ကၤဆူၣ်တိၣ် (Kazuto) ဒီးအမါ မံၣ်ကံၣ်ဝၣ် (Migiwa) အိၣ်ခိးဝဲဒၣ် (Ultrasound) အစၢ, လၢတၢ်သူၣ်ကိၢ်သးဂီၤအပူၤန့ၣ်လီၤ. မံၣ်ကံၣ်ဝၣ် အသူၣ် ဆိးက့တ့ၢ်ဝဲ ခွံလါဃၣ်ဃၣ်အဃိ, ကဘၣ်ဆီတလဲဝဲဒၣ်အသူၣ်န့ၣ်လီၤ. ကၤဆူၣ်တိၣ် မ့ၢ်ဟ့ၣ်လီၤဝဲ အသူၣ်အကူာ်အက့န့ၣ် သ့ဝဲဘၣ်ဆၣ်, တၢ်လၢအကါဒိၣ်တမံၤန့ၣ် မံၣ်ကံၣ်ဝၣ် အသးဖျၢၣ် အဂံၢ်အဘါကဘၣ်ဆူၣ်ဝဲဒၣ်န့ၣ်လီၤ. လၢခံကတၢၢ်တဘျီ, တၢ်ဒိ (Ultrasound) အစၢ ပာ်ဖျါဝဲဒၣ် အသးဖျၢၣ်န့ၣ် ဂ့ၤထီၣ်ဝဲတဆံးတက့ၢ်န့ၣ်လီၤ. မ့မ့ၢ်ခဲအံၤတဘျီန့ၣ် တၢ်အစၢ ဘၣ်ကဖျါဂ့ၤထီၣ်ဝဲဧါ.

လၢတၢ်သးဟးဂီၤအပူၤန့ၣ် အသးဖျၣ်အစၢဟဲဖျါဝဲဒၣ် အနးကတၢၢ်န့ၣ်လီၤ. ကၤဆူၣ်တိၣ် စံးဝဲလၢ “ယမါလၢအဟီၣ်တဂၤန့ၣ် ယမၤမုာ်ထီၣ်အီၤဝံၤ, ယဟီၣ်စ့ၢ်ကီးဝဲဒၣ်န့ၣ်လီၤ. ဘၣ်ဆၣ်,… ဖဲပမုၢ်လၢ်ကွၢ်စိတၢ်အကတီၢ်န့ၣ် ပမ့ၢ်တထံၣ်ဘၣ် တၢ်အိၣ်အသးလီၤလီၤဆီဆီဒၣ်လဲာ်, မ့ၢ်လၢကစၢ်ယွၤ မၤတၢ်လီၤလိၢ်လီၤလးတမံၤမံၤအဃိ, ပမုၢ်လၢ်ကွၢ်စိတၢ်န့ၣ် တမ့ၢ်တၢ်မၤလၢာ်ကလီ တၢ်ဆၢကတီၢ်ဘၣ်” န့ၣ်လီၤ.

ကၤဆူၣ်တိၣ် နာ်န့ၢ်ဝဲဒၣ် ကစၢ်ယွၤန့ၣ် လဲၤသဃဲၤလိာ်အသး, ဒ်စီၤပၤစီၤဒၤဝံး အတၢ်နာ်န့ၢ်ယွၤအသိးန့ၣ်လီၤ. စီၤဒၤဝံး ကွဲးဝဲဒၣ်, “မုၢ်လၢ်တၢ်လၢယွၤတက့ၢ်. ပာ်ဆူၣ်နဂံၢ်နဘါတက့ၢ်. ဒီးမ်အဒုးဆူၣ်ထီၣ်နသးအဂံၢ်အဘါတက့ၢ်. ဒီးမုၢ်လၢ်တၢ်လၢယွၤတက့ၢ်” (စံး ၂၇:၁၄) န့ၣ်လီၤ. အဂ့ၢ်ဒ်အံၤ, ယွၤမ့ၢ် “ပတၢ်ကပီၤ,” “ပတၢ်အုၣ်က့ၤခီၣ်က့ၤ,” ဒီး “ပသးသမူ အဂံၢ်အဘါ” (:၁) န့ၣ်လီၤ. ဖဲပသးသမူ တၢ်ခံးတၢ်နၤ အသးကံၢ်ပူၤဒၣ်လဲာ်, (:၃) ကဟ့ၣ်လီၤပှၤ တၢ်မုၢ်လၢ်န့ၣ် ပနာ်န့ၢ်ကစၢ်ယွၤသ့ဝဲဒၣ်, လၢပတၢ်ကီတၢ်ခဲတဖၣ်အပူၤန့ၣ်(:၁၃), ကစၢ်ယွၤ ကမၤမုာ်ထီၣ်က့ၤပှၤ, ဒီးကမၤဘံၣ်မၤဘၢပှၤ, ပာ်ခူသူၣ်ပှၤလၢအလီၢ်ခူသူၣ်လၢအဒဲပူၤ (:၅) န့ၣ်လီၤ.

ကစၢ်ယွၤ ကစံးဆၢဝဲ ပတၢ်ထုကဖၣ်အဂီၢ်န့ၣ်, ဖျါလၢတၢ်ဆၢကတီၢ်န့ၣ် ယံာ်တ့ၢ်ဝဲဘၣ်ဆၣ်, ပနာ်န့ၢ် ကစၢ်ယွၤ အသူးသ့ၣ်ကံၢ်စီ, လၢအဆီတလဲၤအသးတသ့ဘၣ်တဂၤအလိၤ, သ့ဝဲဒၣ်လၢလၢပှဲၤပှဲၤန့ၣ်လီၤ. ဖဲပဟဲစိာ် ပသးအတၢ်ဘၣ်ဒိဘၣ်ထံးတဖၣ်ဆူ ကစၢ်ယွၤအအိၣ်န့ၣ်ဒီး, ဒ်သိး “ပကပာ်ဆူၣ်ထီၣ် ပဂံၢ်ပဘါ, ဒီးပကဒုးဆူၣ်ထီၣ်သး အဂံၢ်အဘါ, ဒီးပကမုၢ်လၢ်တၢ်လၢယွၤ” (:၁၄) အဂီၢ်, မ်ပကနဲၣ်လိပသူၣ်ပသးန့ၣ်တက့ၢ်. ကစၢ်ယွၤ အိၣ်ဒီးပှၤ, ဒီးလၢပတၢ်ဂ့ၤအဂီၢ်, ဖံးတၢ်မၤတၢ်ထီဘိန့ၣ်လီၤ.