တၢ်လၢနထံၣ်ဘၣ်တဖျးမဲာ်, ဒီးနဖီၣ်ဟံးဃာ် တန့ၢ်တသ့တမံၤမံၤန့ၣ် မ့ၢ်နဆၢမုၢ်လၢ်ဒိးန့ၢ် ဘၣ်အီၤဧါ. စံၣ်. အဲး(စ) လူဝ့း(စ) (C. S. Lewis) ဆၢဒိးန့ၢ်ဝဲဒၣ် တၢ်သူၣ်ခုသးခုန့ၣ်လီၤ. အဝဲကွဲးပာ်ဖျါဝဲလၢ “ပဆၢမုၢ်လၢ်လၢ ပကပာ်ဖှိၣ်ထီၣ်က့ၤပသးလၢ တၢ်တမံၤမံၤ, လၢအမ့ၢ်ယွၤ လၢအိၣ်ဆိးဝဲဒၣ်လၢ စးကဝၣ်အပူၤ, ဒီးပသးကလၢၢ်ဘၣ်ဝဲ ဒ်အဘၣ်တၢ်မၤတဲာ်ကွံာ် အတၢ်ဘၣ်ထွဲလိာ်သးဒီးပှၤအသိးန့ၣ်လီၤ. ပအိၣ်လၢတၢ်ချၢ, ပထံၣ်ဘၣ် ထဲပဲတြီလၢအချၢတကပၤ, ဒီးပဆၢမုၢ်လၢ်လၢ ပကနုာ်လီၤဘၣ်ဆူ ပဲတြီအပူၤန့ၣ်လီၤ. တၢ်အံၤ မ့ၢ်တၢ်ပာ်ပနီၣ်အမ့ၢ်အတီတမံၤလၢ ပတၢ်အိၣ်အသးမၤအသးနီၢ်နီၢ်န့ၣ်လီၤ. ဒီးအကတၢၢ်န့ၣ် ဖဲတၢ်ပျဲနုၤလီၤပှၤန့ၣ်ဒီး, ကမ့ၢ်တၢ်မၤဘျါက့ၤပတၢ်ဆူးတၢ်ဆါအလီၢ်လံၤ, လၢအမ့ၢ် ပှၤကညီအနီၢ်ဒီတဂၤ ကအီဘၣ် တၢ်သူၣ်ခုသးခုလၢ တၢ်သူၣ်ခုသးခု အထံမူထီၣ်ပၢၤ” န့ၣ်လီၤ.
လူဝံး(စ) ကွဲးပာ်ဖျါဝဲလၢ ပကလဲၤခီဖျိဘၣ် တၢ်သူၣ်ခုသးခုလၢလၢပှဲၤပှဲၤအဂ့ၢ်, ဖဲပထံၣ်လိာ်သးဒီးကစၢ်ယ့ၣ်ရှူး မဲာ်သကိးမဲာ်အကတီၢ်န့ၣ်လီၤ. ဒ်ပမ့ၢ် ပှၤစူၢ်က့ၤနာ်က့ၤ ကစၢ်ခရံာ်တဖၣ်အသိး, ခီဖျိပတၢ်ရ့လိာ်သးဒီးအီၤ, ဒီးအသးစီဆှံ အတၢ်မၤလၢပပူၤအဃိ, ပအိၣ်ဒီးကစၢ်ခရံာ်အတၢ်သးခုန့ၣ်လီၤ. ဘၣ်ဆၣ်, ပတၢ်သးခုန့ၣ် ဘၣ်တၢ်မၤတံာ်တာ်အီၤလၢ တၢ်ဒဲးဘး, ဒီးတၢ်သံ, တၢ်အၢတၢ်သီအတၢ်ဆီၣ်သနံး, ဒီးဟီၣ်ခိၣ် အတၢ်ဟးဂီၤလီၤပှီၢ်တဖၣ်အဃိ, မ့ၢ်တၢ်လီၤသူၣ်အုးသးအုးလၢပဂီၢ်န့ၣ်လီၤ. စီၤပီလူး ကွဲးပာ်ဖျါဝဲလၢ, “ခဲကနံၣ်အံၤ, ပထံၣ်ဘၣ်တၢ်လၢ မဲာ်ထံကလၤလၢအတဖျါဘၣ်, မ့မ့ၢ်ခဲကိာ်န့ၣ်, လၢမဲာ်သကိးမဲာ်လီၤ. ခဲကနံၣ်အံၤ, ယသ့ၣ်ညါတၢ်တနီၤ, မ့မ့ၢ်ခဲကိာ်န့ၣ်, ယကသ့ၣ်ညါထံတၢ် ဒ်တၢ်သ့ၣ်ညါထံယၤအသိးန့ၣ်လီၤ” (၁ ကရံၣ် ၁၃:၁၂). ဖဲအဆၢဖိ ၁၀ န့ၣ် စီၤပီလူး စံးဝဲဒၣ်လၢ “တုၤတၢ်လၢတၢ်ပှဲၤဟဲဝဲ” အဂ့ၢ်န့ၣ် ကမ့ၢ်ဝဲဒၣ် ဖဲပသ့ၣ်ညါ, ဒီးလဲၤခီဖျိဘၣ် တၢ်သူၣ်ခုသးခုလၢလၢပှဲၤပှဲၤ မ့ၢ်လၢပအိၣ်ဒီးကစၢ်ခရံာ်အဃိန့ၣ်လီၤ.
လၢတၢ်ဆၢမုၢ်လၢ်ဖးဒိၣ်အပူၤန့ၣ် ပအိၣ်ခိးကွၢ်လၢ် မုၢ်တနံၤအံၤဘၣ်ဆၣ်, ဒ်သိးပကလဲၤခီဖျိကလၢၢ်ဆိ မူခိၣ်ဘီမုၢ် အတၢ်သူၣ်ခုသးခုလၢ အပုာ်ထီၣ်ယွၤလီၤ, ဒီးတၢ်တြီဃာ်အီၤတအိၣ်ဘၣ်တမံၤအဂီၢ်, ကစၢ်ခရံာ် ဟ့ၣ်လီၤတ့ၢ်လံပှၤန့ၣ်လီၤ.
