ဒ်ပှၤသးစၢ်တဂၤအသိး, ယၤဒီးယတံၤသကိး လံစၣ် (Lisa) န့ၣ် ပလဲၤထီၣ်ဘါယွၤလၢတၢ်ဘါသရိာ်တဖျၢၣ်ဃီဘၣ်ဆၣ်, ပတၢ်ရ့လိာ်ဘၣ်ထွဲလိာ်သးန့ၣ် တဘၣ်လိာ်ဘၣ်စးအဃိ, ဖဲယသ့ၣ်ညါဘၣ်လၢ တၢ်ကိၢ်ခါ သးစၢ်တၢ်မၤလိအကတီၢ်, ပကဘၣ်အိၣ်ဆိးသကိးလၢဒၢးတဖျၢၣ်ဃီန့ၣ်ဒီး, ယသးဟးဂီၤယဲဒၣ်န့ၣ်လီၤ. မ့ၢ်လၢပသကိးခံဂၤ ပပာ်ပသးသ့သ့ဘၣ်ဘၣ်အဃိ, တၢ်မၤလိ ဒီတနွံညါန့ၣ် လဲၤအသးဂ့ၤဂ့ၤဘၣ်ဘၣ်န့ၣ်လီၤ.

နွံအကတၢၢ်တသီ, တၢ်ပာ်ဖှိၣ်သကိး ဖဲမ့ၣ်အူပူၣ်အကပၤ မူးသးဖှံ အတၢ်ရဲၣ်တၢ်ကျဲၤန့ၣ် မ့ၢ်ဝဲ ပှၤအါဒံအါဂၤ ဆၢမုၢ်လၢ်တ့ၢ်ဝဲ အဒိၣ်ကတၢၢ်န့ၣ်လီၤ. ဘၣ်ဆၣ်, ဖဲမုၢ်နံၤအံၤ, ဟါလီၤခီန့ၣ်, တၢ်ကိၢ်ထီၣ်ယအိၣ်တဆူၣ်အဃိ, ယနုာ်လီၤမံဆိဆိဘၣ်ဆၣ်, ယနၢ်ဟူ တၢ်နံၤတၢ်အ့တဖၣ်, ဒီးတၢ်သူၣ်ဝံၣ်သးဆၢတဖၣ်န့ၣ်လီၤ. တနၣ်ရံၣ် လဲၤပူၤကွံာ်ဝဲ, ဒီးဖဲ လံစၣ် ဟဲထိၣ်ကွၢ် ယတၢ်ကိၢ်န့ၣ်ဒီး, ယဖုးဘၣ်ယသးန့ၣ်လီၤ. အဝဲ စံးဘၣ်ယၤ “ယတလဲၤ မ့ၣ်အူပူၣ် အတၢ်ရဲၣ်တၢ်ကျဲၤလၢၤဘၣ်. နအိၣ်တဆူၣ်န့ၣ် ယကအိၣ်ဒီးနၤ” န့ၣ်လီၤ. လံစၣ် မ့ၢ်တဟဲအိၣ်ဒီးယၤန့ၣ် သ့ဝဲဘၣ်ဆၣ်, ဃုထၢဝဲဒၣ်လၢ ကအံးထွဲကွၢ်ထွဲယၤ, တၢ်လၢအမၤဆူၣ်ထီၣ် ယနီၢ်သးအဂံၢ်အဘါန့ၣ်လီၤ.

ပှၤလၢအကဟုကယာ်တၢ်တဂၤအဂ့ၢ်, အဒိတဲာ်အဂၤတထံၣ်န့ၣ် ပထံၣ်ဘၣ်လၢ စီၤနဧၤမၣ် အတၢ်တဲပူအပူၤန့ၣ်လီၤ. စူၤရံအသုးခိၣ်, စီၤနဧၤမၣ်န့ၣ် အိၣ်ဝဲဒီးကုၢ်ပိာ်မုၣ်ဖိသၣ်အဆံးတဂၤ, ဟဲက့ၤစိာ်မၢကဲကုၢ်လၢ အံၣ်စရ့လးအကီၢ်ပူၤ, “ဒီးအိၣ်ဝဲလၢ စီၤနဧၤမၣ်အမါအအိၣ်” (၂ စီၤ ၅:၂) န့ၣ်လီၤ. ပိာ်မုၣ်ဖိသၣ်အံၤ ဘၣ်အိၣ်လီၤဖးဒီး အဟံၣ်ဖိဃီဖိ, ဒီးဘၣ်တၢ်မၢဆူၣ်မၤကုၢ်အတၢ်မၤန့ၣ် ဒ်သိးအသုတမၤစၢၤ အကစၢ်လၢ အလိၤတဂ့ၤတဂၤအဂီၢ်, ဃုထၢဝဲသ့န့ၣ်လီၤ. ဘၣ်ဆၣ်, ဒ်သိးကမၤစၢၤဝဲအဂီၢ်, အတၢ်စူၢ်တၢ်နာ် ထိၣ်ဟူးထိၣ်ဂဲၤအီၤ, “ဒီးစံးဘၣ်အကစၢ်မုၣ်, မ်ယကစၢ်အိၣ်ဝဲလၢ ဝံအမဲာ်ညါလၢအအိၣ်ဝဲလၢ ရှၤမရံအပူၤန့ၣ်တက့ၢ်, တုၤနုၤတစု ကမၤဘျါက့ၤအီၤလၢ အတၢ်ဆါအၢ” (:၃) န့ၣ်လီၤ. ဒ်သိး ကစၢ်ယွၤ ကယါဘျါက့ၤတၢ်အဂီၢ်, စူးကါဝဲဒၣ် ဝံအလံၤရှါ (:၈-၁၄), ဒီးမၤဘျါဝဲဒၣ် စီၤနဧၤမၣ် အတၢ်ဆါအၢန့ၣ်လီၤ.

လံစၣ်ဒီးအံၣ်စရ့လး ကုၢ်ပိာ်မုၣ်ဖိသၣ်န့ၣ် ဃုထၢဝဲလၢ ကမၤစၢၤတၢ်, ဒီးယွၤမၤတၢ် ခီဖျိလၢအဝဲသ့ၣ်န့ၣ်လီၤ. ဒ်သိးကစၢ်ယွၤ ကဒုးနဲၣ်ပှၤဆူ ပှၤသ့ၣ်တဖၣ်လၢပကဘၣ်မၤလဲၢ်အါထီၣ် ယွၤအတၢ်ကဟုကယာ်, ဒီးဒ်သိးကဟ့ၣ်လီၤပှၤ တၢ်ကူၣ်သ့လၢ
ပကဘၣ်မၤတၢ်ဒ်လဲၣ်အဂီၢ်, မ်ပကသံကွၢ်ကစၢ်ယွၤန့ၣ်တက့ၢ်.