သ့ၣ်တလါလၢ အဘၣ်တၢ်ကွဲးနီၣ်ဃး “တၢ်အီၣ်တၢ်အီ အဃ့ထီ” အပူၤန့ၣ် ဟဲနရံၣ် ဘီး(စ) ဘရီ (Henery Box Brown), မ့ၢ်ဝဲဒၣ် ကုၢ်တဂၤလၢ ဝ့ၢ် ဘၣ်ကၠံနံယၤ န့ၣ် အိၣ်ချံးလီၤအနီၢ်ကစၢ်အသး, ဒီးအတံၤသကိးခံဂၤန့ၣ် တီၣ်ထီၣ်အီၤလၢ ကဘီပူၤ, ကအိၣ်ဟးထီၣ်လၢ ဝ့ၢ် ရ့း(ခၠ) မိ(န) (Richmond), ဒီးဆူ ဝ့ၢ် ဖံၤလဒဲဖံယၢၤ (Philadelphia), ဖဲ ၁၈၄၉ နံၣ်န့ၣ်လီၤ. ကဘီလဲၤတၢ် ၂၆ နၣ်ရံၣ်အတီၢ်ပူၤန့ၣ် ဘရီ ဘၣ်အိၣ်ဆိးဝဲဒၣ်လၢတလါအပူၤ, ပၣ်ဃုာ်ဒီးကလံၤအပူၤ ဆံးဆံးဖိသၢပူၤ, ဒ်သိးကန့ၢ်ဘၣ် ကလံၤအဂီၢ်န့ၣ်လီၤ. ပှၤသ့ၣ်တဖၣ်လၢအဲၣ်ဒိးမၤကတၢၢ် တၢ်မၢကဲကုၢ်အလုၢ်အလၢ်တဖၣ် ဒုးဟးထီၣ်အီၤလၢတလါအပူၤဝံၤ, အဝဲ သးဝံၣ်ထီၣ် ထါစံးထီၣ်ပတြၢၤ ၄၀, ဒ်သိးကပာ်ဖျါထီၣ် အတၢ်မုၢ်လၢ်လၢယွၤ, ကစၢ်လၢအအၢၣ်လီၤအီလီၤ တၢ်သဘျ့တဂၤအဂီၢ်န့ၣ်လီၤ. လၢခံန့ၣ် ဘရီ ကွဲးပာ်ဖျါဝဲဒၣ်လၢ “နမ့ၢ်တဘၣ်တၢ်ဟံးန့ၢ်ဆူၣ် နတၢ်သဘျ့ဒ်သိးယၤဘၣ်န့ၣ်ဒီး, တမ့ၢ်လၢနကသ့ၣ်ညါနၢ်ပၢၢ် တၢ်ဆၢမုၢ်လၢ် တၢ်သဘျ့အစိအကမီၤကသ့ဘၣ်. တၢ်မုၢ်လၢ်ဒ်သိးအံၤန့ၣ် မ့ၢ်ဝဲဒၣ် နီၢ်သက့ၤလီၤတံၢ်လီၤဆဲး, ဒီးအဂၢၢ်အကျၢၤတမံၤ, လၢယနီၢ်သးအဂီၢ်နီၢ်နီၢ်န့ၣ်လီၤ.”

တၢ်သဘျ့န့ၣ် မ့ၢ်ဝဲဒၣ် တၢ်အကါဒိၣ်တမံၤလၢ ကစၢ်ယွၤ အတၢ်မၤ လၢပသူၣ် ပသးအဂီၢ်, ဒီးလၢဟီၣ်ခိၣ်ချၢအံၤန့ၣ်လီၤ. ကစၢ်ယွၤ အတၢ်ကူၣ်သ့န့ၣ် ကနဲၣ်ဆှၢပှၤဆူ ပနီၢ်သးအတၢ်ထူၣ်ဖျဲးဘၣ်ဆၣ်, တၢ်ကူၣ်သ့အကမၣ်န့ၣ် ကနဲၣ်ဆှၢဝဲဆူ တၢ်ဆီၣ်သနံးပှၤန့ၣ်လီၤ. စီၤပီလူး စံးဝဲဒၣ်လၢ “ဒီးဖဲယွၤအသးစီဆှံအိၣ်ဝဲအလီၢ်န့ၣ်, တၢ်သဘျ့အိၣ်ဝဲ,” (၂ ကရံၣ် ၃:၁၇ ခ့ခါကညီစှီၤကျိာ်), တၢ်ပူၤဖျဲးလၢ တၢ်ဒဲးဘး, တၢ်သံ, ဒီးတၢ်စံၣ်ညီၣ်ဃၣ်န့ၣ်လီၤ. ဖဲပဒိကနၣ် ကစၢ်ယွၤ, ဒီးလူၤပိာ်ထွဲ တၢ်ဘၣ်ယွၤအသးန့ၣ်ဒီး, တၢ်အစၢန့ၣ်
ကမ့ၢ်ဝဲဒၣ် တၢ်သဘျ့န့ၣ်လီၤ. တၢ်ဂ့ၢ်လၢအထီဒါလိာ်သးဒီးတၢ်သဘျ့န့ၣ် မ့ၢ်ဝဲတီဝဲအဃိ, ကဲထီၣ်တၢ်လီၤသးအုးန့ၣ်လီၤ. ပမ့ၢ်တကနၣ်ဃုာ် ကစၢ်ယွၤ, ဒီးထီဒါတြီဆၢ ကစၢ်ယွၤအတၢ်ကွဲမုၣ်န့ၣ်ဒီး, ပကဘၣ်တၢ်ဖှီၣ်န့ၢ်ပှၤ, ဒီးဒုးဃာ်ပှၤန့ၣ်လီၤ.

ဘၣ်တဘျီဘျီ, ပနာ်လၢ ကစၢ်ယွၤ တြီဃာ်, ဒီးမၤတံာ်တာ် ပတၢ်ခွဲးတၢ်ယာ်လီၤဆီတဖၣ်, ဒီးပတၢ်မုာ်လၤသးခုတၢ်တဖၣ်န့ၣ်လီၤ. တၢ်မ့ၢ်တၢ်တီတမံၤန့ၣ်, ကစၢ်ယွၤ မ့ၢ်ဝဲဒၣ်
ထဲပှၤတဂၤဧိၤ, လၢကနဲၣ်ဆှၢပှၤဆူ ခါဆူညါတၢ်အဒိၣ်အလဲၢ်အပတီၢ်, ဒီးထဲဒၣ်ပှၤတဂၤဧိၤ, လၢကနဲၣ်ဆှၢပှၤဆူ တၢ်သဘျ့အမ့ၢ်အတီ သ့ဝဲဒၣ်န့ၣ်လီၤ.