လၢတၢ်အိၣ်ဖှိၣ်အပူၤ, ကၤရိၣ် (Carol) ရ့လိာ်သးဒီးပှၤသူၣ်က့သးပှၢ်တဖၣ်, ဒီးတိစၢၤမၤစၢၤဝဲမုာ်ဘၣ်ဆၣ်, ဘၣ်ကွၢ်ဆၢၣ်မဲာ်ဒီးတၢ်မၤနၢၤမၤဃၣ်အီၤလၢ တၢ်အိၣ်ဖှိၣ်ခိၣ်နၢ် ဒိၣ်စိဒိၣ်ကမီၤတဂၤန့ၣ်လီၤ. အသးဘၣ်တံာ်တာ်ဝဲဒၣ်လၢတၢ်ဂ့ၢ်အံၤအဃိ, ဃုထံၣ်န့ၢ်ဝဲ တၢ်ဟ့ၣ်ကူၣ်တဲသကိးတၢ်န့ၣ်လီၤ. တၢ်ဟ့ၣ်ကူၣ်အီၤလၢ ကဆိကတီၢ်ကွံာ် အတၢ်ဖံးတၢ်မၤဘၣ်ဆၣ်, ကၤရိၣ် တအဲၣ်ဒိး “စူးကွံာ်ညိကွံာ်” ပှၤသူၣ်က့သးပှၢ်တဖၣ်န့ၣ်ဘၣ်. တၢ်ဂ့ၢ်ခံမံၤအံၤအဘၢၣ်စၢၤန့ၣ် ကၤရိၣ် တဂၤ ကဘၣ်မၤဝဲဒ်လဲၣ်န့ၣ် တသ့ၣ်ညါဝဲအဃိ, ဃ့တၢ်နဲၣ်ကျဲလၢ ကစၢ်ယွၤန့ၣ်လီၤ. ဒ် ကၤရိၣ် ဟ့ၣ်လီးအးလီၤ အတၢ်ပျံၤတၢ်ဖုးတဖၣ်ဆူကစၢ်ယွၤအစုပူၤန့ၣ်ဒီး, ယွၤမၤမုာ်ထီၣ်က့ၤအီၤ, မၤဂၢၢ်မၤကျၢၤက့ၤအသးန့ၣ်လီၤ. ကစၢ်ယွၤ နဲၣ်လိအီၤလၢ ကလဲၤတဲသကိးတၢ်ဒီးခိၣ်နၢ်လၢ အဒိၣ်စိဒိၣ်ကမီၤတဂၤအံၤ, ဒီးကနာ်န့ၢ်ဝဲ ကစၢ်ယွၤ, လၢတၢ်မၤဘၣ်လိာ်ဘၣ်စးက့ၤတၢ်ဂ့ၢ်ကီအဂီၢ်န့ၣ်လီၤ.
ဖဲယူဒၤအစီၤပၤ, စီၤယဟိရှၤဖး နၢ်ဟူဝဲ ဒုၣ်ဒါအဂံၢ်ဆူၣ်ဘါဆူၣ်တဖၣ် ကဟဲဒုး ဝ့ၢ်ယရူၤရှလ့ၣ်န့ၣ်ဒီး, အဆိကတၢၢ်န့ၣ် ဃ့ထုကဖၣ်တၢ်လၢယွၤန့ၣ်လီၤ. စီၤပၤယဟိရှၤဖး ဃ့သကွံၢ်ကညးဝဲဆူ ယွၤသ့တၢ်လၢာ်တဂၤအအိၣ်, ဒီးစံးဝဲဒၣ်လၢ “ပကစၢ်ဧၢ, ပကမၤ ဒ်လဲၣ်ဒ်လဲၣ်န့ၣ် ပတသ့ၣ်ညါဘၣ်. မ့မ့ၢ်ပမဲာ်အိၣ်ဝဲဆူနအိၣ်” (၂ ကွဲး ၂၀:၁၅) န့ၣ်လီၤ. လၢတၢ်ဒိးသန့ၤလီၤသးဒီးအနီၢ်ကစၢ်အဂံၢ်အဘါဒၣ်ဝဲအလီၢ်န့ၣ် စီၤပၤဒီးပှၤယူဒၤဖိတဖၣ်, ဃုာ်ဒီးအတၢ်ကီတၢ်ခဲတဖၣ်န့ၣ် ဟ့ၣ်လီၤအးလီၤဝဲဆူ ယွၤအစုပူၤ (:၁၈) န့ၣ်လီၤ.
ခီဖျိလၢဝံစီၤယၤဃစလး ကစၢ်ယွၤ စံးဆၢဝဲဒၣ် “ပျံၤတၢ်တဂ့ၤ. ဒီးဘၣ်ယိၣ်တၢ်လၢ ပှၤဂီၢ်မုၢ်ဖးဒိၣ်အံၤအဃိတဂ့ၤ. အဂ့ၢ်ဒ်အံၤ, တၢ်ဒုးသုးန့ၣ် တမ့ၢ်ဘၣ်သုတၢ်ဘၣ်, မ့ၢ်ယွၤ အတၢ်လီၤ” (:၁၅) န့ၣ် ကဲထီၣ်တၢ်န့ၢ်ဂံၢ်န့ၢ်ဘါ, လၢစီၤပၤဒီးပှၤယူဒၤဖိတဖၣ်အဂီၢ်န့ၣ်လီၤ. ကစၢ်ယွၤ မၤလိာ်ဝဲဒၣ် ပှၤယူဒၤဖိတဖၣ်လၢ ကလဲၤထီၣ်ဒုးတၢ်ဘၣ်ဆၣ်, လၢတၢ်မၤနၢၤအဂီၢ်န့ၣ် ကဘၣ်နာ် ကစၢ်ယွၤန့ၣ်လီၤ. ဒ်ကစၢ်ယွၤ စံးဆၢတ့ၢ်လံအဝဲသ့ၣ်အတၢ်ထုကဖၣ် (:၂၀-၂၁) အသိး, စံးထီၣ်ပတြၢၤ ကစၢ်ယွၤ, ဒီးလၢတၢ်နာ်အပူၤန့ၣ် ပှၤယူဒၤဖိတဖၣ် လဲၤထီၣ်ဒုးတၢ်, ဒီးထံၣ်ဝဲဒၣ်လၢ အမၤနၢၤတ့ၢ်လံတၢ်ဒုးတၢ်ယၤ (:၂၄) န့ၣ်လီၤ.
ဖဲပဘၣ်ကွၢ်ဆၢၣ်မဲာ် တၢ်အိၣ်အသးအကီအခဲတဘျီလၢ်လၢ်န့ၣ်ဒီး, လၢတၢ်မၤစၢၤအဂီၢ်န့ၣ် မ်ပကဃ့ထုကဖၣ်ဒီးကွၢ်ထီၣ်ဆူယွၤအအိၣ်န့ၣ်တက့ၢ်. တမ့ၢ်လၢပကမၤန့ၢ် မၤနၢၤတၢ်ထီဘိဘၣ်ဆၣ်, တၢ်ဒုးသုးန့ၣ် မ့ၢ်ကစၢ်ယွၤအတၢ်မၤအဃိ, ဖဲတၢ်ကမၤအသးတမံၤလၢ်လၢ်န့ၣ် ပကပျံၤဘၣ်ယိၣ်တၢ်အလီၢ်တအိၣ်ဘၣ်န့ၣ်လီၤ.