မ့ၢ်လၢဂီၤခီအကတီၢ်အဃိ, ဒ်သိးကဃုထၢဝဲ ထါတၢ်သးဝံၣ်လၢ ဘၣ်အသးအဒိၣ်ကတၢၢ် “ယသးယဲဧၢ, အိၣ်ဂၢၢ်ဆိးကျၢၤ” (My Soul Is Anchored) အဂီၢ်, ယဝၤန့ၣ် အိးထီၣ်ဝဲ အကွဲၤဒီနၢ်န့ၣ်လီၤ. ထါသးဝံၣ်အဖျၢၣ်တဖၣ်န့ၣ် ပာ်ဖျါထီၣ် တၢ်မုၢ်လၢ် လၢကစၢ်ယွၤ, ဖဲတၢ်သဘံၣ်ဘုၣ်အိၣ်ထီၣ်လၢသးသမူအကတီၢ်န့ၣ်လီၤ. ဒဲ(န) (Dan) လူၤပိာ်သးဝံၣ်ထွဲလံာ်မဲာ်ဖျၢၣ်တဖၣ်လၢ အဟ့ၣ်ပလီၢ် လပီဖးဒိၣ်တဖၣ် ဟဲထီၣ်ရုၢ်ရုၢ်, ဒီးဒိတီၢ်ကၢၢ်ပၤနံၤအဂ့ၢ်န့ၣ်လီၤ. ဘၣ်ဆၣ်, တၢ်သးဝံၣ် ပာ်ဖျါဝဲဒၣ် မ့ၢ်လၢကစၢ်ယွၤ ဟံးဃာ်ဂၢၢ်ကျၢၤပှၤအဃိ, ပတဟူးတဝးဝဲဘၣ်န့ၣ်လီၤ.
တၢ်သးဝံၣ်အဖျၢၣ်တဖၣ် ပာ်ဖျါကဘီအနီၣ်သက့ၤ အတၢ်ဖံးတၢ်မၤအလၢအပှဲၤန့ၣ်လီၤ.ခီဖျိလၢတၢ်ပာ်လီၤ နီၣ်သက့ၤလၢ ပီၣ်လဲၣ်အထံယိာ်ပူၤန့ၣ်ဒီး, “နီၣ်သက့ၤအစုတဖၣ်”မၤဂၢၢ်မၤကျၢၤကဘီ, ဒ်သိးကဘီတလီၤထွံပိာ်ထွဲထံအကျိၤ, (မ့) ခီဖျိလၢကလံၤအူဆူၣ်အဃိ, ကဘီန့ၣ် အသုတဟူးတဝးဝဲအဂီၢ်န့ၣ်လီၤ.
ပှၤခရံာ်ဖိ အတၢ်စူၢ်တၢ်နာ်အဂီၢ်, နီၣ်သက့ၤန့ၣ် ကဲထီၣ် တၢ်ပနီၣ်က့ၢ်ဂီၤလီၤဆီ, လၢအဆဲး ကပီၤဖျါထီၣ် ပတၢ်မုၢ်လၢ်လၢကစၢ်ခရံာ်, လၢပသးသမူတၢ်သဘံၣ်ဘုၣ်တဖၣ်အပူၤဒၣ်လဲာ်, ကစၢ်လၢပဟံးဃာ်ဂၢၢ်ကျၢၤအီၤတဂၤန့ၣ်လီၤ. ဒ်ပှၤကွဲးလံာ်ဧ့ၤဘြံၤ ပာ်ဖျါဝဲအသိး, “ပအိၣ်ဒီးတၢ်မုၢ်လၢ်အံၤ, ဒ်သးအနီၣ်သက့ၤအသိး, လၢအစဲဘူးဃာ်, ဒီးအိၣ်ဂၢၢ်ဆိးကျၢၤ” (ဧ့ၤ ၆:၁၉) ဝဲဒၣ်န့ၣ်လီၤ. တၢ်မုၢ်လၢ်အံၤ, မ့ၢ်ဝဲဒၣ် ကစၢ်ယ့ၣ်ရှူး, ဒ်အမ့ၢ် “ယွၤအတၢ်ကူၣ်ပာ် လၢဟးဂီၤတသ့” (:၁၇) ဘၣ်အသိးန့ၣ် ပှၤလၢအစူၢ်က့ၤနာ်က့ၤအီၤတဖၣ် နာ်သန့ၤအသးလၢအီၤ, ဒီးအိၣ်ဂၢၢ်ဆိးကျၢၤ သ့ဝဲဒၣ်န့ၣ်လီၤ. အါန့ၢ်အန့ၣ်, “မ့ၢ်တၢ်ဂၢၢ်တၢ်ကျၢၤခံမံၤ, လၢယွၤကတိၤကဘျံးကဘျၣ်တသ့ဘၣ်သတးဒီး,” တၢ်လၢကစၢ်ယွၤ အၢၣ်လီၤတ့ၢ်ဝဲတဖၣ်န့ၣ် ကစၢ်ယ့ၣ်ရှူးမၤဂၢၢ်မၤကျၢၤ “ကတိၤဝဲလၢတၢ်ဆိၣ်” (:၁၇-၁၈) န့ၣ်လီၤ. လၢတၢ်န့ၣ်အဃိ, ပဝဲနၤယၤလၢ ဟံးဃာ် ဂၢၢ်ကျၢၤ အတၢ်အၢၣ်လီၤတဖၣ်န့ၣ် “ပကန့ၢ်ဘၣ်တၢ်ခုၣ်တၢ်မုာ်ဖးဒိၣ်” (:၁၈) န့ၣ်လီၤ.
ပှၤတနီၤနီၤန့ၣ် ကဟံးဃာ်ဂၢၢ်ကျၢၤ အနီၢ်ကစၢ်ဒၣ်ဝဲအတၢ်ဒိၣ်စိဒိၣ်ကမီၤ, အတံၤသကိးပှၤဟးဂီၤဖိတဖၣ်, (မ့) လုၢ်လၢ်သကဲးပဝာ် လၢအတဂ့ၤတဖၣ်, တၢ်လၢပနာ်န့ၢ်အီၤတသ့တဖၣ်အလိၤန့ၣ်လီၤ. ပမ့ၢ်အိၣ်ဂၢၢ်ဆိးကျၢၤဝဲဒၣ်လၢ ပှၤလၢပသ့ၣ်ညါအီၤ, ဒီးပနာ်န့ၢ်အီၤသ့တဂၤန့ၣ်ဒီး, ကမ့ၢ်တၢ်အဂ့ၤကတၢၢ်န့ၣ်လီၤ. ဖဲလၢလပီဖးဒိၣ်တဖၣ် ဟဲဒိတီၢ်ပခိၣ်ပဃၢၤဝးဝးအကတီၢ်, ပကဘၣ်တၢ်ဟံးဃာ်ဂၢၢ်ကျၢၤပှၤန့ၣ်လီၤ. ဒီးပသူၣ်ပသးန့ၣ် ကအိၣ်ဂၢၢ်ဆိးကျၢၤဝဲဒၣ်လၢ ကစၢ်ယွၤအပူၤန့ၣ်လီၤ.