ဖဲယသးပှဲၤထီၣ် (၁၈) န့ၣ် ဒ်ပှၤစ့ကဖီပိာ်ခွါတဖၣ် ကိးဂၤဒဲးဘၣ်မၤဝဲအသိး, ယဘၣ်မၤတၢ်လၢထံကီၢ်အသုးမုၢ်အဂီၢ်န့ၣ်လီၤ. ယမ့ၢ်ဘၣ်တဲတီတီန့ၣ် ဒ်ထံကီၢ် အတၢ်ဘျၢအသိး, ယနူာ်လီၤဆူသုးအတၢ်မၤ, လၢခံနံၣ်ဒီးဃုလါအတီၢ်ပူၤန့ၣ် တမ့ၢ်လၢတၢ်သးဆူၣ်အပူၤဘၣ်. ဒ်ပှၤသးစၢ်အဂၤတဖၣ်အသိး, မူဒါလၢအလီၤဘၣ်ယၤတဖၣ်န့ၣ် ယကျဲးစၢးမၤဝဲဒၣ် ဖဲအဘၣ်ဘၣ်, ဒိကနၣ်တၢ်သိၣ်တၢ်ဘျၢတဖၣ်လၢ တၢ်တအါ-တစှၤအပူၤစ့ၢ်ကီးန့ၣ်လီၤ.
မ့မ့ၢ်, ပှၤအိၣ်ဝဲဒၣ်တနီၤ လၢအဘျုးလီၤအသးလၢ အမူဒါတၢ်ဖံးတၢ်မၤအပူၤ, ဒီးလၢအတၢ်လဲၤခီဖျိအပူၤန့ၣ် မၤလိန့ၢ်ဝဲဒၣ် တၢ်သ့ကဲခိၣ်ကဲနၢ်, ဒီးသးလၢအသ့တူၢ်ခီၣ်တၢ်စွံကတုၤတဖၣ်အါမးန့ၣ်လီၤ. လၢယတၢ်သ့ၣ်ညါစဲၤခံအပူၤ, ယသ့ၣ်ညါထွဲယဲဒၣ်လၢ တၢ်အိၣ်မူ, တၢ်ပာ်သူၣ်ပာ်သး လၢအဂ့ၤတကပၤဒ်သိးအံၤတကလုာ်, လီၤဂာ်ဒိၣ်မးဒီးစီၤယိၤသးအတၢ်အိၣ်မူလၢလံာ်စီဆှံအပူၤန့ၣ် မ့ၢ်တၢ်လၢကမၤမုာ် ကစၢ်ယွၤအသးန့ၣ်လီၤ.
ဘၣ်တၢ်ဆါလီၤကွံာ်အီၤ ဒ်ကုၢ်အသိး, ဒီးလၢခံန့ၣ် ဘၣ်လီၤဝဲဃိာ်ဒၣ်လဲာ်, ကယဲၢ်မူဒါတၢ်ဖံးတၢ်မၤလၢ အလီၤဘၣ်အီၤတဖၣ်န့ၣ် စီၤယိၤသး မၤလၢပှဲၤဝဲလၢ တၢ်ဟ့ၣ်လီၤသးဒိၣ်ဒိၣ်ကလဲာ်န့ၣ်လီၤ. လၢအတၢ်အိၣ်အသးမၤအသးတဖၣ်အဂီၢ်, ကဘၣ်သးဆါသးဖျိးဝဲအလီၢ်န့ၣ် အဝဲတူၢ်လိာ်မၤလၢပှဲၤအမူအဒါအဂ့ၤကတၢၢ်အဃိ, တုၤဒၣ်လဲာ် စီၤပိၤတံၤဖၢ် “ပာ်လီၤတဲာ်ကယဲၢ်တၢ်အိၣ်ဒီးအီၤခဲလၢာ်လၢစီၤယိၤသး အစူပူၤ” (၁ မိၤ ၃၉:၆) န့ၣ်လီၤ. တကးဒ်ဘၣ်န့ၣ် စီၤယိၤသး ကဲထီၣ်ဝဲဒၣ် ပှၤအခိၣ်လၢတၢ်ကွၢ်ထွဲဃိာ်, ဒီးလၢခံအကတၢၢ်, ကီၢ်အဲၤကူပတူး ဒီဘ့ၣ်အခိၣ်, ခံဂၤတဂၤန့ၣ်လီၤ.
နံၣ်ကယၤတဖၣ် လဲၤပူၤကွံာ်ဝံၤ, ပှၤတၢ်မၢဖိစီၤပီလူး ဟ့ၣ်သဆၣ်ထီၣ် ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်လၢ, “ကယဲၢ်သုမၤတၢ်န့ၣ် လၢတၢ်ကတိၤမ့ၢ်ဂ့ၤ, လၢတၢ်မၤမ့ၢ်ဂ့ၤ, မၤတၢ်ခဲလၢာ်လၢကစၢ်ယ့ၣ်ရှူးအမံၤ, ဒီးစံးထီၣ်ပတြၢၤပၢ်ယွၤလၢ အဝဲဒၣ်အဃိတက့ၢ်” (ကလီး ၃:၁၇) န့ၣ်လီၤ. ဖဲလၢပတၢ်အိၣ်အသး မၤအသးတဖၣ် မ့ၢ်တဘၣ်လိာ်ဘၣ်စးလၢလၢပှဲၤပှဲၤဘၣ်ဆၣ်, မူဒါတၢ်ဖံးတၢ်မၤလၢအလီၤဘၣ်ပှၤတဖၣ်န့ၣ် ဒ်သိးပကမၤလၢပှဲၤအီၤတီတီလိၤလိၤအဂီၢ်, မ်ကစၢ်ယွၤ လၢအထံၣ်သ့ၣ်ညါပသးနီၢ်နီၢ်တဂၤ, ကမၤစၢၤပှၤန့ၣ်တက့ၢ်.