လၢတၢ်ဘါသရိာ်န့ၣ် ယစံးဘၣ်တဲဘၣ် ယတံၤသကိးအသီတဂၤလၢ “နဒ့ကံၢ်ထါန့ၣ် မုာ်ဒိၣ်မး” န့ၣ်ဒီး, စံးဆၢဝဲဒၣ်လၢ “တၢ်ဘျုးႇ တၢ်အံၤမ့ၢ်ယတၢ်ဖံးတၢ်မၤလၢၦၤဂၤအဂီၢ်” န့ၣ်လီၤ. တၢ်ကတိၤ “တၢ်ဖံးတၢ်မၤလၢၦၤဂၤအဂီၢ်” (Ministry) န့ၣ် ဟဲကဒီးလံ. “တၢ်ဖံးတၢ်မၤလၢ ၦၤဂၤအဂီၢ်” န့ၣ် မ့ၢ်တၢ်မနုၤလဲၣ် (မ့) ၦၤတဂၤဂၤ မ့ၢ်အ “ဒိးန့ၢ်” ဝဲတၢ်ကတိၤအံၤဒ်လဲၣ်န့ၣ် ယတသ့ၣ်ညါယဲဘၣ်ဆၣ်, ယတံၤသကိး အတၢ်သ့တၢ်ဘၣ်, လၢအဒိးန့ၢ်ဝဲ, ဘၣ်ဃးဒီးတၢ်သံကျံအတၢ်မၤန့ၣ် ဒ်သိးကမၤတၢ်လၢပှၤဂၤအဂီၢ်, စူးကါဝဲဒၣ်ယိယိဖိန့ၣ်လီၤ. လၢခံန့ၣ်, ဖဲယဃုထံၣ်န့ၢ်ယဲ တၢ်ဟ့ၣ်လၢယဒိးန့ၢ်တဖၣ်အကျါတမံၤန့ၣ် မ့ၢ်ဝဲဒၣ် တၢ်ဟ့ၣ်သဆၣ်ထီၣ် ပှၤဂၤ, (မ့) တၢ်ဟ့ၣ်ဂံၢ်ဟ့ၣ်ဘါပှၤဂၤန့ၣ်ဒီး, ယသးဟးဂီၤတဆံးတက့ၢ်န့ၣ်လီၤ. ယသးတူၢ်ဘၣ် ဒ်ယတၢ်သ့တၢ်ဘၣ်န့ၣ် တမ့ၢ်တၢ်အကါဒိၣ်တမံၤအသိးန့ၣ်လီၤ. ဘၣ်ဆၣ်, တယံာ်ဘၣ်ဒီး, ယသ့ၣ်ညါနၢ်ပၢၢ်က့ၤလၢ ဒ်ယမ့ၢ် ပကရူၢ်ဆံးဖိ အၦၤကွၢ်ထွဲကဟုကယာ်တၢ်အခိၣ်တဂၤ အသိး, ယမုာ်လၤသးခုဝဲဒၣ်လၢ တၢ်ကွဲးဆှၢလီၤ တၢ်ကတိၤဟ့ၣ်ဂံၢ်ဟ့ၣ်ဘါ အလံာ်ကျိၤဖုၣ်ဖိတဖၣ် (မ့) ယကိးကတိၤတၢ်ဒီးပကရူၢ်ဖိတဖၣ် လၢကွဲၤဒီနၢ်န့ၣ်လီၤ. လၢယတသ့ၣ်ညါလီၤက့ၤယသးအပူၤန့ၣ် ယစူးကါတ့ၢ်လံ ယသူၣ်ဂ့ၢ်သးကျိၤ အတၢ်ဟ့ၣ်တဖၣ်အကျါတမံၤန့ၣ်လီၤ.

