ယမၤသကိးတၢ်ဒီးမဲး(ကၠ) (Madge), အဝဲမ့ၢ် ပိာ်မုၣ်လၢ အဖီအီၣ်တၢ်သ့စဲၣ်နီၤတဂၤန့ၣ်လီၤ. ဘၣ်တနံၤန့ၣ် အဝဲစံးဘၣ်ယၤလၢ “နကြၢးအီၣ်ကွၢ် ယဘီဘၣ်သၣ် (pea) ဒီးထီးကံၢ်ဒုၣ်တၢ်ထံန့ၣ်လီၤ.” ယစံးဆၢအီၤလၢ ယအီၣ်ဘီဘၣ်သၣ်တဝံၣ်တဘဲဘၣ်န့ၣ်ဒီး, မဲး(ကၠ) န့ၣ် နံၤထီၣ်ဝဲ, ဒီးစံးဘၣ်ယၤ, “နမ့ၢ်အီကွၢ် ယတၢ်ထံဝံၤန့ၣ်ဒီး, နကစံးလၢဝံၣ်ဝဲဘဲဝဲဒၣ်န့ၣ်လီၤ.” လၢခံတနံၤန့ၣ် အဝဲကတဲာ်ကတီၤ တၢ်ထံလီၤလီၤဆီဆီလၢယဂီၢ်, ဒၢနုာ်ဝဲလၢလီခီဒၢတဖျၢၣ်အပူၤ, ဒီးဟ့ၣ်ယၤန့ၣ်လီၤ.
တဘျုးသီလဲၤပူၤကွံာ်ဝံၤ, မဲး(ကၠ) သံကွၢ်ယၤလၢ “မ့ၢ်နအီကွၢ်ယကသူထံလံဧါ” န့ၣ်လီၤ. ဒ်သိးအသုတသံကွၢ်ကဒီးယၤအဂီၢ်, ယစံးဆၢအီၤလၢ “ယကအီကွၢ်” န့ၣ်လီၤ. ဘၣ်ဆၣ်, အဝဲသံကွၢ်ယၤ တသီဝံၤတသီန့ၣ်လီၤ. လွံၢ်သီလဲၤပူၤကွံာ်ဝံၤအလီၢ်ခံန့ၣ် အဝဲစံးဘၣ်ယၤလၢ “တဘၣ်ပာ်အီၤယံာ်ယံာ်တဂ့ၤ, ကဟးဂီၤဝဲဒၣ်” န့ၣ်လီၤ.
တနွံပူၤကွံာ်ဝဲဒီး, မဲး(ကၠ) အကသူထံ, လၢယတအီဒံးဘၣ်အီၤန့ၣ် ဟးဂီၤဝဲဒၣ် ဒီးယစူးကွံာ်အီၤန့ၣ်လီၤ. ဖဲ မဲး(ကၠ) ဟဲဆူ ယအိၣ်ဒီးသံကွၢ်ယၤလၢ “နအီယကသူထံဝံၤလံဧါ” န့ၣ်ဒီး, ယဖုးသံပျီၢ်သံဘၣ်ယသးန့ၣ်လီၤ. ယစံးဆၢအီၤလၢ “ယအီကွၢ်ဝံၤလံ, နကသူထံန့ၣ် ဝံၣ်ဘဲဝဲဒိၣ်မး” န့ၣ်လီၤ.
လံာ်အ့းဖ့းစူး ၄ အပူၤန့ၣ် စီၤပီလူး ပာ်ဖျါဝဲဒၣ် ပမၤတၢ်ဒဲးဘး, ခီဖျိပစံးကတိၤ တၢ်သူၣ်ဒိၣ်သးဖျိးအပူၤ (:၂၆), တၢ်ကတိၤလၢ အအၢအသီ (:၂၉), တၢ်ကတိၤဒုၣ်ဒွဲၣ်တၢ် (:၃၁) တဖၣ်န့ၣ်လီၤ. ဘၣ်ဆၣ် တချုးလၢ တၢ်ကတိၤသ့ၣ်တဖၣ်န့ၣ် စီၤပီလူး ပာ်ဖျါထီၣ် တၢ်ကတိၤအၢသီတဖၣ်အံၤန့ၣ် ပာ်ဖျါဆိဝဲဒၣ်လၢ “ကတိၤလိာ်သုသးလၢ တၢ်မ့ၢ်တၢ်တီတဂၤ ဒီးတဂၤ တက့ၢ်” (:၂၅)န့ၣ်လီၤ. တၢ်လၢယကဘၣ်မၤဝဲန့ၣ် ယသ့ၣ်ညါယဲအဃိ, ယကွၢ် မဲး(ကၠ) အမဲာ်သၣ်, ဒီးယစံးကတိၤကဘျံၤကဘျၣ်အီၤန့ၣ်လီၤ.
ယလဲၤဆူ မဲ(ကၠ) အဝဲဒၢး, ဒီးယအၢၣ်လီၤ ယတၢ်ကမၣ်, ဒီး လၢတၢ်မဲာ်ဆှးအပူၤန့ၣ် ယဃ့ပျၢ်ယတၢ်ကမၣ်န့ၣ်လီၤ. မဲး(ကၠ) ဟဲဆူယအိၣ်ဒီး, ဒီးဖိးဃုဃာ်ယၤဃံးဃံး, ဒီးစံးဘၣ်ယၤ “ယပျၢ်နတၢ်ကမၣ်ကသ့ဧါ. ကစၢ်ယွၤ ပျၢ်ယတၢ်ကမၣ်ဒ်လဲၣ်န့ၣ် ယသ့ၣ်ညါယဲအဃိ ယပျၢ်နတၢ်ကမၣ်” န့ၣ်လီၤ.
