ပှၤဖီၣ်အီၣ်မၤအီၣ်ညၣ် စကီး သီ(မ)စဲ(န) (Scott Thompson) တဂၤ, မုၢ်တနၤန့ၣ် ဘၣ်ဖဲလါတကပီၤအကတီၢ်, လဲၤဃုအီၣ်ညၣ် လၢ (Santa Barbara) ပီၣ်လဲၣ်ထံအကျိၤ, ဖဲ (California) အပီၣ်လဲၣ်နံၤန့ၣ်ဒီး, လီၤတဲာ်ဝဲဒၣ်လၢ အစဲးချံလိၤ, ဒီး ကအိၣ်မူဒံးဝဲအဂီၢ်န့ၣ် တသ့ၣ်ညါလီၤအသးလၢၤဘၣ်. ဒ်သိးကချုးန့ၢ်ဝဲ အစဲးချံ အဂီၢ်, အဝဲလူၤပှီၣ်ဝဲဒၣ် ထံဆူၣ်ဆူၣ်ဘၣ်ဆၣ်, မ့ၢ်လၢစဲးချံအကဟၣ်န့ၣ် လဲၤတၢ်အဃိ,လူၤပှီၢ်ဝဲတချုးလၢၤဘၣ်န့ၣ်လီၤ. လၢတၢ်န့ၣ်အဃိ, လၢတၢ်ခံးကျါန့ၣ် အဝဲပှီၢ်ဝဲဒၣ်ဆူ ပှၤခူၣ်ကျဲတံးသိ အပျဲၢ်စီၢ်, အိၣ်ဝဲဒၣ်လၢတၢ်လီၢ်အယံၤန့ၣ်လီၤ. ဖဲအတၢ်မုၢ်လၢ်တဖၣ်စးထီၣ်လီၤမၣ်ဝဲအကတီၢ်န့ၣ်ဒီး, နၢ်ဟူဝဲဒၣ် ထံအသီၣ်လၢအကပၤန့ၣ်လီၤ. ပီၣ်လဲၣ်ဆှီ တဘ့ၣ်န့ၣ် လူၤပှီၢ်သကိးထံ လၢအကပၤတစိၢ်ဖိဝံၤ, ဆီၣ်ဆှၢအီၤကယီကယီဖိဆူ ပျဲၢ်စီၢ်အိၣ်တၢ်အလီၢ်န့ၣ်လီၤ. သီ(မ)စဲ(န) ဘၣ်ပှီၢ်ထံန့ၣ် ကယံာ်ဝဲယဲၢ်နၣ်ရံၣ်, ဒီးပာ်ဖျါထီၣ်ဝဲ ပီၣ်လဲၣ်ဆှီတဘ့ၣ်အံၤ, ဒ် “ကလူးတဂၤ,” လၢအဘၣ်တၢ်ဆှၢလီၤ, ဒီး ကမၤစၢၤအီၤအဂီၢ်န့ၣ်လီၤ.

ပှၤကွဲးလံာ်ဧ့ၤဘြံၤ ပာ်ဖျါထီၣ်ဝဲ ကလူးတဖၣ်ခဲလၢာ်န့ၣ် “မ့ၢ်သးလၢအဒိးမၤအသး, ဒ်သိးအကမၤတၢ်အခ့အပှၤအတၢ်လၢ ပှၤလၢအကန့ၢ်ဘၣ်သါ တၢ်အုၣ်က့ၤခီၣ်က့ၤတဖၣ်အဂီၢ်” (ဧ့ၤ ၁:၁၄) န့ၣ်လီၤ. လံာ်စီဆှံတဆၢအံၤ ဒုးနဲၣ်လီၤဆီဝဲဒၣ် ကစၢ်ယ့ၣ်ရှူး အတၢ်ဒိၣ်တၢ်မုၢ်, ဒီးပညိၣ်ပာ်ဖျါ ကလူးတဖၣ်, ဒ်အမ့ၢ် တၢ်ဘၣ်တ့လီၤလိၢ်လီၤလး, လၢအအိၣ်ဒီးအလၤအကပီၤ, ခါဆူညါယွၤအတၢ်တိာ်ကျဲၤလၢ ကအုၣ်က့ၤခီၣ်က့ၤ ပှၤအဂီၢ်န့ၣ်လီၤ. ကစၢ်ယ့ၣ်ရှူး အုၣ်အသးလၢ “ကယဲၢ်တၢ်ခဲလၢာ်လၢအကလုၢ်အစိအကမီၤ” (:၃) အဂ့ၢ်န့ၣ်လီၤ.

လၢပခိၣ်ပဃၢၤဝးဝး, တၢ်မ့ၢ်တၢ်တီလၢ ပထံၣ်အီၤတန့ၢ်တသ့ တမံၤန့ၣ် မ့ၢ်ဝဲဒၣ် ကစၢ်ယွၤ ဆှၢလီၤမူခိၣ်ကလူးတဖၣ်, ဒ်သိးကမၤစၢၤ ပှၤလၢအသးခုတူၢ်လိာ် ကစၢ်ယ့ၣ်ရှူး အတၢ်သးခုကစီၣ်တဖၣ်အဂီၢ်န့ၣ်လီၤ. ဘၣ်တဘျီဘျီ, မုၢ်နၤတၢ်ခံးတဖၣ်န့ၣ် ကယံာ်ဝဲဒၣ်လၢပဂီၢ်, ဒီးမ့ၢ်ပကဆိကမိၣ်သ့ၣ်သ့ၣ်လၢ ပကလဲၤတၢ်ဆူညါအဂီၢ်, ဘၣ်ကန့ၢ်ကသ့ဧါန့ၣ်လီၤ. ဘၣ်ဆၣ်, တၢ်မၤစၢၤလၢ ပလိၣ်ဘၣ်အီၤန့ၣ် ကစၢ်ယွၤဟ့ၣ်လီၤပှၤထီဘိ, တၢ်မၤစၢၤ, လၢအဆီၣ်ဆှၢက့ၤပှၤဆူအအိၣ်န့ၣ်လီၤ.