢ်ဆူၣ်ဒိၣ်မးတဂၤအသိး, ကူၣ်အၢမၤဟးဂီၤတၢ်သ့ဒိၣ်မး, ဒီးတၢ်ဘၣ်ယိၣ်အလီၢ်အိၣ် ဒိၣ်အါန့ၢ်ဒံး, ပကဘှါဆှဲမၤနၢၤအီၤလၢပနီၢ်ကစၢ်ဒၣ်ဝဲ တညီဘၣ်န့ၣ်လီၤ. ဘၣ်ဆၣ်, ပကမုၢ်လၢ်တၢ်အဂီၢ်, တၢ်ဂ့ၢ်ဖးဒိၣ်အိၣ်ဝဲဒၣ်န့ၣ်လီၤ. ပှၤတၢ်မၢဖိ စီၤယိၤဟၣ် ကွဲးပာ်ဖျါဝဲ, “ပှၤအိၣ်လၢသုပူၤဒိၣ်န့ၢ် ပှၤအိၣ်လၢဟီၣ်ခိၣ်အပူၤတက့ၢ်” (၁ ယိၤ ၄:၄) န့ၣ်လီၤ. “ပှၤအိၣ်လၢသုပူၤ” စံးတၢ်န့ၣ် မ့ၢ်ဝဲဒၣ် သးစီဆှံကစၢ်ဒၣ်ဝဲန့ၣ်လီၤ. ပကပျံၤ ပနီၢ်သးအဒုၣ်အဒါအဂီၢ်, အလီၢ်တအိၣ်ဘၣ်န့ၣ်လီၤ.

ပမ့ၢ်သန့ၤလီၤပသးလၢ သးမုၢ်စီဆှံကစၢ်န့ၣ်ဒီး, တၢ်နာ်န့ၢ်လီၤသး ကအိၣ်ဝဲဒၣ်လၢ တၢ်ဒီဒၣ်ပၢၤဃာ် ပတၢ်အိၣ်မူတဖၣ်လၢ ပှၤအဲၣ်ဒိးမၤနၢၤမၤဟးဂီၤပနီၢ်သးတဖၣ်တဂၤအအိၣ်န့ၣ်လီၤ. ပကစၢ်ယွၤန့ၣ် ဒိၣ်ဝဲဒၣ်န့ၣ်လီၤ. ကယဲၢ်တၢ်ကိးမံၤဒဲးအပူၤ, ကစၢ်ယွၤကအိၣ်ဒီးပှၤန့ၣ် ပနာ်န့ၢ်အီၤသ့ဝဲဒၣ်န့ၣ်လီၤ.