ပါပလိ (Pablo) အပၢ်န့ၣ် မ့ၢ်ပှၤအိသံး, ဒီးအမိၢ်န့ၣ် မၤအၢမၤသီအီၤအဃိ, အဝဲ ဟးထီၣ်လၢအဟံၣ်, ဖဲ ခွါလိၣ်ဘိအကတီၢ်န့ၣ်လီၤ. အဝဲလဲၤအိၣ်ဆိးဝဲလၢ အဖါတံၢ်အဟံၣ်, ဖျိထီၣ် ဝဲဒၣ် တီၤထီကၠိဝံၤ, ဆီဟံၣ်ဆီဃီ, ဒီးဒိးန့ၢ်ဝဲ အဖိသၢဂၤန့ၣ်လီၤ. ဘၣ်ဆၣ်, တၢ်လၢအလီၤသးအုးန့ၣ် (Pablo) စ့ၢ်ကီး, အိၣ်မူအိၣ်ဂဲၤဝဲဒၣ် ဒ်တၢ်အိၣ်မူလၢ အမၤဟးဂူာ်ဟးဂီၤတၢ်, လၢအပူၤကွံာ်, တၢ်လၢအဃ့ၢ်ပူၤဖျဲးဝဲန့ၣ်လီၤ. အတၢ်သးစဲထီ တၢ်အိမူၤသံး, ဒီးအတၢ်မၤအၢမၤသီတၢ်န့ၣ် မၤလီၤဖးကွံာ် အဟံၣ်ဒူၣ်ဃီထၢန့ၣ်လီၤ. တယံာ်ဘၣ်, အတၢ်ဆီဟံၣ်ဆီဃီ, အဟံၣ်ဖိဃီဖိ, အတၢ်ဖံးတၢ်မၤ, ဒီးအဟံၣ်တဖၣ် ကယဲၢ်တၢ်ခဲလၢာ်န့ၣ် လီၤမၢ်ကွံာ်ဝဲဒၣ်န့ၣ်လီၤ. အဝဲ ပာ်ဖျါဝဲဒၣ်လၢ”ယတၢ်အိၣ်မူန့ၣ် အၢဝဲသီဝဲ, ဒီးနးအါထီၣ်ဝဲဒိၣ်ဒိၣ်ကလဲာ်” န့ၣ်လီၤ.
အကတၢၢ်န့ၣ် လၢတၢ်မၤဂ့ၤထီၣ်က့ၤအတၢ်အိၣ်မူအဂီၢ်, ဟံးန့ၢ်တၢ်မၤစၢၤ ခီဖျိလၢတၢ်ယါဘျါအကျိၤကျဲန့ၣ်လီၤ. “ယတၢ်အိၣ်မူန့ၣ် တပိာ်ကျဲဘၣ်အဃိဒီး, ကစၢ်ယွၤ အိးထီၣ်တြဲၤလၢယဂီၢ်” န့ၣ်လီၤ. ဘၣ်ဖဲမုၢ်တနံၤန့ၣ် ဖဲအဝဲဃ့ဘါထုကဖၣ်တၢ်ဝံၤန့ၣ်ဒီး, အသးကလၢၢ်ဘၣ် ကစၢ်ယွၤ အိၣ်ဒီးအီၤ, ခီဖျိလၢန့ဆၢၣ်အတၢ်ဃံတၢ်လၤန့ၣ်လီၤ. တယံာ်ဘၣ်, အပၢ်အတၢ်အိၣ်မူ ဆီတလဲအသးန့ၣ် အဖိမုၣ်အဆံးကတၢၢ်တဂၤ သ့ၣ်ညါပာ်သူၣ်ပာ်သးဝဲအဃိ, အိၣ်ဃူအိၣ်ဖိးက့ၤဒီးအပၢ်န့ၣ်လီၤ. မုၢ်မဆါတန့ၤအံၤ, (Pablo)တဂၤ ဂုၢ်ကျဲးစၢးဃုထံၣ်န့ၢ်ဝဲ အဖိအဂၤတဖၣ် ကနာ်န့ၢ်အီၤအဂီၢ်န့ၣ်လီၤ.
မ့ၢ်လၢယွၤအပှၤဂီၢ်မုၢ်တဖၣ် တဒိကနၣ် ကစၢ်ယွၤအဃိ, ဘၣ်တၢ်စိာ်မၢကဲကုၢ်ဆူ ဘၤဘူလိၣ်အထံကီၢ်အဃိ, ဖဲလံာ်သးသယုၢ်တၢ်အပူၤန့ၣ် ဝံယံးရမံယၤ စံးဝဲဒၣ်လၢ “သ့ၣ်နီၣ်ထီၣ်က့ၤ ယတၢ်နးတၢ်ဖှီၣ်, ဒီးတၢ်အၢလၢအဘၣ်ယၤ, သဘူးအပၤစံၣ်တူးဒီးတၤသၣ်ခၣ်န့ၣ်တက့ၢ်… ယသးသ့ၣ်နီၣ်ထီၣ်က့ၤဒံးအီၤ ဒီးဆီၣ်လီၤအသးလၢယပူၤ” (သးသယုၢ် ၃:၁၉-၂၀), ဒီးပာ်ဖျါထီၣ်ဝဲ တၢ်သူၣ်အုးသးအုးလၢ အပှၤဂီၢ်မုၢ်အတၢ်နးတၢ်ဖှီၣ်အဂီၢ်န့ၣ်လီၤ. ဒ်ပှၤအံၣ်စရ့လးဖိတဖၣ်အသိး, ပါပလိ အိၣ်ယံၤဒီးယွၤစ့ၢ်ကီးန့ၣ်လီၤ. ဒ်ဝံယံးရမံယၤ စံးဝဲဒၣ် “မ့ၢ်ယွၤအဘျုးအဖှိၣ်, မ့ၢ်အသးတတူာ်ဘၣ်သတးဒီး, ပတတုၤဘၣ်လၢ တၢ်ဟးဂူာ်ဟးဂီၤဘၣ်လီၤ. အဘျူးအဖှိၣ်အသီအိၣ်ဝဲကိးဂီၤဒဲးလီၤ. နမၤထီနကလုၢ်လီၤတံၢ်လီၤဆဲး” (:၂၂-၂၃) အသိး, ပါပလိ ဃုထံၣ်န့ၢ်ဝဲ တၢ်မုၢ်လၢ်လၢ ကစၢ်ယွၤန့ၣ်လီၤ.
ဒ်ပါပလိအသိး, ပှၤအံၣ်စရ့လးဖိတဖၣ် ဒိးန့ၢ်ဝဲဒၣ် တၢ်အိၣ်မူသီသံၣ်ဘှဲန့ၣ်လီၤ. ပဃၣ်တရံးက့ၤပတၢ်အိၣ်မူဆူ ယွၤအအိၣ်, ဒီးဃုထံၣ်န့ၢ် တၢ်မုၢ်လၢ်သ့ဝဲဒၣ်န့ၣ်လီၤ.