ဘ့း (Vic) လၢအလီၤဃိာ် သးသမူဒီစိၤတဂၤ, ဒုးသ့ၣ်ညါဝဲဒၣ် အတံၤသကိးတဖၣ်လၢ အသးဆၢမိၣ်န့ၢ်သးလီတၢ်အဂ့ၢ်န့ၣ်လီၤ. ဖဲအတံၤသကိးတဖၣ် စံးဘၣ်အီၤ, တၢ်လီၤဟိတဖၣ် လၢအတၢ်အိၣ်မူအပူၤန့ၣ် ကစၢ်ယ့ၣ်ရှူး ကမၤလၢမၤပှဲၤဝဲအဂ့ၢ်န့ၣ်ဒီး, ဘ့း နံၤဘၣ်ဖၣ်လဲအဝဲသ့ၣ်န့ၣ်လီၤ. ကစၢ်ယ့ၣ်ရှူး, ဒ်ပှၤကညီတဂၤအသိး, သံတ့ၢ်ဝဲဝံၤ, ဒိးအိၣ်မူဝဲတုၤလၢမုၢ်မဆါတနံၤအံၤအဂ့ၢ်န့ၣ် လၢ ဘ့း အဂီၢ်, ကမ့ၢ်ဝဲဒၣ် တၢ်တဲပူမုာ်နၢ်တယုၢ်န့ၣ်လီၤ. အဝဲအိၣ်ဒီးတၢ်သးဒ့ဒီဘၣ်ဆၣ်, ပှၤခရံာ်ဖိတဖၣ် စံၣ်တဲၤတဲလီၤတၢ်လၢကွဲၤလ့လိၤအပူၤန့ၣ် စးထီၣ်ကနၣ်ဝဲဒၣ်, ဒီးလံာ်စီဆှံဒၣ်လဲာ်, စးထီၣ်ဖးဝဲဒၣ်န့ၣ်လီၤ. အကတၢၢ်န့ၣ် တၤဝဲဒၣ် ကစၢ်ယွၤလၢ ကလီၣ်ဖျါထီၣ် အနီၢ်ကစၢ်အသးန့ၣ်လီၤ.

စးထီၣ်ဖဲန့ၣ်, ဘ့း အတၢ်ဘၣ်ယိၣ်ဘၣ်ဘီ, ဒီးအတၢ်ပျံၤတၢ်ဖုးတဖၣ်န့ၣ် လီၤမၢ်ကွံာ်ဝဲကယီကယီန့ၣ်လီၤ. အဝဲကွၢ်ထံဆိကမိၣ်ဝဲလၢအသးပူၤ, ဒီးစံးဝဲဒၣ် “ယနီၢ်ခိန့ၣ်ဘၣ်တၢ်ဒုးဃာ်အီၤလၢဃိာ်ပူၤ, လၢတၢ်အဒူၣ်ခံကထြၢအပူၤဘၣ်ဆၣ်, ယနီၢ်သးန့ၣ် အိၣ်သဘျ့ဝဲဒၣ်ဘံၣ်ဘံၣ်ဘၢဘၢ, ဒ်စီၤဒၤနံၤယ့လး အိၣ်ဝဲဒၣ်လၢခ့ယုၢ်အပူၤအသိး” န့ၣ်လီၤ. ဒီးတယံာ်ဘၣ်, ဘ့း တူၢ်လိာ်ဝဲ ကစၢ်ယ့ၣ်ရှူး ဒ်တၢ်အုၣ်က့ၤခီၣ်က့ၤကစၢ်တဂၤအသိးန့ၣ်လီၤ.

စီၤဒၤနံၤယ့လး, ပှၤယူဒၤဖိတဂၤ, လၢအဘၣ်တၢ်စိာ်မၢကဲကုၢ်ဆူ ဘၤဘူၤလိၣ်အထံကီၢ်, ဒီးဘၣ်တၢ်တ့ၢ်လီၤကွံာ်အီၤလၢ ခ့ယုၢ်အပူၤအဂ့ၢ်န့ၣ် ဘ့း ဖးဘၣ်ဝဲဒၣ်လၢ လံာ်စီဆှံအလီၢ်လံၤအပူၤန့ၣ်လီၤ. စီၤပၤ ဟ့ၣ်လီၤအကလုၢ်လၢ တၢ်ကဒုးအိၣ်ထီၣ်တၢ်သိၣ်တၢ်သီခၢၣ်သနၢၢ်အဂီၢ်န့ၣ် “မ့တမ့ၢ်ဘၣ်လၢ စီၤပၤဘၣ်ဒီး, ဖဲဒၣ်ပှၤလၢအဃ့တၢ်လၢအကစၢ်မ့ၢ်ဂ့ၤ, လၢပှၤကညီမ့ၢ်ဂ့ၤ, လၢအနံၤသၢဆံအတီၢ်ပူၤတဂၤဂၤန့ၣ် ကဘၣ်တၢ်တ့ၢ်လီၤကွံာ်အီၤဆူ ခ့ယုၢ်အပူၤ” န့ၣ် စီၤဒၤနံၤယ့လး တဒိကနၣ်ဝဲ, ဒီးတဆိကတီၢ်ဝဲဒၣ်အတၢ်ဃ့ထုကဖၣ် ကစၢ်ယွၤ တနံၤသၢဘျီဘၣ် (ဒံ ၆:၆-၁၀) န့ၣ်လီၤ. စီၤပၤမၤလိာ်ဝဲဒၣ်လၢ ပှၤကတ့ၢ်လီၤ စီၤဒၤနံးယ့လးဆူ ခ့ယုၢ်ပူၤအဃိ, “အသူၣ်ကိၢ်အသးဂီၤ” (:၁၄၊၁၆) ဝဲဒၣ်န့ၣ်လီၤ. ဘၣ်ဆၣ်, ကစၢ်ယွၤ ဒုးနဲဖျါထီၣ် အတၢ်ဂံၢ်ဆူၣ်ဘါဆူၣ်, ဒီးအတၢ်န့ၢ်စိန့ၢ်ကမီၤ, ဒီးကွၢ်ထွဲမၤပူၤမၤဖျဲး စီၤဒၤနံၤယ့လးအဃိ, “စီၤပၤအသးခုလၢအသးကံၢ်ပူၤ” (:၂၃) န့ၣ်လီၤ.

ပတၢ်အိၣ်အသးတဖၣ်,ဃုာ်ဒီးပတၢ်ဂ့ၢ်ကီတဖၣ် ကမ့ၢ်ဒၣ်ဝဲဒ်လဲၣ်ဂ့ၤ,ဒ်လဲၣ်ဂ့ၤန့ၣ် ကစၢ်ယွၤ တလဲၤကပာ်ပှၤနီတဘျီဘၣ်. အလီၢ်အိၣ်ဝဲဒၣ်ထဲ ပကဃၣ်တရံးက့ၤပသးဆူ ယွၤအအိၣ်န့ၣ်လီၤ.