ယမၤဒီးယၤ, ပအိၣ်ဟဲက့ၤလၢ တၢ်လီၢ်အယံၤ, ဒီးဖဲပဟဲက့ၤဘူးထီၣ်လၢ ပဟံၣ်အကျဲန့ၣ်ဒီး, ပထံၣ်လၢ “တၢ်ကးတံာ်ဃးသိလ့ၣ်အတၢ်လဲၤတၢ်က့ၤ” အတၢ်ပနီၣ်အဃိ, ပနုာ်လီၤဆူ ပကျဲတန့ၢ်လၢၤဘၣ်. ပကတုၤဆူဟံၣ်န့ၣ် ဘူးတ့ၢ်မးလံအဃိ, ယအဲၣ်ဒိးနီၣ်ခီ တၢ်ဟ့ၣ်ပနီၣ်အဘ့ၣ်ဘၣ်လၢယသိလ့ၣ်, အဂ့ၢ်ဒ်အံၤ, ယတအဲၣ်ဒိးနီၣ်တရံးက့ၤသိလ့ၣ်အဃိန့ၣ်လီၤ. ဘၣ်ဆၣ်, ဖဲယထံၣ်ဘၣ် လီဂံၢ်အပျံၤဖးဒိၣ် တဘိန့ၣ် လီၤတဲာ်ဝဲဒၣ်လၢ ကျဲလိၤန့ၣ်ဒီး, ယသ့ၣ်ညါယဲလၢ ဘၣ်မနုၤအဃိ, ပှၤကးတံာ်ဃးကျဲလဲၣ်န့ၣ်လီၤ. ယမ့ၢ်တကနၣ်ဃုာ် တၢ်ဟ့ၣ်ပလီၢ်, ဒီးမ့ၢ်နီၣ်နုာ်လီၤဘၣ် ယသိလ့ၣ်န့ၣ်ဒီး, ယဘၣ်ကီဘၣ်ခဲဝဲဒၣ်န့ၣ်လီၤ.

လံာ်မၤတၢ် ၁၆:၆-၁၀ ပာ်ဖျါဝဲလၢ စီၤပီလူးဒီးပှၤလဲၤသကိးတၢ်ဒီးအီၤတဖၣ်န့ၣ် အသူၣ်ဆူသးဆူၣ်ဝဲဒၣ်လၢ ကလဲၤစံၣ်တဲၤတဲလီၤ တၢ်သးခုကစီၣ်ဆူ အၤစံဘၣ်ဆၣ်, သးစီဆှံန့ၣ် တြီဃးကးတ့ာ်ဃး အတၢ်လဲၤကျဲန့ၣ်လီၤ. တၢ်ဘၣ်လဲၤ ကျဲအဂၤတဘိန့ၣ် တမ့ၢ်လၢတၢ်ကတူၢ်လိာ်အီၤထီဘိန့ၣ်ဘၣ်. ဘၣ်သ့ၣ်သ့ၣ်, ကမ့ၢ်ဝဲ ကစၢ်ယွၤ နဲၣ်ဆှၢတၢ်ကျဲအသီတဘိန့ၣ်လီၤ. ဒ်သိးစီၤပီလူး အသုတလဲၤဝဲဆူ ဘံၤသူၤနံအဂီၢ်, ကစၢ်ယွၤ နဲၣ်ဆှၢအဝဲသ့ၣ် လၢကျဲအဂၤတဘိန့ၣ် လီၤဂာ်ဝဲဒ်တၢ်ဟ့ၣ်ပလီၢ်ဘ့ၣ်ဘၣ် လၢပကျဲအသိးန့ၣ်လီၤ. လီၤဆီဒၣ်တၢ်, ဖဲ စီၤပီလူး ကျဲးစၢးမၤဝဲ အဂ့ၤကတၢၢ်အကတီၢ်, တၢ်ကးတံာ်ဃး ပတၢ်လဲၤကျဲန့ၣ် ကကဲထီၣ် တၢ်သူၣ်ဟးဂီၤသးဟးဂီၤနီၢ်နီၢ်န့ၣ်လီၤ. လၢခံန့ၣ်, စီၤပီလူး ဒိးန့ၢ်ဝဲ တၢ်ထံၣ်လၢညါခီအပူၤန့ၣ် ပှၤတဂၤစံးဘၣ်အီၤလၢ “ဟဲခီဂာ်တၢ်ဆူ မၤက့းဒနံ, ဒီးမၤစၢၤပှၤတက့ၢ်” ( :၉) န့ၣ်လီၤ. တၢ်မၤလၢအဂ့ၤတမံၤန့ၣ် ကစၢ်ယွၤ မ့ၢ်တတူၢ်လိာ်ဝဲန့ၣ်ဒီး, ကစၢ်ယွၤ ကတဲာ်ကတီၤန့ၢ်ဝဲဒၣ်ကျဲလၢ အဝဲသ့ၣ်ကစိာ်ဆှၢ တၢ်သးခုအကစီၣ်ဆူ ပှၤအိၣ်ဆိးလၢ ကီၢ်မိၢ်ပှၢ်အဂၤတဘ့ၣ် (:၁၀) အဂီၢ်န့ၣ်လီၤ.

ကစၢ်ယွၤ “တတူၢ်လိာ်တၢ်” န့ၣ် ပကထံၣ်အီၤ ဒ်ယွၤအတၢ်စံၣ်ညီၣ်, ဒီးဒ်တၢ်ပဲကွံာ်အီၤအလီၢ်န့ၣ်, ပထံၣ်န့ၢ်အီၤ ဒ်သးစီဆှံ အတၢ်နဲၣ်ဆှၢကျဲအသီအသိး, သ့ဝဲဒၣ်န့ၣ်လီၤ. အါတက့ၢ်, ကစၢ်ယွၤ အတၢ်နဲၣ်ဆှၢကျဲအသီတဖၣ်န့ၣ် မ့ၢ်ဝဲယွၤ အတၢ်ကတဲာ်ကတီၤ န့ၢ်တၢ်လၢပဂီၢ်န့ၣ်လီၤ. ပကနာ်န့ၢ် ကစၢ်ယွၤ အတၢ်ဒုးနဲၣ် ပတၢ်လဲၤကျဲန့ၣ် တမ့ၢ်ထဲတၢ်လဲၤကျဲအိးထီၣ်အသးအကတီၢ်ဧိၤန့ၣ်ဘၣ်. ကစၢ်ယွၤ မ့ၢ်ကးတံာ်ဃး ပတၢ်လဲၤကျဲ အကတီၢ်ဒၣ်လဲာ်, ပကဘၣ်နာ်န့ၢ်အီၤန့ၣ်လီၤ.