စံၣ်အဲးလူဝံး (C.S.Lewis) ကွဲးဝဲဒၣ် အလံာ် (Out of the Silent Planet) အပူၤန့ၣ်, ၦၤတဂၤ စံးကတိၤဝဲဒၣ်လၢ “တၢ်သးမုာ်သးခုလၢ အဘၣ်တၢ်သ့ၣ်နီၣ်ထီၣ်က့ၤအီၤတမံၤန့ၣ် မ့ၢ်တၢ်သးမုာ်သးခု အလၢအပှဲၤ” န့ၣ်လီၤ. တၢ်ကတိၤတထံၣ်အံၤ အဲၣ်ဒိးပာ်ဖျါထီၣ် ၦၤတဂၤ သ့ၣ်နီၣ်ထီၣ်က့ၤခါလၢအပူၤကွံာ်, အသးသမူအတၢ်လဲၤခီဖျိတဖၣ် လၢအအဲၣ်ဘၣ်ဝဲ, ဒီးတသးပ့ၤနီၣ်ဝဲဒၣ်တမံၤမံၤ, ဒီးမုာ်လၤသးခုဝဲအဂ့ၢ်န့ၣ်လီၤ. ဖဲပလဲၤဟးထီၣ်ကစၢၢ် အတၢ်လဲၤကျဲန့ၣ် ပကထံၣ်ဘၣ် တၢ်လီၢ်တၢ်ကျဲအဃံအလၤတဖၣ်လၢ အထုးန့ၢ်သူၣ်န့ၢ်သး, (မ့) ၦၤလၢပအဲၣ်ဘၣ်အီၤတဂၤန့ၣ် ပလဲၤခီဖျိနီၤဟ့ၣ်လိာ်သးဒီးတၢ်ဂ့ၢ်လၢ အကါဒိၣ်တမံၤမံၤအကတီၢ်ဖိန့ၣ် ကမ့ၢ်ဝဲ ပတၢ်သးခုအခီၣ်ထံးတပတီၢ်န့ၣ်လီၤ. လၢခံ, ဖဲပဆိကမိၣ်ထီၣ်က့ၤ တၢ်အကတီၢ် ဒ်သိးအံၤတဖၣ် (ဒီးလၢအလီၤဂာ်ဒီးအီၤတဖၣ်) န့ၣ် ပာ်ဖှိၣ်ထီၣ်တၢ်သးခုလၢ ပလဲၤခီဖျိဘၣ်တၢ်သ့ၣ်တဖၣ်အံၤအဃိန့ၣ်လီၤ.
ဘၣ်သ့ၣ်သ့ၣ်, ကမ့ၢ်ဝဲဒၣ် တၢ်ဂ့ၢ်တၢ်ကျိၤအဂၤတမံၤလၢ ကစၢ်ယ့ၣ်ၡူး နဲၣ်လီၤ အပျဲၢ်အဘီၣ်တဖၣ်လၢ ကညီနုၢ်အီၣ်အီသကိးတၢ်, ဒီးပကိးအီၤလၢ ကစၢ်ခရံာ် အဟါတၢ်အီၣ်န့ၣ်လီၤ. မုၢ်တနၤ, ဖဲ ကစၢ်ယ့ၣ်ရှူး တချုးဟ့ၣ်လီၤအသးသမူန့ၣ် ဟံးန့ၢ်သကိး ဘူၣ်လဲၤကပာ် ဟါအတၢ်အီၣ်ဒီးအပျဲၢ်အဘီၣ်တဖၣ်အကတီၢ်, ပာ်ဖှိၣ်အါထီၣ်ဝဲဒၣ် တၢ်အခီပညီအသီတထံၣ်န့ၣ်လီၤ. ဖဲအဝဲသ့ၣ်ဟံးန့ၢ်သကိး ဘူၣ်ကိၣ်တအိၣ်ဘၣ်ဒီးကိၣ်မံၣ်, ဒီး “စပံးမုၢ်အသၣ်အထံ” အကတီၢ်, ကစၢ်ယ့ၣ်ၡူး ပာ်ဖျါထီၣ်ဝဲ ဒ်အမ့ၢ်အနီၣ်ခိ, ဒီးအသွံၣ် (လူၤ ၂၂:၁၉-၂ဝ) န့ၣ်လီၤ. လၢ “တၢ်သ့ၣ်နီၣ်ထီၣ်က့ၤအီၤ” (:၁၉) အဂီၢ်န့ၣ် အပျဲၢ်အဘီၣ်တဖၣ် ကဘၣ်ညီနုၢ်မၤ တၢ်ဟံးန့ၢ်အီၣ်အီသကိး, ဘူၣ်စီဆှံန့ၣ်လီၤ.
ၦၤယူဒၤဖိတဖၣ် မၤဝဲ ဘူၣ်လဲၤကပာ်အမူး, လၢတၢ်သ့ၣ်နီၣ်ထီၣ်က့ၤ ကစၢ်ယွၤ အုၣ်က့ၤခီၣ်က့ၤအဝဲသ့ၣ်လၢ ကီၢ်အဲၤကူပတူးအဂ့ၢ် (၂မိၤ ၁၂:၁၇) န့ၣ်လီၤ. ၦၤလၢအနာ် ကစၢ်ယ့ၣ်ၡူး တူၢ်သံအသးအဂ့ၢ်တဖၣ်န့ၣ် တဲကဒါက့ၤ ကစၢ်ယွၤ အုၣ်က့ၤခီၣ်က့ၤပှၤလၢတၢ်ဒဲးဘးအဂ့ၢ်, ခီဖျိလၢတၢ်ဟံးန့ၢ်သကိး ကစၢ်ခရံာ် အဟါတၢ်အီၣ်, ဒီးတၢ်အံၤမ့ၢ် တၢ်လၢအလီၤသူၣ်အုးသးအုးဘၣ်ဆၣ်, မ့ၢ်ဝဲဒၣ်တၢ်သ့ၣ်နီၣ်လၢအအိၣ်ပှဲၤဒီးတၢ်သးခုန့ၣ်လီၤ. ခီဖျိလၢပမၤညီနုၢ် တၢ်ဟံးန့ၢ်သကိး ဘူၣ်စီဆှံန့ၣ် မ့ၢ်ဝဲဒၣ်ပမၤထွဲ တၢ် “အိၣ်ဝဲဆိးဝဲလၢအပူၤ” (ယိၤ ၆:၅၆) အခီပညီ, လၢအမ့ၢ်တၢ်ရ့လိာ်မုာ်လိာ်ဒီးကစၢ်ယ့ၣ်ၡူး, ဒီးပမုာ်လၤသးခုဝဲဒၣ်လၢတၢ်ရ့လိာ်သးဒီးကစၢ်ယ့ၣ်ရှူးန့ၣ်လီၤ.
