ဖံထၢၣ် (Pieter) နၢမူဝဲဒၣ် အမိၢ်သးပှၢ်ပၢ်သးၦၢ်အတၢ်ဂီၤ, ကိးမုၢ်နၤဒဲးန့ၣ်လီၤ. တၢ်မၤအံၤ စးထီၣ်မၤတ့ၢ်ဝဲဒၣ် လၢအပူၤကွံာ်နံၣ်တဖၣ် ဖဲအဘၣ်အိၣ်ယံၤဝဲဒီးအမိၢ်အပၢ်န့ၣ်လီၤ. ဒ်အမ့ၢ် ပှၤသးစၢ် လၢအဒိၣ်တုာ်ခိၣ်ၦဲၤတဂၤအသိး, ဖဲအဝဲစူၢ်က့ၤနာ်က့ၤ ကစၢ်ယ့ၣ်ၡူးဝံၤအလီၢ်ခံ, အဟံၣ်ဖိဃီဖိ, ဒီးအပှၤတဝၢဖိတဖၣ် ဆီၣ်သနံးအီၤလၢ ကစူးကွံာ်ညိကွံာ် အတၢ်စူၢ်တၢ်နာ်အသီအဂီၢ်န့ၣ်လီၤ. မ့ၢ်လၢတစူးကွံာ်ညိကွံာ်ဝဲအဃိ, အမိၢ်အပၢ်တဖၣ်စူးကွံာ်အီၤန့ၣ်လီၤ. ဖံထၢၣ်စံးဝဲ “လၢလံာ်စီဆှံအပူၤန့ၣ် ကစၢ်ယွၤ အၢၣ်လီၤအီလီၤဝဲလၢ တၢ်ကီတၢ်ခဲအကတီၢ်တဖၣ်အပူၤန့ၣ် ကတိစၢၤမၤစၢၤအဖိတဖၣ်, ဒီးယနာ်အီၤလီၤ. တၢ်ဃုထၢလူၤပိာ် ကစၢ်ယ့ၣ်ရှူးအခံန့ၣ် ဟဲစိာ်ဝဲဒၣ် တၢ်နးတၢ်ဖှီၣ်ဘၣ်ဆၣ်, ဒ်သိး ယတူၢ်ခီၣ်တၢ်ကန့ၢ်ယဲအဂီၢ်, အဝဲမၤစၢၤယၤန့ၣ်လီၤ.”
ဖံထၢၣ် ဟံးဃာ် ကစၢ်ယွၤ အတၢ်အုၣ်ကီၤ, လၢအကတီဝဲဒၣ်ဒီးအတၢ်အၢၣ်လီၤအဃိ, အိၣ်မူအိၣ်ဂဲၤလၢ တၢ်နာ်သန့ၤ ယွၤအတၢ်အၢၣ်လီၤတဖၣ်အလိၤသ့ဝဲဒၣ်န့ၣ်လီၤ. စီၤယိၤသး အသးသမူ လၢခံကတၢၢ်န့ၣ် အတၢ်နာ်န့ၢ်လီၤသး လၢကစၢ်ယွၤ အတၢ်အၢၣ်လီၤတဖၣ် အပူၤအဂ့ၢ်န့ၣ် ပကဖးဘၣ်စ့ၢ်ကီးလၢ လံာ်၁မိၤရှ့ အပူၤန့ၣ်လီၤ. “ဒီးစီၤယိၤသး စံးဘၣ် အဒီပုၢ်ဝဲၢ်, ယသံယဲလီၤႇ ဒီးယွၤကဟဲအိၣ်သကိးသုသၦၢ်တၢၢ်, ဒီးကဒုးဟဲထီၣ်သုလၢ ကီၢ်အံၤဆူကီၢ်တဘ့ၣ်န့ၣ်လၢ အဆိၣ်တၢ်လၢအဂ့ၢ်အကျိၤဒီးစီၤအၤဘြၤဟၣ်, ဒီးစီၤအံၤစဲးႇ ဒီးစီၤယၤကိာ်” (၁မိၤ ၅ဝ:၂၄) န့ၣ်လီၤ. ကစၢ်ယွၤ ကအိၣ်တီအိၣ်လိၤလၢ အတၢ်အၢၣ်လီၤ, ဒီးကနဲၣ်ဆှၢအၦၤဂီၢ်မုၢ်ဆူ ကီၢ်ကနၤဧၣ်န့ၣ် စီၤယိၤသး သ့ၣ်ညါဝဲဒၣ် လီၤတံၢ်လီၤဆဲးန့ၣ်လီၤ. လၢတၢ်န့ၣ်အဃိ, စီၤယိၤသး မၤလိာ်တ့ၢ်ဝဲ ၦၤအံၣ်စရ့လးဖိတဖၣ်လၢ “သုဘၣ်စိာ်ထီၣ်ကွံာ်ယဃံယကွဲ” (:၂၅) လၢ ကီၢ်အဲၤကူပတူးန့ၣ်လီၤ. အနံၣ်လွံၢ်ကယၤ လဲၤပူၤကွံာ်ဝံၤႇ ဖဲတၢ်ဟးထီၣ်လၢ ကီၢ်အဲၤကူပတူး တၢ်မၢကဲကုၢ်အကတီၢ်န့ၣ် “စီၤမိၤရှ့ဟံးန့ၢ် စီၤယိၤသးအဃံဒီးအီၤ” (၂မိၤ ၁၃:၁၉) န့ၣ်လီၤ. အကတၢၢ်န့ၣ်, “ဒီးစီၤယိၤသးအဃံလၢ ၦၤအံၣ်စရ့လးဖိ ဟဲစိာ်လၢ အဲၤကူပတူးအပူၤန့ၣ် ၦၤခူၣ်လီၤကွံာ်ဝဲလၢ ၡက့ၣ် (ကီၢ်ကနၤဧၣ်)” (ယိၤၡူ ၂၄:၃၂) န့ၣ်လီၤ.
မ်ပကလူၤပိာ်ထွဲ စီၤယိၤသး အတၢ်စူၢ်တၢ်နာ် အဒိအတဲာ် (ဧ့ၤ ၁၁:၂၂), လၢတၢ်ပာ်ဖျါ ပတၢ်စူၢ်တၢ်နာ် ကစၢ်ယွၤ အတၢ်အၢၣ်လီၤတဖၣ် ခီဖျိလၢတၢ်အိၣ်မူမၤထွဲ ယွၤအတၢ်အၢၣ်လီၤတဖၣ်န့ၣ်တက့ၢ်.