ယမိၢ်လၢ အိၣ်ဖျဲၣ်ထီၣ်ယၤတဂၤ အမံၤန့ၣ် ပှၤကိးအီၤဒ်လဲၣ်. ယဖိမုၣ် အသးအနံၣ်အလါ အိၣ်ဒံးဒၣ် နွံနံၣ်ဖိတဂၤ အတၢ်သံကွၢ်ယၤ လၢတၢ်ပာ်သးအမ့ၢ်အတီနီၢ်နီၢ်အပူၤန့ၣ် မၤဘၣ်ဒိယသးဒိၣ်မးန့ၣ်လီၤ. ဖဲပလုၢ်ဖိအီၤအကတီၢ်, ဘၣ်ဃးဒီးအမိၢ်အပၢ်အဂ့ၢ်န့ၣ် ပဘၣ်တၢ်ဒုးသ့ၣ်ညါပှၤ ထဲဒၣ်အနီၢ်ကစၢ်အဖုၣ်အထီ, အတယၢၢ်, အသးအနံၣ်အလါ, ခိၣ်သူဒီးမဲာ်ချံအလွဲၢ်တဖၣ်န့ၣ်လီၤ. ယကဘၣ်စံးဆၢက့ၤအီၤဒ်လဲၣ်. အတၢ်သံကွၢ်ဖိန့ၣ် ဖျါဝဲဒၣ်ဒ်ပကစံးဆၢအီၤ တန့ၢ်တသ့တမ့ၤအသိးန့ၣ်လီၤ. ယသါနုာ်လီၤကလံၤဆူၣ်ဆူၣ်, ဒီးယဃ့ထုကဖၣ်ယဲလၢ, “ပၢ်ယွၤဧၢ, မ့ၢ်ယကဘၣ်စံးဆၢအီၤမနုၤတမံၤလဲၣ်” န့ၣ်လီၤ. တကီၢ်ခါန့ၣ် ယထးခိၣ်အဲးထီၣ်အသးလၢ “နအဲၣ်ဒိးလၢ နမိၢ်အမံၤန့ၣ် ကမ့ၢ်တၢ်မနုၤလဲၣ်” န့ၣ်ဒီး, ယဖိမုၣ် နံၤကမှံထီၣ်ဝဲ, ဒီးတဲဘၣ်ယၤလၢ “မဲးဒလ့(န)” (Madeline), ဒီးယစံးဘၣ်အီၤ “မ့မ့ၢ်ဒ်န့ၣ်ဒီး, နမိၢ်အမံၤန့ၣ် မဲးဒလ့(န)” န့ၣ်လီၤ. ဖဲလၢယတအိၣ်ဒီး တၢ်စံးဆၢနီတမံၤအကတီၢ်ဒၣ်လဲာ်, ယနာ်လၢ ကစၢ်ယွၤ ဟ့ၣ်လီၤန့ၢ်ယၤ တၢ်စံးဆၢန့ၣ်လီၤ.
ကစၢ်ယ့ၣ်ရှူး သံဝံၤအလီၢ်ခံ, နံၣ်တဖၣ်အပူၤန့ၣ်, ပှၤပိာ်ကစၢ်ယ့ၣ်ရှူးအခံတဖၣ် ကဘၣ်ကွၢ်ဆၢၣ်မဲာ်ဒီး တၢ်တၤအကီအခဲတဖၣ်, ဖျါလၢတၢ်ဘှါဆှဲအီၤတန့ၢ်တသ့လၢၤဘၣ်အကတီၢ်, ဒီးဖဲအဝဲသ့ၣ်လိၣ်ဘၣ် ကစၢ်ယွၤအတၢ်စံးဆၢတဖၣ်န့ၣ်လီၤ. ယိၤဟၣ် ၁၄ အပူၤန့ၣ် ကစၢ်ယ့ၣ်ရှူး အၢၣ်လီၤအီလီၤတ့ၢ်ဝဲလၢ “ယတပာ်လီၤတဲာ်ဖိၣ်ဃဲဘၣ်သုဘၣ်. ယကဟဲက့ၤဆူသုအိၣ်” ဒ်သိးယကမၤစၢၤသု (:၁၈) အဂီၢ် န့ၣ်လီၤ. ကစၢ်ယွၤ ကဟ့ၣ်လီၤ တၢ်မၤစၢၤဆူညါကွ့ၢ်ကွ့ၢ်အဂ့ၢ်န့ၣ် ကစၢ်ယ့ၣ်ရှူး ပာ်ဖျါဝဲဒၣ် “ပှၤမၤစၢၤတၢ်, သးစီဆှံလၢ ပၢ်မၢလီၤအီၤလၢယမံၤ, အဝဲဒၣ်ကသိၣ်လိသုလၢ တၢ်ခဲလၢာ်, ဒီးကဒုးသ့ၣ်နီၣ်ထီၣ်က့ၤသုလၢ တၢ်လၢယစံးဘၣ်တဲဘၣ်သုခဲလၢာ်” (:၂၆) န့ၣ်လီၤ.
ဘၣ်တဘျီဘျီ, တၢ်သံကွၢ်လၢ ပဘၣ်ကွၢ်ဆၢၣ်မဲာ်တဖၣ်န့ၣ် ဖျါလၢပကစံးဆၢအီၤတန့ၢ်တသ့ဘၣ်. ပကစံးဆၢ ပဖိသ့ၣ်တဖၣ်, ပတၢ်ဖံးတၢ်မၤ, ပှၤအိၣ်လၢပခိၣ်ပဃၢၤတဖၣ်, ဒီးပတၢ်အိၣ်မူအိၣ်ဂဲၤလၢဟီၣ်ခိၣ်ချၢအံၤအဂီၢ်, ပလိၣ်ဘၣ် ယွၤအတၢ်မၤစၢၤန့ၣ်လီၤ. ဖဲလၢပတၢ်စံးဆၢတဖၣ် တအိၣ်ဝဲဒၣ်အကတီၢ်, ကစၢ်ယွၤ ကဟ့ၣ်လီၤပှၤန့ၣ်လီၤ.