ထီထီထ့ၣ်တဖၣ်န့ၣ် မ့ၢ်တၢ်ဖိဃၢ်အဆံးတကလုာ် လၢအယူၤသ့, ဒီးတူၢ်တၢ်ခီၣ်တၢ်န့ၢ်ဝဲလီၤလီၤဆီဆီန့ၣ်လီၤ. ကဟၣ်လဲၤတၢ်လၢ ကလံၤကျါအကျိၤကျဲတဖၣ် ကဂ့ၤထီၣ်အဂီၢ်, ပှၤဘၣ်ဃုမၤလိ ထီထီထ့ၣ်တဖၣ် အတၢ်ဟူးဂဲၤယူၤဝဲဒၣ်လၢကလံၤကျါန့ၣ်လီၤ. တယံာ်ဒံးဘၣ်န့ၣ် ပှၤစဲအ့ၣ်ဖိတဖၣ် ဃုထံၣ်န့ၢ်ဝဲလၢ တစဲးကီာ်အတီၢ်ပူၤန့ၣ် ထီထီထ့ၣ်တဘ့ၣ် မၤဟူးဝးအဒံးတဖၣ် အဘျီ သၢဆံ, ဒီးဖဲအဝဲသ့ၣ်မ့ၢ်လီၤတဲာ်ဆူလာ်န့ၣ်ဒီး, အဝဲသ့ၣ်ထိၣ်လိၤက့ၤအနီၢ်ကစၢ်လၢ ၀. ၂ စဲးကီာ်အတီၢ်ပူၤသ့ဝဲဒၣ်အဂ့ၢ်န့ၣ်လီၤ. ကဆၢတဲာ်တၢ်တမံၤမံၤ အခိၣ်အခံအဂီၢ်, ဒီးဒ်သိးကမၤဘၣ်လိာ်ဘၣ်စးက့ၤ တၢ်အဆံးအစှၤတဖၣ်အဂီၢ်န့ၣ် အမဲာ်ချံတဖၣ်န့ၣ် ဒုးအိၣ်ထီၣ် က့ၢ်ဂီၤ ခံကယၤ လၢတစဲးကီာ်အတီၢ်ပူၤန့ၣ်လီၤ.

ကစၢ်ယွၤ အတၢ်သ့တ့ဒုးအိၣ်ထီၣ်တၢ်, ဒီးအတၢ်ကူၣ်သ့န့ၣ် ပကထံၣ်န့ၢ်ဝဲဒၣ်လၢ ကယဲၢ်အတၢ်ဘၣ်တ့ခိၣ်ဃၢၤန့ဆၢၣ်တဖၣ်အပူၤန့ၣ်လီၤ. လၢလံာ်ယိၤဘးအပူၤန့ၣ် စီၤယိၤဘး ဘၣ်ဂဲၤလိာ်ဃုသ့ၣ်ညါနၢ်ပၢၢ် အတၢ်နးတၢ်ဖှီၣ်အဂ့ၢ်ဒီးကစၢ်ယွၤ အတၢ်ဂ့ၤတၢ်ဝါ, ဒီးအတၢ်တီတၢ်လိၤအဂ့ၢ်န့ၣ်လီၤ. ကစၢ်ယွၤ စံးဆၢ စီၤယိၤဘး, ခီဖျိလၢအတၢ်သံကွၢ်, “တၢ်မၤလိာ်တဖၣ်လၢမူခိၣ် တိၢ်န့ၢ်ဝဲန့ၣ် နသ့ၣ်ညါစ့ၢ်ကီးဧါ. အဝဲသ့ၣ်ပၢတၢ်လၢ ဟီၣ်ခိၣ်ချၢအံၤ နပာ်ဂၢၢ်ပာ်ကျၢၤသ့စ့ၢ်ကီးဧါ” (၃၈:၃၃) န့ၣ်လီၤ. ကစၢ်ယွၤ ပာ်ဖျါထီၣ် စးထီၣ်လၢထိၣ်ဒီးမဲာ်တဲးလဲးတဖၣ် တုၤဒၣ်လဲာ်, ဆၣ်ဖိကီၢ်ဖိအဒိၣ်အသွါ လၢအလူၤဃုအီၣ်တၢ်ဖံးတၢ်ညၣ်တဖၣ်
န့ၣ်လီၤ. ဆၣ်ဖိကီၢ်ဖိတကလုာ်စုာ်စုာ်, ကအိၣ်မူအိၣ်ဂဲၤဝဲအဂီၢ်, တၢ်လၢအလိၣ်,ဃုာ်ဒီးအဖိတဖၣ် သၣ်ဝံၤသၣ်စ့ၤအဃိ, မ့ၢ်ကိးပသူထီၣ်ဝဲန့ၣ်ဒီး, ကစၢ်ယွၤ သ့ၣ်ညါပာ်သူၣ်ပာ်သးဝဲဒၣ် (၃၈:၃၉-၄၁) န့ၣ်လီၤ. ကယဲၢ်ဆၣ်ဖိကီၢ်ဖိကိးကလုာ်ဒဲး, ဒ်သိးကအိၣ်မူအိၣ်ဂဲၤဝဲအဂီၢ်န့ၣ် ကစၢ်ယွၤ ဟ့ၣ်လီၤတ့ၢ်ဝဲ ကံၢ်စီတမံၤစုာ်စုာ်, ဒီးအဒိန့ၣ် ထိၣ်ကီၤလၤအူးတဖၣ် ဃ့ၢ်န့ၢ်ဝဲဒၣ်ချ့ချ့ (မ့) ကျီၢ်ဖါန့တဖၣ် အိၣ်ဒီးတၢ်ဂံၢ်ဆူၣ်ဘါဆူၣ်န့ၣ်လီၤ.

လၢတၢ်လီၤလိၢ်လီၤလးအပူၤန့ၣ် ထီထီထ့ၣ်တဘ့ၣ် အိၣ်မူဟူးဂဲၤဝဲလီၤတံၢ်လီၤဆဲး သ့ဝဲဒၣ်ဒ်လဲၣ်. ပကဘၣ်ဃုမၤလိ, ဃုသ့ၣ်ညါတၢ်တဖၣ်န့ၣ် အိၣ်ဒံးဝဲဒၣ်အါမံၤန့ၣ်လီၤ. ဘၣ်ဆၣ်, ကစၢ်ယွၤ လၢအတ့ဒုးအိၣ်ထီၣ် ဆၣ်ဖိကီၢ်ဖိတဖၣ်အံၤအက့ၢ်အဂီၤန့ၣ် မ့ၢ်ကစၢ် လၢအသ့ၣ်ညါတၢ်ခဲလၢာ်တဂၤန့ၣ်လီၤ. အဝဲမ့ၢ်ကစၢ်ယွၤတဂၤဃီ, လၢအသ့ၣ်ညါဝဲ ကဘၣ်ဟံးထီၣ်က့ၤပှၤလၢတၢ်ခံးသူယိာ်အပူၤ, ဒီးစိာ်ဆှၢပှၤဆူ အတၢ်ကပီၤဒ်လဲၣ်, ဒီးပကသူၣ်ခုသးခုလၢအမဲာ်ညါအဂီၢ်ဒ်လဲၣ်န့ၣ်အဃိ, ပနာ်န့ၢ်အီၤသ့ဝဲဒၣ်န့ၣ်လီၤ.