အဲး(စ)ဘိၣ် ကမီၣ် (Esbon Kamau) န့ၣ် မ့ၢ်ဝဲဒၣ် ပှၤနီၣ် အုၣ်ဘၣ် (Uber) သိလ့ၣ်တဂၤ, ဒီးဘၣ်လဲၤနီၣ်ဆှၢဝဲဒၣ် ပှၤသးစၢ် ၁၆ နံၣ် တဂၤ လၢကလဲၤပှ့ၤ မီၣ်ထီၣ် ဆဲၣ်ကၢၣ်, လၢအမ့ၢ် အပၢ်အတၢ်ဟ့ၣ်ကနၢၤအီၤအဂီၢ်န့ၣ်လီၤ. ကမီၣ် လဲၤနီၣ်ဆှၢဝဲဝံၤ, ပှၤသးစၢ်ဖိအံၤ ဟးထီၣ်လၢသိလ့ၣ်န့ၣ်ဒီး, ကမီၣ် ပာ်သူၣ်ပာ်သးဝဲဒၣ်လၢ ပှၤသးစၢ် ဖိန့ၣ်သးပ့ၤနီၣ်တ့ၢ် အစ့ထၢၣ်လၢတၢ်လီၢ်ခံ, ပှၤဆ့ၣ်နီၤတၢ်အလီၢ်န့ၣ်လီၤ. စ့ထၢၣ်အပူၤန့ၣ် စ့ဒီလၣ် အိၣ်ဝဲဒၣ် ၈၀၀၀, လၢအကပှ့ၤ မီၣ်တီၣ်ဆဲၣ်ကၢၣ်အဂီၢ်န့ၣ်လီၤ. ပှၤသးစၢ်တဂၤအံၤ အိၣ်ဆိးဝဲဖဲလဲၣ်န့ၣ် ဒ်သိးကသ့ၣ်ညါဝဲအဂီၢ်, ကမီၣ် ဆဲးကျိးဝဲဒၣ် အသိလ့ၣ်ခီပနံၣ်တကီၢ်ခါန့ၣ်လီၤ. တယံာ်ဘၣ်, ကမီၣ် ဆှၢက့ၤဝဲ စ့ထၢၣ်အံၤဆူ ပှၤသးစၢ်ဖိလၢ အစံးဘျုးစံးဖှိၣ်အီၤ, ဒီးအသးမုာ်သးဖှံးထီၣ်က့ၤတဂၤအအိၣ်န့ၣ်လီၤ. “မၤတၢ်အဂ့ၤ, လၢအဆၢအကတီၢ်အဘၣ်န့ၣ်တက့ၢ်. ဒီးတဘၣ်ပျဲလၢ နတၢ်အဲၣ်လီၤသး လုၢ်ဘၢဒိၣ်စိနၤတဂ့ၤ” န့ၣ် မ့ၢ်တၢ်လၢ ကမီၣ် စံးဝဲဒၣ်န့ၣ်လီၤ.

ကမီၣ် ဒုးနဲၣ်ဝဲဒၣ် အတၢ်အိၣ်မူအိၣ်ဂဲၤအတီအလိၤန့ၣ်လီၤ. တၢ်ဟံးန့ၢ်ကလီ ပှၤဂၤအတၢ်, (မ့) တၢ်ဟံးန့ၢ်ခွဲးယာ်လၢ ပှၤဂၤမၤကမၣ်တၢ်အဃိန့ၣ် အဝဲတတူၢ်လိာ်ဝဲဘၣ်. လၢအကမၤတၢ်သ့ၣ်တဖၣ်အံၤအလီၢ်န့ၣ် ကမီၣ် ဃုထၢမၤဝဲ တၢ်အဂ့ၤအဘၣ်ယိယိဖိန့ၣ်လီၤ. လံာ်တၢ်ကတိၤဒိ စံးဘၣ်ပှၤလၢ “ပှၤအတီအလိၤတဖၣ် လဲၤတၢ်ဂၢၢ်ဂၢၢ်ကျၢၤကျၢၤ” န့ၣ်လီၤ. (ကတိၤ ၁၀:၉) (ခ့ခါ-ကညီစှီၤကျိာ်). လၢပသးပူၤန့ၣ် အိၣ်ဝဲဒၣ်ထဲတၢ်မ့ၢ်တၢ်တီတမံၤဧိၤအဃိ, ပမ့ၢ်အိၣ်မူအိၣ်ဂဲၤတီတီလိၤလိၤန့ၣ်ဒီး, တၢ်သ့ၣ်နီၣ်ထီၣ်က့ၤ တၢ်လၢပစံးကတိၤတ့ၢ်ဝဲ ပှၤတဂၤဂၤန့ၣ် တၢ်ဘၣ်ယိၣ်အလီၢ်တအိၣ်နီၤတမံၤဘၣ်. ပမ့ၢ်အိၣ်မူအိၣ်ဂဲၤတီတီလိၤလိၤန့ၣ်ဒီး, လၢပသူးသ့ၣ်လၤကပီၤအဂီၢ်. (မ့) ပတၢ်မၤအစဲတဖၣ် မ့ၢ်ကလူၤပိာ်ထွဲထီၣ်ပခံဧါန့ၣ် ပပျံၤဘၣ်ယိၣ်တၢ်အလီၢ်တအိၣ်ဘၣ်. တၢ်ဘၣ်ယိၣ်အလီၢ်တအိၣ်ဝဲလၢ ပကမ့ၢ် “ပှၤလၢအလဲၤတၢ် ဒၢက့ၣ်ဒၢကူန့ၣ် တၢ်ကမၤဖျါထီၣ်အီၤ” (:၉) အဂီၢ်န့ၣ်ဘၣ်. ပကအိၣ်မူတီတီလိၤလိၤ, ယိယိၤဖိ, လၢအဒုးနဲၣ်ဖျါထီၣ် တၢ်ကူၣ်သ့ အိၣ်ဟဲလၢယွၤန့ၣ်လီၤ. ပအိၣ်ဘံၣ်အိၣ်ဘၢ, ဒီးအိၣ်သဘျ့လၢ ကစၢ်ယွၤအပူၤန့ၣ်လီၤ.

လၢပတၢ်အိၣ်မူအပူၤန့ၣ် ဒ်သိးပကလံာ်အီၣ်လီအီၣ်တၢ်, ဒီးပကဒိၣ်စိမၤနၢၤပှၤဂၤအဂီၢ်, တၢ်လ့ပစီကအိၣ်ဝဲအါမံၤန့ၣ်လီၤ. ဘၣ်ဆၣ်, ကစၢ်ယွၤ အိၣ်ဒိးလၢ ပကလဲၤတၢ်ဒီးအီၤန့ၣ်လီၤ. ပမ့ၢ်လဲၤတၢ်ဒီးယွၤန့ၣ် ပကအိၣ်မူအိၣ်ဂဲၤ တၢ်အိၣ်မူအတီအလိၤ, လၢတၢ်ပာ်တၢ်ကမၣ် အလီၢ်တအိၣ်ဘၣ် (:၂၉) န့ၣ်လီၤ.