ဒ်ပိာ်မုၣ်ဖိသၣ်ဖိတဂၤအသိး, ဖဲယထံၣ်ဘၣ် တၢ်ဒုးနဲၣ်အတၢ်ပနီၣ်လီၤဆီတဖၣ်လၢ ပတၢ်လဲၤကျဲအကပၤန့ၣ် ယသူၣ်ပိာ်သးဝးယဲဒိၣ်မးန့ၣ်လီၤ. ယဆိကမိၣ်လၢ တၢ်ဒုးနဲၣ်အတၢ်ပနီၣ်လၢအလွဲၢ်အါကလုၢ်တဖၣ်အံၤ ကမ့ၢ်တၢ်ဒုးသ့ၣ်ညါ တၢ်လိာ်ကွဲလီၢ်အမံၤဟူသၣ်ဖျါတတီၤလၢ ယၤဒီးယဟံၣ်ဖိဃီဖိတဖၣ် ကလဲၤဝဲဒၣ်န့ၣ်လီၤ. လၢတၢ်သူၣ်ခုသးခုအပူၤန့ၣ် ယစးထီၣ်ထၢဖှိၣ်ပာ်ဖှိၣ် ယတၢ်ပီးတၢ်လီၤတဖၣ်ဘၣ်ဆၣ်, ဖဲယထံၣ်အါထီၣ် တၢ်ဒုးနဲၣ်အတၢ်ပနီၣ်တဖၣ်, ဒီးတချုးလၢပကလဲၤတုၤဆူ တၢ်လိာ်ကွဲလီၢ်န့ၣ် ယဘၣ်အိၣ်ခိးဒံးဆူညါအဃိ, ယသးဟးဂီၤဝဲဒၣ်န့ၣ်လီၤ. အကတၢၢ်န့ၣ် ယသ့ၣ်ညါဝဲဒၣ်လၢ တၢ်ပနီၣ်တဖၣ်အံၤ ဒုးသ့ၣ်ညါဝဲ ပှၤလဲၤတၢ်ဖိတဖၣ်န့ၣ် ကတုၤဘူးထီၣ်ဘူးလီၤဆူ တၢ်လီၢ်တၢ်ကျဲဘၣ်ဆၣ်, တၢ်ကဘၣ်လဲၤဝဲဒံး မံးလာ်တဖၣ်ဆူညါန့ၣ်လီၤ.

ဒ်ဖိသၣ်လၢအသူၣ်ပိာ်သးဝးတဂၤ ဆိကမိၣ်ဝဲလၢ “မ့ၢ်ယတုၤလံဧါ” အသိး, ပကတုၤဆူ တၢ်လီၢ်တတီၤလၢပကလဲၤအီၤအဂီၢ်န့ၣ် ပတအိၣ်ဒီးတၢ်သူၣ်စူၤသးစူၤ, ဒီးပသးဘၣ်ကိၢ်ဘၣ်ဂီၤဝဲဒၣ်န့ၣ်လီၤ.

တၢ်အိၣ်ခိး ကစၢ်ယွၤ ကမၤတၢ်လၢပတၢ်အိၣ်မူအပူၤ, (မ့) ကမၤပူၤမၤဖျဲးပှၤလၢ ပတၢ်ကီတၢ်ခဲတဖၣ်န့ၣ် မ့ၢ်တၢ်တၤတမံၤလၢပဂီၢ်န့ၣ်လီၤ. လၢထါစံးထီၣ်ပတြၢၤ ၂၇ ဒီတယုၢ်အပူၤန့ၣ် စီၤဒၤဝံး ကွဲးပာ်ဖျါ တၢ်တတၢာ်တနါအါမံၤ, လၢအဘၣ်ကွၢ်ဆၢၣ်မဲာ်ဝဲတဖၣ်န့ၣ်လီၤ. ဘၣ်ဆၣ်, အဝဲ မုၢ်လၢ်ဝဲအဖၢမုၢ်, ဒီးနာ်သန့ၤယွၤ, ဒီးအိၣ်ခိးကွၢ်လၢ် ယွၤအတၢ်စံးဆၢန့ၣ်လီၤ. ယွၤကမၤစၢၤအီၤအဂီၢ်, တၢ်ဆၢကတီၢ်ကယံာ်ဝဲဒၣ်ထဲလဲၣ်န့ၣ် စီၤဒၤဝံး တသ့ၣ်ညါဝဲဘၣ်ဆၣ်, သ့ၣ်ညါဝဲလၢ ယွၤကမၤစၢၤအီၤသပှၢ်တၢၢ်န့ၣ်လီၤ. လၢတၢ်န့ၣ်အဃိ, ကွဲးပာ်ဖျါဝဲဒၣ် “ယမ့ၢ်တနာ်ဘၣ်လၢ ယကထံၣ်ဘၣ် ယွၤအတၢ်ဂ့ၤလၢတၢ်မူအကီၢ်ပူၤဒီး, ယအိၣ်တကဲဘၣ်” (:၁၃) န့ၣ်လီၤ.

တၢ်အိၣ်အသးလၢ ပကဘၣ်လဲၤခီဖျိအီၤတဖၣ်အဂီၢ်, တၢ်ဆၢကတီၢ်ကယံာ်န့ၢ်ဒံးပဆိကမိၣ်တ့ၢ်ဝဲဘၣ်ဆၣ်, “မုၢ်လၢ်တၢ်လၢယွၤတက့ၢ်. ပာ်ဆူၣ်နဂံၢ်နဘါတက့ၢ်. ဒီးမ်အဒုးဆူၣ်ထီၣ်နသးအဂံၢ်အဘါတက့ၢ်. ဒီးမုၢ်လၢ်တၢ်လၢယွၤတက့ၢ်” (:၁၄), စံးဘၣ်ပှၤအသိး, ခီဖျိလၢတၢ်ကတိၤတဖၣ်အံၤအပူၤန့ၣ် မ်ပကပာ်ဆူၣ်ထီၣ်ပသးန့ၣ်တက့ၢ်. လၢတၢ်န့ၢ်ဂံၢ်န့ၢ်ဘါအဂီၢ်, ဖဲပဖးထါစံးထီၣ်ပတြၢၤတဖၣ်, ဒီးလံာ်စီဆှံအဆၢအဂၤတဖၣ် န့ၣ်ဒီး, ဖဲပအိၣ်ခိးတၢ်အကတီၢ်ဒၣ်လဲာ်, ပမ့ၢ်သ့ၣ်ညါလၢ ကစၢ်ယွၤ မၤတၢ်လၢပဂီၢ်န့ၣ် ပပာ်ပသးမုာ်မုာ်သ့ဝဲဒၣ်န့ၣ်လီၤ.