လၢမုၢ်နၤတၢ်ထုကဖၣ် တၢ်ဘါအဂီၢ်, ပိာ်မုၣ်သးၦၢ်တဂၤ ဟဲထီၣ်ဝဲဒၣ်ချ့ချ့ဆူ တၢ်ဘါသရိာ်အလီၢ်စီဆှံ လၢအဖီခိၣ်တကထၢန့ၣ်လီၤ. မ့ၢ်လၢအခီၣ်ဆါ, (မ့) သါထီၣ်သါလီၤတလၢသါအဃိ, ဖဲအဝဲဆိကတီၢ်အိၣ်ဘှံးတစိၢ်ဖိန့ၣ်ဒီး, ၦၤလဲၤခီဂာ်အီၤတဂၤန့ၣ် စံးဘၣ်အီၤ “တၢ်လၢနကဘၣ်မၤထဲဒၣ်တမံၤဧိၤန့ၣ် ထီၣ်ဃီသွါတဘျီန့ၣ်ထဲခီၣ်ခါတကါန့ၣ်လီၤ. လဲၤထီၣ်နဲဘီၣ်ဘီၣ်ညီညီတက့ၢ်” န့ၣ်လီၤ. အတၢ်ကတိၤန့ၣ် ပညိၣ်ဝဲလၢ ကဟ့ၣ်ဂံၢ်ဟ့ၣ်ဘါ ပိာ်မုၣ်သးၦၢ်အံၤန့ၣ်လီၤ. ဒ်သိးပိာ်မုၣ်တဂၤအံၤ ကလဲၤတုၤဆူ တၢ်ဖီခိၣ်အဂီၢ်န့ၣ် ကကဲထီၣ် တၢ်န့ၢ်ဂံၢ်န့ၢ်ဘါသ့ၣ်သ့ၣ်န့ၣ်လီၤ. အဝဲအတၢ်ကတိၤတဖၣ်န့ၣ် လၢယသူၣ်လီၤဘှံးသးလီၤဘှံးအဂီၢ်, ကဲထီၣ်တၢ်န့ၢ်ဂံၢ်န့ၢ်ဘါနီၢ်နီၢ်, ဖဲယလဲၤထီၣ်ဘါယွၤ လၢမုၢ်ဟါတၢ်ထုကဖၣ်အကတီၢ်ဖိအံၤန့ၣ်လီၤ.

လၢပသးသမူအပူၤ, ပတၢ်စူၢ်တၢ်နာ် အတၢ်လဲၤအကျဲန့ၣ်, ဖျါလၢအထီကဲၣ်ဆိး, (မ့) ကျဲလၢအကီအခဲကဲၣ်ဆိးအဃိ, ပသးကကလၢၢ်ဘၣ်လၢ ပကဆိကတီၢ်ကွံာ် ပတၢ်လဲၤကျဲအဂီၢ်, ဒ်တၢ်လ့ပစီလီၤဘၣ်ပှၤန့ၣ်လီၤ. ဘၣ်ဆၣ်, လၢတၢ်အကတီၢ်ဖိဒ်သိးအံၤတဖၣ် အပူၤန့ၣ် ပဃုထံၣ်န့ၢ် တၢ်မၤမုာ်ထီၣ်က့ၤပသးသ့ဝဲဒၣ် ခီဖျိလၢဝံယၡါယၤ အတၢ်ကတိၤတဖၣ်, လၢအစံးကတိၤမၤမုာ်ထီၣ်က့ၤ ၦၤအံၣ်စရ့လးဖိတဖၣ်န့ၣ်လီၤ. ဝံပာ်ဖျါထီၣ်ဝဲဒၣ်လၢခံအကတၢၢ်န့ၣ် ကစၢ်ယွၤ ကအုၣ်က့ၤခီၣ်က့ၤ ၦၤအံၣ်စရ့လးဖိတဖၣ် လၢအဘၣ် တၢ်စိာ်မၢကဲကုၢ်ဆူ ဘၤဘူၤလိၣ် အထံကီၢ်, လၢနံၣ်ဆံဆဲၣ်တဖၣ်အတီၢ်ပူၤ, ဒီးတၢ်ဂီၤတၢ်ဖီၣ်လၢ အစိအကမီၤတအိၣ်တဖၣ် (ယၡါ ၄ဝး၁၈-၂ဝ) န့ၣ် ကစၢ်ယွၤ တဘၣ်အသးအဂ့ၢ်န့ၣ် ဒုးသ့ၣ်နီၣ်ထီၣ်က့ၤဝဲ ပှၤဂီၢ်မုၢ်န့ၣ်လီၤ. ယွၤလၢအသ့တၢ်လၢာ်, လၢအတ့လီၤမူခိၣ်, ဒီးဟီၣ်ခိၣ်တဂၤ, “တလီၤဘှါဘၣ်ဒီး တၢ်တဘှံးဘၣ်အသးဘၣ်” (ယၡါ ၄ဝ:၂၈-၂၉). “ၦၤလၢအမုၢ်လၢ်တၢ်လၢယွၤန့ၣ် အဂံၢ်အဘါကဆူၣ်ထီၣ်လီၤ. ကယူာ်ထီၣ်အဒံးဆ့ ဒ်လံာ်ဧိၤတြၤဧိၤအသိးႇ ကဃ့ၢ်ဝဲဒီး တၢ်တဘှံးဘၣ်အသးဘၣ်, ဒီးကလဲၤတၢ်ဒီးတလီၤဘှံးလီၤတီၤဘၣ်” (:၃၁) န့ၣ်လီၤ.

ဝံယၡါယၤ အတၢ်ကတိၤတဖၣ်န့ၣ် ဟ့ၣ်ဂံၢ်ဟ့ၣ်ဘါ ၦၤအံၣ်စရ့လးဖိႇ ဒီးပဒိးန့ၢ်တၢ်ဂံၢ်တၢ်ဘါသ့ဝဲဒၣ်လၢ “ယွၤမ့ၢ် ကစၢ်အထူအယိာ်” (:၂၈-၂၉) တဂၤဃီ, လၢအဝဲသ့ၣ်နာ်ဝဲတဂၤအအိၣ်န့ၣ်လီၤ. လၢတၢ်နာ်န့ၢ် ကစၢ်ယွၤအပူၤန့ၣ် မ်ပကလဲၤတနံၤဘၣ်တနံၤ, ဒီးတကတီၢ်န့ၣ် ခီၣ်ခါတကါဘၣ်တကါန့ၣ်တက့ၢ်. ဒ်ပမုၢ်လၢ်တၢ်ဆူညါ, လၢကစၢ်ယွၤ အမ့ၢ်အတီတဂၤအလိၤအသိးန့ၣ် လၢယွၤအလၤကပီၤအဂီၢ်, ဖဲလၢပလဲၤတၢ်, ပဃ့ၢ်တၢ်, ဒီးပယူၤထီၣ်ဆူထးန့ၣ်ဒီး, ကစၢ်ယွၤ ကမၤစၢၤပှၤန့ၣ်လီၤ.