ဘၣ်တနံၤန့ၣ် ယတံၤသကိး အဲလဲး(စ) (Alex) လၢအမ့ၢ်ပှၤဘှီဂ့ၤမၤဂ့ၤတၢ်ကွဲးလံာ်လဲၢ်တဂၤ, ဆိကမိၣ်ဝဲလၢ ပှၤကွဲးလံာ်တဂၤ မ့ၢ်ကကွဲးဆှၢလီၤ လီလံာ်ပရၢတဘ့ၣ်လၢအပှဲၤဒီးတၢ်သူၣ်ဒိၣ်သးဖျိးအပူၤဧါန့ၣ် အိးထီၣ်ကွၢ် အလီလံာ်ပရၢတဖၣ်န့ၣ်လီၤ. အဝဲပဲာ်ထံဘှီဂ့ၤလံာ်တၢ်ကွဲးအံၤလၢတဘျုးလါအတီၢ်ပူၤဝံၤ, ရဲၣ်ကျဲၤဝဲဒီးပှၤမၤပနံာ်ကၤခိၣ်နၢ်, မံၤဟူသၣ်ဖျါတဂၤ, ဒ်သိးကထုးထီၣ်ရၤလီၤဝဲအဂီၢ်န့ၣ်လီၤ. ဘၣ်ဆၣ်, ခီဖျိလၢခီပနံာ်အတၢ်ဂ့ၢ်ကီတဖၣ်အဃိ, ပှၤလၢကစဲကျံးထုးထီၣ်လံာ်လဲၢ်န့ၣ် ဆၢတဲာ်ဝဲလၢ ကပတုာ်ဝဲတၢ်ထုးထီၣ်ရၤလီၤလံာ်တဘ့ၣ်အံၤန့ၣ်လီၤ. အဲလဲး(စ) ဆှၢလီၤ လီလံာ်ပရၢ အတၢ်ကစီၣ်တမုာ်တလၤအံၤဆူ ပှၤကွဲးလံာ်တဂၤအံၤအအိၣ်ဝံၤန့ၣ်ဒီး, အဝဲဘၣ်အိၣ်ကတဲာ်ကတီၤပာ်အသးန့ၣ်လီၤ.
တနွံလဲၤပူၤကွံာ်ဝံၤ, ပှၤကွဲးလံာ်တဂၤအံၤ ကွဲးစံးဆၢက့ၤဝဲဒၣ်လၢ “ယတကွဲးဆှၢက့ၤယတၢ်စံးဆၢတကီၢ်ခါစံးတၢ်န့ၣ်, အဆိကတၢၢ်, မ့ၢ်လၢယအဲၣ်ဒိးကွၢ်ထံ ယတၢ်ကတိၤတဖၣ်, ဒီးကဘၣ်စံးဆၢက့ၤတၢ်ဒ်လဲၣ်အဃိ” န့ၣ်လီၤ. အဝဲပာ်ဖျါထီၣ် အသူၣ်ဟးဂီၤအသးဟးဂီၤအဂ့ၢ်, ဒီးတဲဖျါထီၣ်ဝဲဒၣ် အတၢ်ထံၣ်ဆိကမိၣ်မုာ်မုာ်ခုၣ်ခုၣ်, ဘၣ်ဃးဒီးပှၤစဲကျံးထုးထီၣ်တၢ်တဂၤအံၤ ကြၢးရဲၣ်ကျဲၤဝဲ တၢ်ဂ့ၢ်ကီအံၤဒ်လဲၣ်အဂ့ၢ်န့ၣ်လီၤ.
လၢတၢ်ကူၣ်သ့, ဒီးလၢတၢ်ကွၢ်ဆိကမိၣ်ထံအပူၤ, ပှၤကွဲးလံာ်တဂၤ ကွဲးစံးဆၢက့ၤတၢ်တမံၤအံၤ ယဆိကမိၣ်ပာ်ဒိၣ်အီၤလၢယသးပူၤဒိၣ်မးန့ၣ်လီၤ. အတၢ်ပာ်သူၣ်ပာ်သးန့ၣ် ဆဲးကပီၤဖျါထီၣ်က့ၤ တၢ်လၢလံာ်စီဆှံ ပာ်ဖျါဝဲဒၣ် ပကြၢးစံးကတိၤတၢ်ဒ်လဲၣ်အဂ့ၢ်, လီၤဆီဒၣ်တၢ်, ဖဲပသူၣ်ဒိၣ်သးဖျိးအကတီၢ်န့ၣ်လီၤ. ပမၤတၢ်ဒဲးဘးညီ, ခီဖျိလၢပပျ့ၤန့ၣ်အဃိ, ပှၤတၢ်မၢဖိ စီၤယၤကိာ် စံးဘၣ်ပှၤလၢ “ပကပၢၤပပျ့ၤ” (ယၤ ၁:၂၆, ဒီးကွၢ် ၃:၅-၆) န့ၣ်လီၤ. ဒ်သိးပကနၢ်ပၢၢ်ပှၤဂုၤပှၤဂၤအဂီၢ်, ပကဘၣ်ဒိကနၣ်ဆိ အဝဲသ့ၣ်အတၢ်ကတိၤဂ့ၤဂ့ၤဘၣ်ဘၣ်, တၢ်လၢပကစံးကတိၤတဖၣ်န့ၣ် ပကဃုထၢအီၤ, ဒီးမ့ၢ်ပကြၢးသးဖျိးဧါ, တကြၢးသးဖျိးဧါန့ၣ် ပကဘၣ်ဆိကမိၣ်ထီၣ်ဝဲဒၣ် (၁:၁၉) န့ၣ်လီၤ.
တၢ်ပၢၤဃာ်ပထးခိၣ်အတၢ်စံးတၢ်ကတိၤန့ၣ် တမ့ၢ်ထဲအမၤစၢၤပှၤလၢ ပကဟးဆှဲးတၢ်ဒဲးဘး, ဒီးပျဲယွၤအကလုၢ်ကထါ ကဆီတလဲပှၤ (:၂၁) အဂီၢ်ဘၣ်. မ့မ့ၢ်ဒုးထံၣ်သ့ၣ်ညါပှၤဂုၤပှၤဂၤတဖၣ်လၢ ယွၤမ့ၢ်ကစၢ်လၢ “သူၣ်ကညီၤသးကညီၤတၢ်ဒီး သူၣ်အိၣ်သးအိၣ်တၢ်, အသးထီၣ်ကီဒီးအတၢ်အဲၣ်ဂၢၢ်ကျၢၤအိၣ်ဝဲအါမး” (စံး ၁:၁၉) န့ၣ်လီၤ. ယွၤ, ပတၢ်အဲၣ်အကစၢ်တဂၤအံၤ အသူးသ့ၣ်ကံၢ်စီန့ၣ် မ်ပကဒုးနဲၣ်ပာ်ဖျါထီၣ်အီၤ, ခီဖျိလၢပတၢ်စံးတၢ်ကတိၤ, ဒီးပတၢ်အိၣ်ဘှ့ၣ်အိၣ်ဘှီၣ်န့ၣ်တက့ၢ်.