လီခီလၢ ကစၢ်ယ့ၣ်ၡူး စူးကါတ့ၢ်ဝဲ, ဖဲအဟံးန့ၢ် ဟါတၢ်အီၣ်ဒီးအပျဲၢ်အဘီၣ်တဖၣ်လၢခံကတၢၢ်န့ၣ် ထုးန့ၢ်ဝဲ ပှၤကညီသ့ၣ်တဖၣ်အသူၣ်အသးန့ၣ် ယံာ်တ့ၢ်လံနံၣ်လၢအကယၤတဖၣ်န့ၣ်လီၤ. စီၤပၤအၤသၢၣ် (King Arthur), ဒီးအပှၤဒူပှၤဃိၤတဖၣ် လၢအဆ့ၣ်နီၤကဝီၤစီၤနီၤခိၣ်ဒီးအီၤတဖၣ် အသးစဲ လူၤကွၢ်ဃု လီခီအံၤအဂ့ၢ်န့ၣ် လၢပျၢၤ, ပူတၢ်စံၣ်ဃဲၤတဖၣ် ပာ်ဖျါထီၣ်ဝဲဒၣ် လီၤတံၢ်လီၤဆဲးန့ၣ်လီၤ. အဝဲသ့ၣ်နာ်ဝဲဒၣ်လၢ လီခီအံၤအိၣ်ဒီး တၢ်မၤကဒါမဲာ်အစိကမီၤန့ၣ်လီၤ. တၢ်ဂီၤမူတထံၣ် ဒုးနဲၣ်ဝဲဒၣ် အ့ၣ်ဒံၣ်ယၤနၤကၠိဒီးအပၢ်, ဟဲနရံၣ်, ဒီဖိပၢ်ခံဂၤန့ၣ် မၤလၢထီၣ်ၦဲၤထီၣ် ဟဲနရံၣ်အသးသမူဒီစိၤ, အတၢ်သးစဲလူၤကွၢ်ဃု ကစၢ်ယ့ၣ်ရှူး အလီခီစီဆှံအဂ့ၢ်န့ၣ်လီၤ.

ဖဲလၢတၢ်ဒုးကဲထီၣ် လီၤခီအံၤ, ဒ်တၢ်ဂီၤမူလၢအထုးန့ၢ်ၦၤအသးဒိၣ်မးအကတီၢ်, လီခီအတၢ်မ့ၢ်တၢ်တီန့ၣ် မ့ၢ်တၢ်ဂ့ၢ်လၢအဖျါဆှဲဆှဲဖိန့ၣ်လီၤ. လီခီအတၢ်, အကစၢ်ဒၣ်ဝဲန့ၣ် အစိကမီၤတအိၣ်လီၤလီၤဆီဆီဘၣ်. ပကထံၣ်ဘၣ် တၢ်အစိကမီၤနီၢ်နီၢ်လၢ လီခီအံၤ မ့ၢ်တၢ်မနုၤအခၢၣ်စးတမံၤလဲၣ်န့ၣ်လီၤ. တချုးပှၤပျၤထီ ကစၢ်ယ့ၣ်ၡူး လၢထူၣ်စုညါလိၤ, တၢ်ဂ့ၢ်လၢဒၢးထီၣ်ထီတတီၤ အမုၢ်တနၤအဂ့ၢ်န့ၣ် ပှၤကွဲးလံာ်မးသဲ ပာ်ဖျါထီၣ်ဝဲ “ဒီးဟံးန့ၢ်လီခီႇ ဒီးစံးထီၣ်ပတြၢၤတၢ်အဘျုးအဖှိၣ်, ဒီးဟ့ၣ်ဝဲလၢအီၤဒီးစံးဝဲဒၣ်, အီသုဝဲခဲလၢာ်လၢအီၤတက့ၢ်. အဂ့ၢ်ဒ်အံၤႇ အအံၤမ့ၢ်ယသွံၣ်ဘၣ်ဃးဒီး တၢ်အၢၣ်လီၤအီလီၤအသီႇ လၢအဘၣ်လူလီၤအသးလၢၦၤအါဂၤအဂီၢ် လၢတၢ်ပျၢ်တၢ်ဒဲးဘးအဂ့ၢ်” (မး ၂၆:၂၇-၂၈) န့ၣ်လီၤ. လီခီအံၤ, မ့ၢ် ကစၢ်ယ့ၣ်ၡူးအသွံၣ် လၢအလူလီၤဝဲလၢပဂီၢ်, အက့ၢ်ဂီၤဒိန့ၣ်လီၤ.

ဘျၢတၢ်စီၤယိၤဟၣ် ဒုးသ့ၣ်ညါဆိပှၤလၢ ကစၢ်ယ့ၣ်ၡူး ဒ်အမ့ၢ် “ယွၤအသိဖိလၢအစိာ်ထီၣ်ကွံာ် ၦၤဟီၣ်ခိၣ်ဖိအတၢ်ဒဲးဘး” (ယိၤ ၁:၂၉) န့ၣ်လီၤ. လံာ်ဧ့ၤဘြံ စံးဘၣ်ပှၤ, “တၢ်သွံၣ်လူလီၤအသး တအိၣ်ဘၣ်ဒီးႇ တၢ်ပျၢ်ကွံာ်တအိၣ်ဘၣ်” န့ၣ်လီၤ. ဒီးစီၤပီလူးကွဲးပာ်ဖျါ “ပတၢ်ဘူၣ်လဲၤကပာ်” န့ၣ် မ့ၢ် ကစၢ်ခရံာ် အနီၢ်ကစၢ်ဝဲဒၣ် (၁ကရံၣ် ၅:၇) န့ၣ်လီၤ. ကစၢ်ယ့ၣ်ၡူး ဟ့ၣ်လီၤအသးသမူ လၢပတၢ်ဒဲးဘးအဘူးအလဲအဂီၢ်န့ၣ်လီၤ. ပတၢ်အုၣ်က့ၤခီၣ်က့ၤကစၢ်, သိဖိလၢအလူလီၤအသွံၣ်, အတၢ်ဘျုးတၢ်ဖှိၣ်န့ၣ် ဂ့ၤပစံးဘျုးစံးဖှိၣ်က့ၤအီၤဆံးဒိၣ်လဲၣ်.