ဒ်ပမ့ၢ် ၦၤစူၢ်က့ၤနာ်က့ၤကစၢ်ယ့ၣ်ၡူးတဖၣ်အသိး, ဒ်သိးပကမၤသကိးတၢ်အိၣ်ဖှိၣ် အတၢ်မၤအဂီၢ်, ပဝဲကိးဂၤဒဲးန့ၣ် ပဒိးန့ၢ် သူၣ်ဂ့ၢ်သးကျိၤ အတၢ်ဟ့ၣ်တဖၣ် (၁ ကရံၣ် ၁၂:၆) န့ၣ်လီၤ. ဘၣ်တဘျီဘျီ, ပသူၣ်ဂ့ၢ်သးကျိၤ အတၢ်ဟ့ၣ်တဖၣ် မ့ၢ်တၢ်မနုၤလဲၣ်န့ၣ် ပတသ့ၣ်ညါဝဲဒၣ်အဃိ, ပကမၤယိယိဖိ ဖဲတၢ်လီၢ်လၢအလီၤဟိတတီၤတီၤန့ၣ်လီၤ. တၢ်မၤတဖၣ်လၢ အအိၣ်လီၤတဲာ်တ့ၢ်ဝဲန့ၣ် သးစီဆှံ ကမၤလၢပှဲၤဝဲဒၣ် (:၄-၆, ၈-၁၁) န့ၣ်လီၤ.

ဒ်ပမ့ၢ်ၦၤဟီၣ်ခိၣ်ဖိ, ပနီၢ်ကစၢ်ဒီတဂၤန့ၣ် အိၣ်ဒီးနီၢ်ခိက့ၢ်ဂီၤအါမံၤ, လၢအဖံးတၢ်မၤတၢ်လီၤဆီလိာ်အသးအသိးန့ၣ် “ပဝဲဒၣ်အါဂၤအံၤႇ ပမ့ၢ်ပနီၢ်တဂၤဃီလၢခရံာ်အပူၤႇ ဒီးပမ့ၢ် ပဂီၤသကိးပဂီၤ ဒ်န့ၣ်အသိးလီၤ. ဒီးဒ်တၢ်ဟ့ၣ်လီၤ တၢ်ဘျုးတၢ်ဖှိၣ်လၢၦၤအသိးန့ၣ်, ပအိၣ်ဒီးတၢ်ဟ့ၣ်လီၤဆီ တဂၤတမံၤႇ တဂၤတမံၤ” (ရိမ့ၤ ၁၂:၅-၆) န့ၣ်လီၤ. သူၣ်ဂ့ၢ်သးကျိၤအတၢ်ဟ့ၣ်တနီၤ, လၢအမ့ၢ် တၢ်သိၣ်လိသီလိႇတၢ်ဟ့ၣ်ဂံၢ်ဟ့ၣ်ဘါႇ တၢ်နီၤဟ့ၣ်တၢ်, ဒီးတၢ်ပာ်ဖျါထီၣ်တၢ်သးကညီၤသ့ၣ်တဖၣ်န့ၣ် ပကထံၣ်ဘၣ် ဖဲလံာ်စီဆှံအဆၢဖိတဖၣ်လၢ လံာ်ရိမ့ၤ (:၆-၈) အပူၤန့ၣ်လီၤ. ကယဲၢ်သူၣ်ဂ့ၢ်သးကျိၤအတၢ်ဟ့ၣ်တမံၤလၢ်လၢ်, တၢ်လၢသးစီဆှံ နာ်န့ၢ်ပှၤ, ဒီးဟ့ၣ်လီၤၦၤတဖၣ်န့ၣ်, မ်ပကစူးကါအီၤလၢ တၢ်မၤဂ့ၤမၤဘျုးၦၤဂၤ, လၢတၢ်အိၣ်ဖှိၣ်အတၢ်မၤအပူၤ, ဒ်ကစၢ်ခရံာ် အနီၢ်ခိ (၁ ကရံၣ် ၁၂:၂၇) အသိးန့ၣ်တက့ၢ်.