ဟဲသၢၢ် (Heather) ကိးဝဲဒၣ် အဝၤ, ထ့(မ) (Tim) လၢကွဲၤဒီနၢ်, စံးဘၣ်အီၤလၢ “တၤဟိဆံးဖိတဒု ဟဲဘျးထီဃာ်အသး, လၢပကရၢၢ်” န့ၣ်လီၤ. ထ့(မ) မၤထူၣ်ဖျဲးအီၤကယီကဃီဝံၤန့ၣ်ဒီး, တထံၣ်ဝဲဒၣ် တၤဟိဖိအမိၢ်န့ၣ်ဘၣ်. ဖဲမုၢ်ဃ့ၢ်လီၤန့ၣ် ထ့(မ) ထံၣ်ဝဲဒၣ်တၤဟိတဖု အိၣ်ဟဲဟးထီၣ်လၢသ့ၣ်ၦၢ်ပူၤ, ဒီးဃုအီၣ်အဆၣ် ဖဲတၢ်လီၢ်လၢအတဘူးတယံၤန့ၣ်လီၤ. မ့မ့ၢ်တၤဟိမိၢ်တဒုန့ၣ် ဖျါလၢအအိၣ်ဒီးတၢ်ပလီၢ်ပဒီအသးလီၤလီၤဆီဆီအဃိ, လၢအသးပူၤန့ၣ် ထ့(မ) ဆိကမိၣ်ဝဲဒၣ်လၢ ကမ့ၢ်ဝဲ တၤဟိဖိအမိၢ်သ့ၣ်သ့ၣ်န့ၣ်လီၤ. လၢအကွဲၤဒီနၢ်အပူၤ, ဒၢနုာ်ပာ်ကီၤဝဲ တၤဟိဖိ ကိးပသူထီၣ်ဝဲ လၢတၢ်သူၣ်ကိၣ်သးဂီၤအပူၤအကလုၢ်န့ၣ် အိးထီၣ်ဝဲဒၣ် ဒီးမၤဒိၣ်ထီၣ်တၢ်အကလုၢ်န့ၣ်လီၤ. တၤဟိမိၢ်န့ၣ် လူၤပိာ်အခံ, ဒီးနဲၣ်ဆှၢဝဲဆူ တၤဟိဖိအိၣ်တၢ်အလီၢ်န့ၣ်လီၤ. တကီၢ်ခါန့ၣ် တၤဟိဖိ အီဘၣ်အမိၢ်အနုၢ်ထံ, ဒီးဒိးန့ၢ်တၢ်သဘျ့, တၤဟိအမိၢ်ဒီးအဖိ ထံၣ်လိာ်က့ၤအသး, ခီဖျိလၢ ထ့(မ) အတၢ်မၤစၢၤကဟုကယာ်ကပုာ်လုာ်ဖိအဃိန့ၣ်လီၤ.

ကစၢ်ယွၤ ကကွၢ်ထွဲကဟုကယာ် အပှၤဂီၢ်မုၢ်, ဒီးကတဲာ်ကတီၤန့ၢ် တၢ်သဘျ့လၢပလိၣ်ဘၣ်အီၤန့ၣ် အသူၣ်အိၣ်သးအိၣ်ဝဲဒၣ်နီၢ်နီၢ်န့ၣ်လီၤ. ၦၤအံၣ်စရ့လးဖိတဖၣ်အခီၣ်ဘၣ်တိၢ်, လီၤဃံၤလၢ အတၢ်ဒဲးဘးဒၣ်ဝဲအပူၤ, ဒီးဘၣ်တၢ်စိာ်မၢကဲကုၢ်ဆူဘၤဘူၤလိၣ်န့ၣ်လီၤ. ကစၢ်ယွၤ အၢၣ်လီၤဝဲဒၣ်လၢ “ကွၢ်ကွၢ်, ယဲဒၣ်အံၤႇ ယၤဒၣ်လဲာ်, ယကဃုယသိတဖုႇ ဒီးယကချုအီၤ” (ယဃ့း ၃၄:၁၁) န့ၣ်လီၤ. မ့ၢ်လၢ ၦၤအံၣ်စရ့လးဖိ ခိၣ်နၢ်တဖၣ် မၤ “လီၤပြံလီၤပြါ” (:၁၂) အပှၤဂီၢ်မုၢ်အဃိႇ ကစၢ်ယွၤ စံးဝဲဒၣ် “ယကဃုတၢ်လၢအဟါမၢ်, ဒီးဒုးဟဲက့ၤတၢ်လၢ တၢ်ဟီထီၣ်ကွံာ်အီၤ” (:၁၆) န့ၣ်လီၤ.

ကစၢ်ယွၤ အတၢ်ကွၢ်ထွဲကဟုကယာ်တၢ်အဒိၣ်ကတၢၢ်အဂ့ၢ်န့ၣ် ၦၤစူၢ်က့ၤနာ်က့ၤကစၢ်ယ့ၣ်ၡူးတဖၣ် ထံၣ်ဝဲဒၣ်လၢ ယွၤအတၢ်မၤ, လၢအဃုထံၣ်န့ၢ်က့ၤပှၤ, ဒီးအတၢ်အုၣ်က့ၤခီၣ်က့ၤပှၤအပူၤန့ၣ်လီၤ. ကစၢ်ယ့ၣ်ၡူး စံးဝဲဒၣ်လၢ “ၦၤကွၢ်သိ လၢအဂ့ၤတဂၤန့ၣ်, ပာ်လီၤကွံာ်အသးသမူလၢ သိအဂီၢ်” (ယိၤ ၁ဝ:၁၁) န့ၣ်လီၤ. ဖဲလၢပကဲတၢ်ဒဲးဘးအကုၢ်, ဒီးပလီၤမၢ်အကတီၢ်, ကစၢ်ယွၤ ဃုထၢဝဲလၢ ကအုၣ်က့ၤခီၣ်က့ၤၦၤခီဖျိလၢတၢ်ဟ့ၣ် အၦ့ၤကလံၤဒိၣ်နီၢ်မးအပူၤန့ၣ်လီၤ. တၢ်လၢမုၢ်တနံၤအံၤ, ဒီးကိးမုၢ်နံၤဒဲးအဂီၢ်န့ၣ် တၢ်သဘျ့, မ့ၢ်တၢ်လုၢ်ဒိၣ်ၦ့ၤဒိၣ်တမံၤန့ၣ်လီၤ. မ်ပကမၤလၤကပီၤ ၦၤကွၢ်သိလၢအဂ့ၤ, လၢအမၤပူၤမၤဖျဲးၦၤတဂၤန့ၣ်တက့ၢ်.